ಎಮೋಜಿ ಉಗುರು

ಎಮೋಜಿಗಳು ಗೊತ್ತಲ್ಲ? ಹಾಸ್ಯ, ಶೃಂಗಾರ, ಕೋಪ, ಭಯಾನಕ, ಶಾಂತ… ಹೀಗೆ ನವರಸಗಳನ್ನೂ ಅಕ್ಷರಗಳ ನೆರವಿಲ್ಲದೆ ವ್ಯಕ್ತಪಡಿಸುವ ತಾಕತ್ತುಳ್ಳ ಪುಟ್ಟ ಗೊಂಬೆಗಳು. ಹೆಣ್ಣುಮಕ್ಕಳೇ ಅವುಗಳನ್ನು ಜಾಸ್ತಿ ಬಳಸುವುದು ಅಂತ ಹೇಳಲಾಗುತ್ತದೆ. ಈ ಮಾತನ್ನು ನಿಜ ಮಾಡುವಂತೆ, ಇಲ್ಲಿಯವರೆಗೆ ಬೆರಳ ತುದಿಯಲ್ಲಿದ್ದ ಎಮೋಜಿಗಳೀಗ ಹೆಣ್ಮಕ್ಕಳ ಉಗುರನ್ನು ಅಲಂಕರಿಸುತ್ತಿವೆ. ನೇಲ್‌ ಆರ್ಟ್‌ನಲ್ಲಿ ಈಗ ಎಮೋಜಿ ಟ್ರೆಂಡ್‌ ಮುಂಚೂಣಿಯಲ್ಲಿದೆ.

ಉಗುರುಗಳಿಗೆ ಹಳದಿ ಬಣ್ಣ ಹಚ್ಚಿ, ಅವುಗಳ ಮೇಲೆ ಎಮೋಜಿ ಮೂಡಿಸುವುದು ಈಗ ಹೊಸದೊಂದು ಫ್ಯಾಷನ್‌ ಆಗಿ ಚಾಲ್ತಿಯಲ್ಲಿದೆ. ಅಳು, ನಗು, ಸಿಟ್ಟು, ಪ್ರೀತಿ ಎಲ್ಲವನ್ನೂ ಉಗುರಿನ ತುದಿಯಲ್ಲೇ ಪ್ರಕಟಿಸಬಹುದು. ನೇಲ್‌ ಪಾಲಿಶ್‌ ಬಳಸಿ ಎಮೋಜಿಗಳನ್ನು ಮೂಡಿಸುವುದು ಒಂದು ಬಗೆಯಾದರೆ, 3 ಡಿ ನೇಲ್‌ಆರ್ಟ್‌ ಸ್ಟಿಕರ್‌ಗಳು ಕೂಡಾ ಲಭ್ಯ. ಅಷ್ಟೇ ಅಲ್ಲ, ವ್ಯಕ್ತಿಯ ಭಾವಚಿತ್ರವನ್ನು, ಮಿನಿಯನ್‌, ಪಿಕಾಚು ಮುಂತಾದ ಕಾರ್ಟೂನ್‌ ಕ್ಯಾರೆಕ್ಟರ್‌ಗಳನ್ನೂ ಉಗುರಿನ ಮೇಲೆ ಬಿಡಿಸಬಹುದು.

-ಉಮ್ಮೆ ಅಸ್ಮ ಕೆ. ಎಸ್‌.