ನರಿಮೊಗರು ಸಾಂದೀಪನಿ ವಿದ್ಯಾ ಸಂಸ್ಥೆ: ಗದ್ದೆಯಲ್ಲಿ ಕೃಷಿ-ಖುಷಿ

ನರಿಮೊಗರು : ಕೃಷಿಯ ನೈಜ ಅನುಭವಗಳನ್ನು ವಿದ್ಯಾರ್ಥಿಗಳಿಗೆ ನೀಡುವ ದೃಷ್ಟಿಯಿಂದ ಪುತ್ತೂರು ತಾಲೂಕಿನ
ನರಿಮೊಗರು ಗ್ರಾಮದ ಸಾಂದೀಪನಿ ಗ್ರಾಮೀಣ ವಿದ್ಯಾಸಂಸ್ಥೆಯ ಭಾರತ್‌ ಸ್ಕೌಟ್ಸ್‌-ಗೈಡ್ಸ್‌, ಕಬ್‌-ಬುಲ್‌ ಬುಲ್‌
ವಿದ್ಯಾರ್ಥಿಗಳಿಗೆ ಗದ್ದೆಯಲ್ಲಿ ಕೃಷಿ-ಖುಷಿ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಯಿತು.

ಶಾಲಾ ಮುಖ್ಯ ಶಿಕ್ಷಕಿ ಜಯಮಾಲಾ ವಿ.ಎನ್‌. ಅವರು ನರಿಮೊಗರಿನ ಜಯರಾಮ ಪ್ರಭು ಅವರ ಭತ್ತದ ಗದ್ದೆಯಲ್ಲಿ ನೇಜಿ ನೆಡುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿದರು. ಶಾಲಾ ಆಡಳಿತ ಮಂಡಳಿಯ ಸದಸ್ಯ ಸುಬ್ರಾಯ ಬಿ.ಎಸ್‌. ಅವರು ವಿದ್ಯಾರ್ಥಿಗಳಿಗೆ ಭತ್ತದ ಕೃಷಿಯ ಪ್ರಾಮುಖ್ಯತೆ, ಬೆಳೆಸುವ ರೀತಿ-ನೀತಿಗಳ ಬಗ್ಗೆ ಮಾಹಿತಿ ನೀಡಿದರು.

ಶಾಲಾ ಸ್ಕೌಟ್ಸ್‌-ಗೈಡ್ಸ್‌ ಮತ್ತು ಕಬ್‌ -ಬುಲ್‌ ಬುಲ್‌ನ ಶಿಕ್ಷಕರಾದ ಗಣೇಶ್‌, ಮುರಳಿಕೃಷ್ಣ, ಶ್ರೀಪ್ರಸಾದ್‌, ಅನಿತಾ, ರೇಷ್ಮಾ ಭಂಡಾರಿ, ಗೀತಾ, ರೇಷ್ಮಾ, ಕು| ಜ್ಯೋತಿ ಅವರು ವಿದ್ಯಾರ್ಥಿಗಳೊಂದಿಗೆ ಗದ್ದೆಗೆ ಇಳಿದು ನೇಜಿ ನೆಟ್ಟು ವಿದ್ಯಾರ್ಥಿಗಳನ್ನು ಹುರಿದುಂಬಿಸಿದರು. ಜಿನುಗುತ್ತಿದ್ದ ಮಳೆ, ಬೀಸುವ ಗಾಳಿಯ ಜೊತೆ ಆಟವಾಡುತ್ತಾ ವಿದ್ಯಾರ್ಥಿಗಳು ನೇಜಿ ನೆಟ್ಟು ಕೃಷಿಯ ಖುಷಿಯನ್ನು ಆಸ್ವಾದಿಸಿದರು.