ಮಧ್ಯಪ್ರದೇಶ: ಗೋವು ಹತ್ಯೆ ಶಂಕೆ: ಥಳಿಸಿ ಇಬ್ಬರ ಹತ್ಯೆ

ಭೋಪಾಲ್‌: ಇಲ್ಲಿನ ಬುಡಕಟ್ಟು ಜನಾಂಗದ ಇಬ್ಬರು ವ್ಯಕ್ತಿಗಳನ್ನು ಗೋವು ವಧಾಕಾರರೆಂದು ತಿಳಿದು ಅವರನ್ನು ಥಳಿಸಿ ಹತ್ಯೆಗೈದಿರುವ ಪ್ರಕರಣ ಮಧ್ಯಪ್ರದೇಶದ ಸೆಯೊನಿ ಜಿಲ್ಲೆಯಲ್ಲಿ ನಡೆದಿದೆ.

ಇತ್ತೀಚೆಗೆ ಗೋವೊಂದನ್ನು ಕದ್ದೊಯ್ದು ಹತ್ಯೆಗೈದಿರುವ ಆರೋಪ ಈ ವ್ಯಕ್ತಿಗಳ ಮೇಲಿತ್ತು. ಈ ಹಿನ್ನೆಲೆಯಲ್ಲಿ, ಉದ್ರಿಕ್ತಗೊಂಡಿದ್ದ 20 ಜನರ ತಂಡವೊಂದು ಮಂಗಳವಾರ ಮಧ್ಯಾಹ್ನ ಇವರ ಮನೆಗೆ ತೆರಳಿ ಜಗಳ ತೆಗೆದು ಇವರ ಮೇಲೆ ಹಲ್ಲೆ ನಡೆಸಿತು. ಘಟನೆಯಲ್ಲಿ ಮತ್ತೊಬ್ಬನಿಗೆ ಗಾಯವಾಗಿದೆ ಎಂದು ಹೇಳಲಾಗಿದೆ.

ಘಟನೆಗೆ ಸಂಬಂಧಿಸಿದಂತೆ 20 ಮಂದಿಯ ವಿರುದ್ಧ ಕೇಸು ದಾಖಲಿಸಲಾಗಿದೆ. ಈ ಪೈಕಿ ಆರು ಮಂದಿ ವಿರುದ್ಧ ಕೊಲೆ ಕೇಸು ದಾಖಲಿಸಲಾಗಿದೆ. ಪ್ರಕರಣದಲ್ಲಿ ಭಾಗಿಯಾದ ಇತರರಿಗಾಗಿ ಶೋಧ ಕಾರ್ಯ ಮುಂದುವರಿದಿದೆ ಎಂದು ಸೆಯೋನಿ ಜಿಲ್ಲೆಯ ಹೆಚ್ಚುವರಿ ಪೊಲೀಸ್‌ ವರಿಷ್ಠಾಧಿಕಾರಿ ಎಸ್‌.ಕೆ.ಮರಾವಿ ತಿಳಿಸಿದ್ದಾರೆ.