Mulki: ಹಣ ಸಾಗಾಟದ ವಾಹನ ಪಲ್ಟಿ: ಐವರಿಗೆ ಗಾಯ

ಮೂಲ್ಕಿ: ಇಲ್ಲಿಯ ಹೆದ್ದಾರಿಯ ಮಿಷನ್‌ ಕಾಂಪೌಂಡ್‌ ಬಳಿ ಬ್ಯಾಂಕಿನ ಎಟಿಎಂಗಳಿಗೆ ಹಣ ತುಂಬಿಸಲು ಬರುವ ವಾಹನವೊಂದು ಚಾಲಕನ ನಿಯಂತ್ರಣ ಕಳೆದುಕೊಂಡು ಮಗುಚಿದ ಪರಿಣಾಮ ಚಾಲಕನ ಸಹಿತ ಐವರು ಗಾಯಗೊಂಡಿದ್ದಾರೆ.

ಮಂಗಳೂರಿನತ್ತ ಹೋಗುತ್ತಿದ್ದ ವಾಹನವು ರಸ್ತೆ ವಿಭಾಜಕಕ್ಕೆ ತಾಗಿ ಮಗುಚಿ ಬಿದ್ದಿದೆ. ಸ್ವಲ್ಪಹೊತ್ತು ಹೆದ್ದಾರಿಯ ಸಂಚಾರಕ್ಕೆ ಅಡಚಣೆ ಉಂಟಾಯಿತು.

ಸ್ಥಳೀಯರು ಸೇರಿ ಪಲ್ಟಿಯಾಗಿದ್ದ ವಾಹನದೊಳಗಿದ್ದವರನ್ನು ಹೊರತೆಗೆದರು. ವಾಹನವನ್ನು ಟೋಲ್‌ ಸಿಬಂದಿ ಕ್ರೇನ್‌ ಮೂಲಕ ತೆರವುಗೊಳಿಸಿದರು.

ಭಧ್ರತಾ ಸಿಬಂದಿ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಮಂಗಳೂರು ಉತ್ತರ ಟ್ರಾಫಿಕ್‌ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.