ಭೂಮಿಯ ವೀಡಿಯೋ ಸೆರೆಹಿಡಿದ ನಾಸಾ

ಕೇಪ್‌ ಕಾರ್ನಿವಾಲ್‌: ವಿವಿಧ ಋತುಗಳಲ್ಲಿ ಭೂಮಿ ಹೇಗೆ ಕಾಣುತ್ತದೆ ಎಂಬುದರ ಚಿತ್ರವನ್ನು ನಾಸಾ ಹಲವು ಬಾರಿ ಬಿಡುಗಡೆ ಮಾಡಿದೆ. ಅಷ್ಟೇ ಅಲ್ಲ, ಭೂಮಿಯ ಕಾಲ ಕಾಲದ ಚಿತ್ರಗಳನ್ನೂ ನಾವು ನೋಡಿದ್ದೇವೆ. ಆದರೆ ಇದೇ ಮೊದಲ ಬಾರಿಗೆ ಭೂಮಿಯ 20 ವರ್ಷಗಳ ಚಿತ್ರಗಳನ್ನೇ ಇಟ್ಟುಕೊಂಡು ಎರಡೂವರೆ ನಿಮಿಷದ ವೀಡಿಯೋವನ್ನು ನಾಸಾ ರೂಪಿಸಿದೆ. ಬಾಹ್ಯಾಕಾಶದಿಂದ ಭೂಮಿಯ ವರ್ಷ ಹಾಗೂ ಋತುಗಳು ಕಳೆದಂತೆ ಹೇಗೆ ಬದಲಾಗುತ್ತ ಸಾಗುತ್ತದೆ ಎಂಬುದರ ಸಂಕ್ಷಿಪ್ತ ಚಿತ್ರಣ ಇದರಲ್ಲಿದೆ.

ಹಿಮಾಚ್ಛಾದಿತ ಭೂಮಿಯಲ್ಲಿ ಬಿಳಿ ಬಣ್ಣವು ಕಾಲ ಕ್ರಮೇಣ ಕಡಿಮೆಯಾಗುತ್ತಿರುವುದನ್ನು ಇದರಲ್ಲಿ ಕಾಣ ಬಹುದು. ಇನ್ನೊಂದೆಡೆ ಸಮುದ್ರದ ಬಣ್ಣವೂ ಕಾಲ ಕಾಲಕ್ಕೆ ಬದಲಾಗಿದ್ದು, ಇದು ಸಮುದ್ರದಾಳದಲ್ಲಿ ಜಲಚರಗಳ ಸಾಂದ್ರತೆಯನ್ನು ಸೂಚಿಸುತ್ತದೆ. 1997ರ ಸೆಪ್ಟಂಬರ್‌ನಿಂದ 2017ರ ಸೆಪ್ಟಂಬರ್‌ ವರೆಗಿನ ಚಿತ್ರಗಳನ್ನು ಇದರಲ್ಲಿ ಬಳಸಿಕೊಳ್ಳಲಾಗಿದೆ. ಇದು ಭೂಮಿ ಉಸಿರಾಡಿದಂತಿದೆ. ಈ ವೀಡಿಯೋವನ್ನು ನೋಡುವುದು ಅದ್ಭುತ ಅನುಭವ ಎಂದು ನಾಸಾದ ಜೆರೆಮಿ ವೆರ್ಡೆಲ್‌ ಹೇಳಿದ್ದಾರೆ.