Advertisement
ಗೆಲ್ಲಲು 161 ರನ್‌ ಗಳಿಸುವ ಸವಾಲು ಪಡೆದ ಯುಪಿ ವಾರಿಯರ್ ತಂಡವು ಮುಂಬೈಯ ನಿಖರ ದಾಳಿಗೆ ತತ್ತರಿಸಿದ್ದು ನಿಗದಿತ 20 ಓವರ್‌ಗಳಲ್ಲಿ 9 ವಿಕೆಟಿಗೆ 118 ರನ್‌ ಗಳಿಸಲಷ್ಟೇ ಶಕ್ತವಾಗಿ ಶರಣಾಯಿತು. ಈ ಗೆಲುವಿನಿಂದ ಮುಂಬೈ ತಂಡವು ತಾನಾಡಿದ ಆರು ಪಂದ್ಯಗಳಿಂದ ನಾಲ್ಕರಲ್ಲಿ ಜಯ ಸಾಧಿಸಿ ಒಟ್ಟು ಎಂಟಂಕದೊಂದಿಗೆ ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನಕ್ಕೇರಿತು. 4 ಪಂದ್ಯಗಳಲ್ಲಿ ಗೆದ್ದಿರುವ ಡೆಲ್ಲಿ ತಂಡವೂ ಎಂಟಂಕ ಹೊಂದಿದ್ದರೂ ಉತ್ತಮ ರನ್‌ಧಾರಣೆಯ ಆಧಾರದಲ್ಲಿ ಅಗ್ರಸ್ಥಾನದಲ್ಲಿದೆ. ಯುಪಿ ವಾರಿಯರ್ ತಾನಾಡಿದ ಆರು ಪಂದ್ಯಗಳಲ್ಲಿ ಕೇವಲ ಎರಡರಲ್ಲಿ ಜಯ ಸಾಧಿಸಿತ್ತು.
ಈ ಮೊದಲು ನಾಟ್‌ ಸಿವೆರ್‌ ಬ್ರಂಟ್‌, ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಮತ್ತು ಅಮೆಲಿಯಾ ಕೆರ್ರ ಅವರ ಉತ್ತಮ ಆಟದಿಂದಾಗಿ ಮುಂಬೈ ಇಂಡಿಯನ್ಸ್‌ ತಂಡವು ಆರು ವಿಕೆಟಿಗೆ 160 ರನ್ನುಗಳ ಉತ್ತಮ ಮೊತ್ತ ಪೇರಿಸಿತ್ತು. ಬ್ರಂಟ್‌ 31 ಎಸೆತಗಳಿಂದ 45 ಮತ್ತು ಕೌರ್‌ 30 ಎಸೆತಗಳಿಂದ 33 ರನ್‌ ಗಳಿಸಿದರು. ಅವರಿಬ್ಬರು ಮೂರನೇ ವಿಕೆಟಿಗೆ 59 ರನ್‌ ಪೇರಿಸಿದ್ದರಿಂದ ಮುಂಬೈ ಚೇತರಿಸಿಕೊಂಡಿತು. ಕೊನೆ ಹಂತದಲ್ಲಿ ಅಮೆಲಿಯಾ ಕೆರ್ರ ಮತ್ತು ಸಜೀವನ್‌ ಸಜನಾ ಬಿರುಸಿನ ಆಟ ಆಡಿದರು. ಕೆರ್ರ 23 ಎಸೆತಗಳಿಂದ 39 ರನ್‌ ಗಳಿಸಿ ಅಜೇಯರಾಗಿ ಉಳಿದರು.