ಮೂಡದ ಒಮ್ಮತ.. ಲಾಭ-ನಷ್ಟದ ಲೆಕ್ಕಾಚಾರ!

ಹುಬ್ಬಳ್ಳಿ: ಪಾಲಿಕೆ ಸಾಮಾನ್ಯ ಸಭೆಯಲ್ಲಿ ಸದಸ್ಯರೊಂದಿಗೆ ಜಟಾಪಟಿಗೆ ಮುಂದಾಗುವ ಪಾಲಿಕೆ ಆಯುಕ್ತರ ವಿರುದ್ಧ ಕ್ರಮದ ಶಿಫಾರಸಿಗೆ ಒಮ್ಮತ ಮೂಡಿಲ್ಲವಾಗಿದೆ. ಶಿಫಾರಸಿಗೆ ಮುಂದಾದರೆ ರಾಜಕೀಯ ಹಾಗೂ ಕಾನೂನಾತ್ಮಕ ಪರಿಣಾಮಗಳ ಲೆಕ್ಕಾಚಾರದೊಂದಿಗೆ ಹೆಜ್ಜೆ ಇರಿಸುವ ನಿರ್ಧಾರಕ್ಕೆ ಪಾಲಿಕೆಯಲ್ಲಿ ಆಡಳಿತರೂಢ ಬಿಜೆಪಿ ಮುಂದಾಗಿದೆ.

ಬುಧವಾರ ನಡೆಯುವ ಪಾಲಿಕೆ ಮುಂದುವರಿದ ಸಾಮಾನ್ಯ ಸಭೆಯಲ್ಲಿ ಆಯುಕ್ತರ ವರ್ತನೆಗೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಪ್ರಮುಖ ನಿರ್ಧಾರವೊಂದನ್ನು ಕೈಗೊಳ್ಳಲಾಗುತ್ತದೆ. ಕ್ರಮಕ್ಕೆ ಶಿಫಾರಸು ಮೂಲಕ ನಿರ್ಣಯ ಕೈಗೊಳ್ಳಲಾಗುತ್ತದೆಯೋ ಅಥವಾ ಇಂತಹ ವರ್ತನೆ ಪುನರಾವರ್ತನೆಯಾಗದಂತೆ ನೋಡಿಕೊಳ್ಳುವಂತೆ ತಿಳಿಸುವ ನಿರ್ಧಾರಕ್ಕೆ ಬರಲಾಗುತ್ತದೆಯೋ ಎಂಬ  ಕುತೂಹಲ ಮೂಡಿಸಿದೆ. 

ಪಾಲಿಕೆ ಆಯುಕ್ತ ಸಿದ್ದಲಿಂಗಯ್ಯ ಹಿರೇಮಠ ಅವರು ಏ.10ರಂದು ನಡೆದ ಪಾಲಿಕೆ ಸಾಮಾನ್ಯ ಸಭೆಯಲ್ಲಿ ಬಿಜೆಪಿ ಹಿರಿಯ ಸದಸ್ಯ ಡಾ| ಪಾಂಡುರಂಗ ಪಾಟೀಲರೊಂದಿಗೆ ವಾಗ್ವಾದಕ್ಕಿಳಿದಿದ್ದರು. ಸಭಾನಾಯಕ ರಾಮಣ್ಣ ಬಡಿಗೇರ ಹಾಗೂ ಡಾ| ಪಾಟೀಲರೊಂದಿಗೆ ಏರುಧ್ವನಿಯಲ್ಲಿ ಮಾತನಾಡಿದ್ದು, ಸಹಜವಾಗಿ ಬಿಜೆಪಿ ಸದಸ್ಯರಷ್ಟೇ ಅಲ್ಲದೆ ವಿಪಕ್ಷಗಳ ಸದಸ್ಯರನ್ನು ಕೆರಳಿಸುವಂತೆ ಮಾಡಿತ್ತು. 

ಮೂಡದ ಒಮ್ಮತ?: ಪಾಲಿಕೆ ಆಯುಕ್ತರು ಸದನದಲ್ಲಿ ಸದಸ್ಯರಿಗೆ ಏರುಧ್ವನಿಯಲ್ಲಿ ಮಾತನಾಡುವ, ಆಡಳಿತ ಮಂಡಳಿಗೆ ಮುಜುಗರ ರೀತಿಯಲ್ಲಿ ಗೊಂದಲಮಯ ಹೇಳಿಕೆ ನೀಡುವ ಬಗ್ಗೆ ಆಡಳಿತ ಹಾಗೂ ಪ್ರತಿಪಕ್ಷದ ಅನೇಕ ಸದಸ್ಯರಿಗೆ ಅಸಮಾಧಾನ ಇದೆ ಎಂದು ಖಾಸಗಿಯಾಗಿ ಹೇಳಿಕೊಳ್ಳುತ್ತಿದ್ದಾರೆಯಾದರೂ, ಆಯುಕ್ತರ ವಿರುದ್ಧದ ಕ್ರಮದ ಶಿಫಾರಸು ಕೈಗೊಳ್ಳುವ ಬಗ್ಗೆ ಸದಸ್ಯರಲ್ಲಿ ಒಮ್ಮತಾಭಿಪ್ರಾಯ ಮೂಡಿಲ್ಲ ಎಂದು ಹೇಳಲಾಗುತ್ತಿದೆ. 

ಕಾಂಗ್ರೆಸ್‌, ಬಿಜೆಪಿ ಹಾಗೂ ಜೆಡಿಎಸ್‌ನ ಕೆಲ ಸದಸ್ಯರು ಆಯುಕ್ತರ ವಿರುದ್ಧ ಕ್ರಮದ ಶಿಫಾರಸ್ಸು ನಿರ್ಣಯ ಕೈಗೊಂಡು ಸರಕಾರಕ್ಕೆ ಕಳಹಿಸೋಣ ಎಂದು ಒತ್ತಾಯಿಸುತ್ತಿದ್ದರೆ, ಇನ್ನು ಕೆಲ ಸದಸ್ಯರು ಮದೃಧೋರಣೆ ತಾಳಿದ್ದಾರೆ ಎನ್ನಲಾಗಿದೆ. ಆಯುಕ್ತರು ತಮ್ಮ ವರ್ತನೆ ಬಗ್ಗೆ ಈಗಾಗಲೇ ನಮ್ಮಲ್ಲರ ಮುಂದೆ ಬಂದು ಕ್ಷಮೆ ಯಾಚಿಸಿದ್ದಾರೆ ಇಲ್ಲಿಗೆ ಇದನ್ನು ಬಿಟ್ಟುಬಿಡೋಣ ಎಂಬುದು ಕೆಲವರ ಅನಿಸಿಕೆಯಾಗಿದೆ ಎನ್ನಲಾಗಿದೆ. 

ಆಯುಕ್ತರ ವಿರುದ್ಧ ಕ್ರಮಕ್ಕೆ ಶಿಫಾರಸಿನ  ನಿರ್ಣಯವನ್ನು ಕೈಗೊಳ್ಳಬೇಕಾದರೆ ಪಾಲಿಕೆಯಲ್ಲಿ 2/3ರಷ್ಟು ಸದಸ್ಯರ ಬೆಂಬಲ ಅಗತ್ಯವಾಗಿದೆ. ಇಂತಹ ನಿರ್ಣಯ ಕೈಗೊಳ್ಳಬೇಕಾದರೆ ಆಡಳಿತ, ವಿಪಕ್ಷಗಳ ಸದಸ್ಯರು ಒಮ್ಮತಾಭಿಪ್ರಾಯಕ್ಕೆ ಬಂದರೆ ಮಾತ್ರ ಇದು ಸಾಧ್ಯವಾಗಲಿದೆ. 

ಲಾಭ-ನಷ್ಟ, ಪರಿಣಾಮದ ಲೆಕ್ಕಾಚಾರ: ಆಯುಕ್ತರ ವಿರುದ್ಧ ಕ್ರಮದ ಶಿಫಾರಸ್ಸು ನಿರ್ಣಯ ಕೈಗೊಳ್ಳುವಂತೆ ಬಿಜೆಪಿಯವರನ್ನು ಕೆಲ ವಿಪಕ್ಷಗಳ ಸದಸ್ಯರು ಒತ್ತಾಯಿಸುತ್ತಿದ್ದಾರೆ. ಆದರೆ ಬಿಜೆಪಿ ಸದಸ್ಯರು ಏಕಾಏಕಿ ನಿರ್ಣಯ ಕೈಗೊಳ್ಳುವ ಬದಲು ಇದರಿಂದಾಗುವ ರಾಜಕೀಯ ಹಾಗೂ ಕಾನೂನಾತ್ಮಕ ಪರಿಣಾಮಗಳ ಲೆಕ್ಕಾಚಾರದಲ್ಲಿ ತೊಡಗಿದ್ದಾರೆ.

ಆಯುಕ್ತರ ವಿರುದ್ಧ ಕ್ರಮದ ಶಿಫಾರಸು ನಿರ್ಣಯವನ್ನು ಕೈಗೊಂಡರೆ ರಾಜ್ಯದಲ್ಲಿ ಕಾಂಗ್ರೆಸ್‌ ಸರಕಾರ ಇದ್ದು, ಪಾಲಿಕೆಯಲ್ಲಿ ಬಿಜೆಪಿ ಆಡಳಿತಕ್ಕೆ ಮುಜುಗರ ತರುವಂತೆ ಮಾಡುವ ನಿಟ್ಟಿನಲ್ಲಿ ಮುಖ್ಯಮಂತ್ರಿಯವರು ಈ ಶಿಫಾರಸಿಗೆ ಮನ್ನಣೆ ನೀಡದಿದ್ದರೆ ಹೇಗೆ ಎಂಬ ಚಿಂತೆ ಬಿಜೆಪಿಯವರನ್ನು ಕಾಡ ತೊಡಗಿದೆ.

ಅಲ್ಲದೆ ನಿರ್ಣಯದ ವಿರುದ್ಧ ಆಯುಕ್ತರು ಕಾನೂನು ಹೋರಾಟಕ್ಕೆ ಮುಂದಾದರೆ ಹೇಗೆ ಮತ್ತು ಏನಾಗಲಿದೆ ಎಂಬ ಲೆಕ್ಕಾಚಾರವೂ ನಡೆದಿದೆ. ಹಿರಿಯ ಸದಸ್ಯ ಡಾ| ಪಾಂಡುರಂಗ ಪಾಟೀಲ ಉದ್ದೇಶಿಸಿ ಆಯುಕ್ತರು ಏರುಧ್ವನಿಯಲ್ಲಿ ಮಾತನಾಡಿರುವುದು ಸಹಜವಾಗಿಯೇ ಬಿಜೆಪಿ ಸದಸ್ಯರಿಗೆ ಆಕ್ರೋಶ ತರಿಸಿದೆ.

ಈ ಹಿಂದೆ ಧಾರವಾಡದಲ್ಲಿ ನಡೆದ ಸಭೆಯಲ್ಲಿ ಕಾಂಗ್ರೆಸ್‌ ಸದಸ್ಯ ಗಣೇಶ ಟಗರಗುಂಟಿ ವಿರುದ್ಧ, ಸುದ್ದಿಗೋಷ್ಠಿ ಕುರಿತಾಗಿ ಬಿಜೆಪಿ ಸದಸ್ಯ ವೀರಣ್ಣ ಸವಡಿ, ಸುಧೀರ ಸರಾಫ್ ವಿರುದ್ಧ ಆಯುಕ್ತರು ಹೇಳಿಕೆ ನೀಡಿದ್ದು ಅಸಮಾಧಾನದ ಹೊಗೆಯಾಡುವಂತೆ ಮಾಡಿತಲ್ಲದೆ ಇದೀಗ ಅದು ಸ್ಫೋಟಗೊಳ್ಳುವಂತೆ ಮಾಡಿದೆ. 

ಆಯುಕ್ತರ ವಿರುದ್ಧ ಕ್ರಮದ ಶಿಫಾರಸು ಇನ್ನಿತರ ಯಾವುದೇ ನಿರ್ಣಯದ ಬಗ್ಗೆ ಮುಂದಡಿ ಇರಿಸುವ ಮೊದಲು ಬಿಜೆಪಿ ನಾಯಕರಾದ ಜಗದೀಶ ಶೆಟ್ಟರ, ಪ್ರಹ್ಲಾದ ಜೋಶಿ ಅವರೊಂದಿಗೆ ಸಮಾಲೋಚಿಸಿ ಬಿಜೆಪಿ ಸದಸ್ಯರು ನಿರ್ಧಾರ ಕೈಗೊಳ್ಳಬೇಕಿದೆ. 

ಬುಧವಾರ ನಡೆಯುವ ಪಾಲಿಕೆ ಸಾಮಾನ್ಯ ಸಭೆಯ ಅರ್ಧಗಂಟೆ ಮೊದಲು ಎಲ್ಲ ಪಕ್ಷಗಳ ಹಿರಿಯ ಸದಸ್ಯರು ಸಭೆ ಸೇರಲಿದ್ದು, ಆಯುಕ್ತರ ವರ್ತನೆ ಕುರಿತಾಗಿ ಯಾವ ಕ್ರಮ ಎಂಬುದರ ಬಗ್ಗೆ ಮತ್ತೂಮ್ಮೆ ಮಹತ್ವದ ಚರ್ಚೆ ನಡೆಯುವ ಸಾಧ್ಯತೆ ಇದ್ದು, ಯಾವ ನಿರ್ಣಯ ಕೈಗೊಳ್ಳುತ್ತಾರೋ ಕಾದು ನೋಡಬೇಕು. 

* ಅಮರೇಗೌಡ ಗೋನವಾರ