ಮುಂಬಯಿ: ಭಾರೀ ಅಲೆಗಳಿಗೆ ಸಿಲುಕಿ ಇಬ್ಬರು ಸಮುದ್ರ ಪಾಲು, ಶೋಧ ಕಾರ್ಯಾಚರಣೆ

ಮುಂಬಯಿ : ಮುಂಬಯಿಯ ಮೆರೈನ್‌ ಡ್ರೈವ್‌ ಸಮೀಪ ಇಬ್ಬರು ಸಮುದ್ರದ ಬೃಹತ್‌ ಅಲೆಗಳಿಗೆ ಸಿಲುಕಿ ಮುಳುಗಿರುವ ಘಟನೆ ಇಂದು ಶನಿವಾರ ಮಧ್ಯಾಹ್ನ ನಡೆದಿದೆ.

ಸಮುದ್ರದಲ್ಲಿ ಮುಳುಗಿರುವವರಲ್ಲಿ ಒಬ್ಟಾತ 26ರ ಹರೆಯದ ತರುಣ ಮತ್ತು ಇನ್ನೋರ್ವ ಎಂಟು ವರ್ಷದ ಬಾಲಕ ಎಂದು ಹೇಳಲಾಗಿದೆ. ಇವರಿಗಾಗಿ ಶೋಧ ಕಾರ್ಯಾಚರಣೆ ಈಗ ಸಾಗುತ್ತಿದೆ.

ಇಂದು ಶನಿವಾರ ಮಧ್ಯಾಹ್ನ 2.11ರ ಹೊತ್ತಿಗೆ ಮೆರೈನ್‌ ಲೈನ್ಸ್‌ ನಲ್ಲಿ 4.74 ಮೀಟರ್‌ ಎತ್ತರದ ಹೆದ್ದೆರೆಗಳು ಬಂದಾಗ ಇಬ್ಬರು ಸಮುದ್ರದಲ್ಲಿ ಮುಳುಗಿದ ಘಟನೆ ನಡೆಯಿತು. ಇದೇ ವೇಳೆ ಮುಂಬಯಿ ಮಹಾ ನಗರಿಯಲ್ಲಿ ಭಾರೀ ಮಳೆ ಸುರಿಯುತ್ತಿದೆ.

ಇಬ್ಬರು ಸಮುದ್ರದಲ್ಲಿ ಮುಳುಗಿದ ಸುದ್ದಿ ತಿಳಿದೊಡನೆಯೇ ನೌಕಾ ಪಡೆಯ ಮುಳುಗುಗಾರರು ರಕ್ಷಣಾ ಕಾರ್ಯಾಚರಣೆಯನ್ನು ಸೇರಿಕೊಂಡರು. ಸಮುದ್ರದಲ್ಲಿ ನಿರಂತರವಾಗಿ ಎದ್ದು ಬರುತ್ತಿದ್ದ ಹೆದ್ದೆರೆಗಳಿಂದಾಗಿ ರಕ್ಷಣಾ ಕಾರ್ಯಾಚರಣೆಗೆ ತಡೆ ಉಂಟಾಯಿತು.

ಸಮುದ್ರದಲ್ಲಿ ಮಧ್ಯಾಹ್ನ 2ರಿಂದ 3ರ ತನಕ ಹೆದ್ದೆರೆಗಳು ಏಳುವ ಸಂಭಾವ್ಯತೆ ಇರುವುದರಿಂದ ಯಾರೂ ಸಮುದ್ರ ಕಿನಾರೆಗೆ ಹೋಗಬಾರದು ಎಂಬ ಎಚ್ಚರಿಕೆಯನ್ನು ಇಂದು ಶನಿವಾರ ಬೆಳಗ್ಗೆಯೇ ಬೃಹನ್ಮುಂಬಯಿ ಮುನಿಸಿಪಲ್‌ ಕಾರ್ಪೊರೇಶನ್‌ (ಬಿಎಂಸಿ) ನೀಡಿತ್ತು.