48 ಗಂಟೆಯಲ್ಲಿ 150 ಬೆಡ್‍ಗಳ ಕೋವಿಡ್ ಆರೈಕೆ ಕೇಂದ್ರ: ಇದು ಭಾರತೀಯ ಯೋಧರ ಶ್ರಮದಾನ  

ಭೂಪಾಲ್ : ಹೆಚ್ಚುತ್ತಿರುವ ಕೋವಿಡ್ ರೋಗಿಗಳ ರಕ್ಷಣೆಗೆ ಭಾರತೀಯ ಸೇನೆಯ ಯೋಧರು ನೆರವಾಗಿದ್ದಾರೆ. ಕೇವಲ 48 ಗಂಟೆಯಲ್ಲಿ 150 ಬೆಡ್‍ಗಳ ಕೋವಿಡ್ ಕೇರ್ ಸೆಂಟರ್ ತೆರೆದಿದ್ದಾರೆ.

ಮಧ್ಯ ಪ್ರದೇಶದಲ್ಲಿ ಕೋವಿಡ್ ಪಿಡುಗು ಉಲ್ಬಣಿಸುತ್ತಿದೆ. ಆಸ್ಪತ್ರೆಗಳಲ್ಲಿ ಬೆಡ್ ಅಭಾವ ಎದುರಾಗಿದೆ. ಈ ಸಮಸ್ಯೆ ಮನಗಂಡಿರುವ ಭಾರತೀಯ ಸೇನೆ ಭೂಪಾಲ್‍ನಲ್ಲಿ 150 ಬೆಡ್‍ಗಳ ಕೋವಿಡ್ ಆರೈಕೆ ಕೇಂದ್ರವನ್ನು ಸ್ಥಾಪಿಸಿದೆ. ಇವುಗಳಲ್ಲಿ 40 ಬೆಡ್‍ಗಳನ್ನು ಮಹಿಳೆಯರಿಗೆ ಹಾಗೂ ಮಕ್ಕಳಿಗೆ ಮೀಸಲಿರಿಸಿದೆ.

ಇಂದು (ಸೋಮವಾರ) ಕೋವಿಡ್ ಆರೈಕೆ ಕೇಂದ್ರಕ್ಕೆ ಭೇಟಿ ನೀಡಿರುವ ವೈದ್ಯಕೀಯ ಶಿಕ್ಷಣ ಸಚಿವ ವಿಶ್ವಾಸ ಸಾರಂಗ್, ಕೋವಿಡ್ ರೋಗಿಗಳಿಗೆ ಅಗತ್ಯ ಇರುವ ಎಲ್ಲ ಸೌಲಭ್ಯಗಳನ್ನು ಇಲ್ಲಿ ಕಲ್ಪಿಸಲಾಗಿದೆ. ತುರ್ತು ಸೇವೆಗಾಗಿ ಆ್ಯಂಬುಲೆನ್ಸ್ ಹಾಗೂ ಆಕ್ಸಿಜನ್ ವ್ಯವಸ್ಥೆ ಕೂಡ ಇದೆ. ಇದೇ ಮಾದರಿಯಲ್ಲಿ ಪ್ರತಿ ಜಿಲ್ಲೆಯಲ್ಲಿಯೂ ಒಂದೊಂದು ಕೋವಿಡ್ ಆರೈಕೆ ಕೇಂದ್ರಗಳನ್ನು ತೆರೆಯಲಾಗುತ್ತದೆ ಎಂದಿದ್ದಾರೆ.

ಇನ್ನು ಮಧ್ಯ ಪ್ರದೇಶದಲ್ಲಿ ಕೋವಿಡ್ ‍ಪ್ರಕರಣಗಳು ಹೆಚ್ಚು ಇವೆ. ಭೂಪಾಲ್ ನಲ್ಲೂ ಮಹಾಮಾರಿ ಸೋಂಕು ಕೈ ಮೀರಿ ವ್ಯಾಪಿಸಿದೆ.ಏಪ್ರಿಲ್ 12 ರಂದು ಮೊದಲ ಬಾರಿಗೆ ಕೋವಿಡ್ ಕರ್ಫ್ಯೂ ಭೂಪಾಲ್‍ನಲ್ಲಿ ಹೇರಲಾಗಿತ್ತು. ಇದು ಮೇ 3ರ ವರೆಗೆ ಮುಂದುವರೆಸಿ ಸರ್ಕಾರ ಆದೇಶ ಹೊರಡಿಸಿದೆ.