ಶರಣಾಗಲು ಪೊಲೀಸರಿಗೇ ಷರತ್ತು ಹಾಕಿದ ನಾಗರಾಜ

ಬೆಂಗಳೂರು: ಬ್ಲ್ಯಾಕ್‌ ಆ್ಯಂಡ್‌ ವೈಟ್‌ ದಂಧೆ ಪ್ರಕರಣದಲ್ಲಿ ಭಾಗಿಯಾಗಿ ತಲೆಮರೆಸಿ­ಕೊಂಡಿರುವ ನಾಗರಾಜ್‌ ಬಂಧನದಿಂದ ತಪ್ಪಿಸಿಕೊಳ್ಳುವ ನಿಟ್ಟಿನಲ್ಲಿ ತನ್ನ ಕಸರತ್ತು ಮುಂದುವರಿಸಿದ್ದಾನೆ. ಮಹತ್ವದ ಬೆಳವಣಿಗೆಯೊಂದರಲ್ಲಿ ಸೋಮವಾರ ಬಾಣಸವಾಡಿ ವಿಭಾಗದ ಎಸಿಪಿ ಹಾಗೂ ಪ್ರಕರಣದ ತನಿಖಾಧಿ­ಕಾರಿ ರವಿಕುಮಾರ್‌ ಅವರನ್ನು ಭೇಟಿ­ಯಾದ ನಾಗರಾಜ್‌ ಪರ ವಕೀಲರಾದ ಶ್ರೀರಾಮರೆಡ್ಡಿ, ಕೆಲ ಷರತ್ತು ಹಾಕಿದ್ದಾರೆ.

ನಾಗರಾಜ್‌ ಪೊಲೀಸರ ಮುಂದೆ ಶರ­ಣಾಗಲು ಬಯಸಿದ್ದು, ಕೆಲವು ಷರ­ ತ್ತು­ಗಳನ್ನು ನ್ಯಾಯಾಲಯದ ಮೂಲಕ ಕೇಳಿಕೊಂಡಿದ್ದಾನೆ. ಅದಕ್ಕೆ ಪೊಲೀಸ್‌ ಇಲಾಖೆ ಸ್ಪಂದಿಸಬೇಕು ಎಂದು ವಕೀಲರು ಮನವಿ ಮಾಡಿದ್ದಾರೆ. 

ಷರತ್ತುಗಳೇನು?: ನಾಗರಾಜ್‌ನನ್ನು ಎಂದಿನ ಪೊಲೀಸ್‌ ವರಸೆಯಲ್ಲಿ ಅಥವಾ ಮಾದರಿಯಲ್ಲಿ ವಿಚಾರಣೆ ನಡೆಸಬಾರದು. ನ್ಯಾಯವಾದಿಗಳ ಸಮ್ಮುಖದಲ್ಲೇ ವಿಚಾರಣೆ ನಡೆಸಬೇಕು. ಪ್ರಕರಣದಲ್ಲಿ ಅವರ ಮಕ್ಕಳಾದ ಗಾಂಧಿ, ಶಾಸಿ ಹೆಸರು ಕೈಬಿಡಬೇಕು.

ಆತನ ವಿರುದ್ಧದ ಸುಳ್ಳು ಪ್ರಕರಣಗಳನ್ನು ಕೈಬಿಡಬೇಕು ಎಂಬ ಷರತ್ತುಗಳನ್ನು ಆರೋಪಿ ನಾಗರಾಜ್‌ ವಿಧಿಸಿದ್ದಾನೆ. ಈ ಕುರಿತು ಪ್ರತಿಕ್ರಿಯಿಸಿರುವ ಎಸಿಪಿ ರವಿಕುಮಾರ್‌ ಅವರು, “ಇಂಥ ಅಸಂಬದ್ಧ ಷರತ್ತುಗಳನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ,’ ಎಂದು ಖಾರವಾಗಿಯೇ ಉತ್ತರಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಮತ್ತೂಬ್ಬನ ಬಂಧನ
ಈ ಮಧ್ಯೆ, ನಾಗರಾಜ್‌ನ ಮತ್ತೂಬ್ಬ ಸಹಚರ ಹಾಗೂ ಬೌನ್ಸರ್‌ ಹರಿಕೃಷ್ಣನನ್ನು ಆಂಧ್ರದ ವೆಲ್ಲೂರಿನಲ್ಲಿ ಪೊಲೀಸರು ಸೋಮವಾರ ಬಂಧಿಸಿದ್ದಾರೆ. ಈ ಹಿಂದೆ ಬಂಧನವಾಗಿದ್ದ ಶ್ರೀಹರಿಯ ಸಹೋದರನಾಗಿರುವ ಹರಿಕೃಷ್ಣ, ನಾಗರಾಜ್‌ಗೆ ಬೌನ್ಸರ್‌ ಆಗಿದ್ದ. ಶರವಣ ಮತ್ತು ಶ್ರೀನಿವಾಸ್‌ ನೋಟುಗಳ ಬದಲಾವಣೆಗೆ ಉದ್ಯಮಿಗಳನ್ನು ಕರೆ ತರುತ್ತಿದ್ದರು. ಈ ವೇಳೆ ಸಹೋದರರು ಸಿಸಿಬಿ ಪೊಲೀಸರ ಸೋಗಿನಲ್ಲಿ ದಾಳಿ ಮಾಡಿ ಹಣ ದರೋಡೆ ಮಾಡುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.ಇದುವರೆಗೂ ಪ್ರಕರಣದಲ್ಲಿ ಒಟ್ಟು 8 ಆರೋಪಿಗಳ ಬಂಧನವಾಗಿದೆ.

ಇಂದು ಅಥವಾ ನಾಳೆ ಶರಣಾಗತಿ?
ಬ್ಲ್ಯಾಕ್‌ ಆ್ಯಂಡ್‌ ವೈಟ್‌ ದಂಧೆ ಪ್ರಕರಣ ಸಂಬಂಧ ತನಿಖೆ ತೀವ್ರಗೊಳಿಸಿರುವ ಎಸಿಪಿ ರವಿಕುಮಾರ್‌, ಪ್ರಕರಣದ ರೂವಾರಿ ನಾಗನ ಬಂಧನಕ್ಕೆ ಸಾಧ್ಯವಿರುವ ಎಲ್ಲ ಮಾರ್ಗಗಳನ್ನು ಬಳಸಿ ಕಾರ್ಯಾಚರಣೆ ನಡೆಸುತ್ತಿದ್ದಾರೆ. ಮೂಲಗಳ ಪ್ರಕಾರ ಆರೋಪಿ ನಾಗರಾಜ್‌ ಮಂಗಳವಾರ ಇಲ್ಲವೇ ಬುಧವಾರ ಬೆಳಗ್ಗೆ ಪೊಲೀಸರಿಗೆ ಶರಣಾಗುವ ಸಾಧ್ಯತೆಯಿದೆ. ಒಂದೊಮ್ಮೆ ಆತ ಶರಣಾಗದಿದ್ದರೆ, ಮುಂದಿನ ನಾಲ್ಕೈದು ದಿನಗಳಲ್ಲಿ ಪೊಲೀಸರೇ ಆತನನ್ನು ಬಂಧಿಸಲಿದ್ದಾರೆ ಎನ್ನಲಾಗಿದೆ.

ನಾಗರಾಜ್‌ ಪರ ವಕೀಲರಾದ ಶ್ರೀರಾಮರೆಡ್ಡಿ ಸೋಮವಾರ ನನ್ನನ್ನು ಭೇಟಿಯಾಗಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೆಲ ಷರತ್ತುಗಳನ್ನು ಹೇರಲು ಮುಂದಾದರು. ಆದರೆ, ಇದಕ್ಕೆ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದ್ದೇನೆ.
-ರವಿಕುಮಾರ್‌, ಎಸಿಪಿ, ಬಾಣಸವಾಡಿ ಉಪವಿಭಾಗ