ಕಾಣೆಯಾಗಿದ್ದ ಸಜೀಪಮುನ್ನೂರಿನ ಯುವಕ-ಯುವತಿ ಕೇರಳದಲ್ಲಿ ಪತ್ತೆ

ಬಂಟ್ವಾಳ: ಕಳೆದ 4 ದಿನಗಳ ಹಿಂದೆ ಸಜೀಪಮುನ್ನೂರು ಗ್ರಾಮದ ಉದ್ದೊಟ್ಟು ನಿವಾಸಿಗಳಾದ ಯುವಕ ಹಾಗೂ ಯುವತಿ ಒಂದೇ ದಿನ ಮನೆ ಬಿಟ್ಟು ತೆರಳಿದ್ದು, ಇದೀಗ ಅವರಿಬ್ಬರನ್ನೂ ಬಂಟ್ವಾಳ ಪೊಲೀಸರು ಕೇರಳದ ಕಾಂಞಂಗಾಡಿನಲ್ಲಿ ಪತ್ತೆ ಹಚ್ಚಿ ಊರಿಗೆ ಕರೆ ತಂದಿದ್ದಾರೆ.

ಉದ್ದೊಟ್ಟು ನಿವಾಸಿ ಅಬ್ದುಲ್‌ ಹಮೀದ್‌ ಅವರ ಪುತ್ರಿ ಆಯಿಸತ್‌ ರಸ್ಮಾ(18) ಹಾಗೂ ಹೈದರ್‌ ಅವರ ಪುತ್ರ ಮಹಮ್ಮದ್‌ ಸಿನಾನ್‌(23) ಅವರು ನ. 24ರಂದು ಕಾಣೆಯಾಗಿದ್ದರು.

ಮನೆಯವರ ದೂರಿನಂತೆ ಹುಡುಕಾಟ ನಡೆಸಿದ ಬಂಟ್ವಾಳ ಪೊಲೀಸರು ಅವರಿಬ್ಬರನ್ನೂ ಕಾಂಞಂಗಾಡಿನಲ್ಲಿ ಪತ್ತೆ ಹಚ್ಚಿದ್ದು, ಠಾಣೆಗೆ ತಂದು ವಿಚಾರಿಸಿದಾಗ ತಾವಿಬ್ಬರೂ ಪರಸ್ಪರ ಪ್ರೀತಿಸಿದ್ದು, ಮದುವೆಯಾಗುವುದಾಗಿ ತಿಳಿಸಿದ್ದಾರೆ ಎನ್ನಲಾಗಿದೆ.