ಪ.ಬಂಗಾಲ: ಬಿಜೆಪಿ ಬೆಂಬಲಿಸಿದ ತಾಯಿ, ಮಗಳ ಮೇಲೆ ಟಿಎಂಸಿ ಹಲ್ಲೆ

ಕೋಲ್ಕತ : ಭಾರತೀಯ ಜನತಾ ಪಕ್ಷವನ್ನು ಬೆಂಬಲಿಸುತ್ತಿದ್ದಾರೆಂಬ ಶಂಕೆಯಲ್ಲಿ ಪಶ್ಚಿಮ ಬಂಗಾಲದ ಅಸನ್‌ಸೋಲ್‌ ಎಂಬಲ್ಲಿ ತಾಯಿ ಮತ್ತು ಮಗಳನ್ನು ಟಿಎಂಸಿ ಬೆಂಬಲಿಗರು ನಿರ್ದಯವಾಗಿ ಹೊಡೆದು ಹಲ್ಲೆ ಮಾಡಿದ್ದಾರೆ. ಮಾತ್ರವಲ್ಲದೆ ಅವರ ಮನೆಯನ್ನು ಕೂಡ ಚೆಲ್ಲಾಡಿದ್ದಾರೆ.

ಅಸನ್‌ಸೋಲ್‌ನ ರೈಲ್‌ಪಾರ್‌ ಪ್ರದೇಶದ ನಿವಾಸಿಯಾಗಿರುವ ಮುತ್ರಿ ಸಿಂಗ್‌ ಮತ್ತು ಆಕೆಯ ಮಗಳು ಟಿಎಂಸಿ ಕಾರ್ಯಕರ್ತರ ದೌರ್ಜನ್ಯಕ್ಕೆ ಗುರಿಯಾದವರು. 

ಟಿಎಂಸಿ ನಾಯಕ ದೀಪಕ್‌ ಗುಪ್ತಾ ಮತ್ತು ಆತನ ಸುಮಾರು 20 ಮಂದಿ ಟಿಎಂಸಿ ಬೆಂಬಲಿಗರು ಈ ದುಷ್ಕೃತ್ಯ ನಡೆಸಿದರು. ‘ನಮ್ಮ ಸಣ್ಣ ಮನೆಯೊಳಗಿನ ಎಲ್ಲ ಸರಕು, ಸಾಮಗ್ರಿಗಳನ್ನು ಅವರು ಒಡೆದು ಹಾಕಿದರು’ ಎಂದು ಮುತ್ರಿ ಸಿಂಗ್‌ ದೂರಿದ್ದಾರೆ.

ಗಾಯಗೊಂಡ ಮುತ್ರಿ ಮತ್ತು ಆಕೆಯ ಮಗಳನ್ನು ಸ್ಥಳೀಯ ಆಸ್ಪತ್ರೆಗೆ ಸೇರಿಸಲಾಗಿದೆ. ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.