ಖರ್ಗೆ ಪ್ರಚಾರ ಸಭೆಯಲ್ಲೂ ಮೋದಿ ಘೋಷಣೆ

ಕಲಬುರಗಿ: ಕಾಂಗ್ರೆಸ್‌ ಪಕ್ಷದ ಸಂಸದೀಯ ನಾಯಕ, ಕಲಬುರಗಿ ಲೋಕಸಭಾ ಕ್ಷೇತ್ರದ ಅಭ್ಯರ್ಥಿ ಡಾ| ಮಲ್ಲಿಕಾರ್ಜುನ ಖರ್ಗೆ ಚುನಾವಣೆ ಪ್ರಚಾರ ಸಭೆಯಲ್ಲಿ ಕೆಲ ಯುವಕರು “ಮೋದಿ… ಮೋದಿ’ ಎಂದು ಘೋಷಣೆ ಕೂಗಿದ ಘಟನೆ ನಡೆದಿದೆ.

ಇಲ್ಲಿನ ಪಿಡಿಎ ಕಾಲೇಜಿನ ಸಭಾಂಗಣದಲ್ಲಿ ಮಂಗಳವಾರ ಖರ್ಗೆ ಚುನಾವಣಾ ಪ್ರಚಾರ ಸಭೆ ಹಮ್ಮಿಕೊಂಡಿದ್ದರು. ಸಂಸ್ಥೆ ಅಧ್ಯಕ್ಷ ಡಾ.ಭೀಮಾಶಂಕರ ಬಿಲಗುಂದಿ, ಖರ್ಗೆ ಅವರಿಗೆ ಹೂಗುತ್ಛ ನೀಡಿ ಸ್ವಾಗತ ಕೋರುವ ಸಂದರ್ಭದಲ್ಲಿ ಕೆಲವರು “ಮೋದಿ.. ಮೋದಿ’ ಎಂದು ಕೂಗಿದರು.

ಸಭಾಂಗಣದ ಮೊದಲ ಮಹಡಿಯಲ್ಲಿ ನಿಂತು ಮೋದಿ ಪರ ಘೋಷಣೆ ಕೂಗಿದ ಯುವಕರು ತಕ್ಷಣವೇ ಅಲ್ಲಿಂದ ಓಡಿ ಹೋದರು. ನಂತರದಲ್ಲಿ ಮಾತನಾಡಿದ ಖರ್ಗೆ, ಮೋದಿ ಎಂದು ಕೂಗಿದರೆ ನಾನು ಹೆದರಲ್ಲ.

ಈ ಹಿಂದೆ ಕೂಡ ನಾನು ಮೋದಿಗೆ ಹೆದರಿಲ್ಲ. ಸಂಸತ್‌ನಲ್ಲಿ ನಾನು ಮೋದಿಯನ್ನು ನಿತ್ಯವೂ ಎದುರಿಸಿದ್ದೇನೆ. ಮೋದಿಯನ್ನು ಪ್ರಶ್ನಿಸುವ ಹಕ್ಕನ್ನು ಕಲಬುರಗಿ ಜನತೆ ನನಗೆ ಕೊಟ್ಟಿದ್ದಾರೆ ಎಂದರು.