ಮುಂಬೈ: ಈರುಳ್ಳಿ ಸಗಟು ಬೆಲೆ ಕೆಜಿಗೆ 7- 8 ರೂ.ಗೆ ಇಳಿಕೆ

ನವಿಮುಂಬಯಿ: ಯಥೇತ್ಛ ಪೂರೈಕೆ ಹಾಗೂ ಇತರ ಕೆಲವು ಕಾರಣಗಳಿಂದಾಗಿ ಈರುಳ್ಳಿ ಬೇಡಿಕೆ ಕುಸಿದಿದ್ದು, ವಾಶಿಯಲ್ಲಿರುವ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಯಲ್ಲಿ (ಎಪಿಎಂಸಿ) ಸರಾಸರಿ ಖರೀದಿ ಬೆಲೆ ಕೆ.ಜಿ.ಗೆ 8 ರೂ.ಗೆ ಇಳಿದಿದೆ.

ವ್ಯಾಪಾರಿಗಳ ಪ್ರಕಾರ, ಬೇಸಗೆ ರಜೆಯಿಂದಾಗಿ ಅನೇಕ ಕುಟುಂಬಗಳು ಊರಿಗೆ ತೆರಳಿರುವುದು ಕೂಡ ಬೇಡಿಕೆ ಇಳಿಕೆಗೆ ಮತ್ತೊಂದು ಕಾರಣವಾಗಿದೆ.

ಕಳೆದ ವರ್ಷ ಮೇ-ಜೂನ್‌ ಅವಧಿಯಲ್ಲಿ ಈರುಳ್ಳಿ ಸಗಟು ದರ 10 ರೂ.ಗಿಂತ ಕಡಿಮೆಯಾಗಿತ್ತು. ಈ ವರ್ಷ ಈರುಳ್ಳಿ ಖರೀದಿ ದರ ಕನಿಷ್ಠ 7-8 ರೂ. ಆಗಿದೆ ಎಂದು ವ್ಯಾಪಾರಿಯೊಬ್ಬರು ತಿಳಿಸಿದ್ದಾರೆ.

ಫೆಬ್ರವರಿಯಲ್ಲಿ ಚಿಲ್ಲರೆ ಮಾರುಕಟ್ಟೆಯಲ್ಲಿ ಈರುಳ್ಳಿ ದರ ಕೆ.ಜಿ.ಗೆ 80 ರೂ.ಗೆ ತಲುಪಿತ್ತು. ಕಳೆದ ಸೆಪ್ಟಂಬರ್‌ನಲ್ಲಿ ಕೆ.ಜಿ.ಗೆ 90 ರೂ. ತಲುಪಿತ್ತು. ಅತಿವೃಷ್ಟಿಯಿಂದಾಗಿ ಬೆಳೆಗಳು ಹಾನಿಗೀಡಾ ಗಿದ್ದು, ಡಿಸೆಂಬರ್‌ನಲ್ಲಿ ಪೂರೈಕೆ ಕಡಿಮೆಯಾಗಿತ್ತು.