Advertisement
ಸೋಮವಾರ ರಾತ್ರಿ ನಡೆದ ವನಿತೆಯರ ಸಿಂಗಲ್ಸ್‌ ವಿಭಾಗದ ಪಂದ್ಯದಲ್ಲಿ ಹಾಲೆಪ್‌ ಅಮೆರಿಕದ ವೀನಸ್‌ ವಿಲಿಯಮ್ಸ್‌ ಅವರನ್ನು 6-3, 6-3 ನೇರ ಸೆಟ್‌ಗಳಿಂದ ಸೋಲಿಸಿದ್ದಾರೆ. ವೀನಸ್‌ ವಿರುದ್ಧ ಕಳೆದ 4 ಪಂದ್ಯಗಳಲ್ಲಿ ಗೆದ್ದಿರುವ ಹಾಲೆಪ್‌ ಮತ್ತೂಮ್ಮೆ ವೀನಸ್‌ ಅವರನ್ನು ಸೋಲಿಸಿದ್ದಾರೆ. ಹಾಲೆಪ್‌ ಅವರು ವೀನಸ್‌ ವಿರುದ್ಧ “ಆಸ್ಟ್ರೇಲಿಯನ್‌ ಓಪನ್‌’ ಕೂಟದಲ್ಲೂ ಜಯಿಸಿದ್ದರು. ಅಲ್ಲಿ ಕೂಡ ವೀನಸ್‌ ಅವರನ್ನು ನೇರ ಸೆಟ್‌ಗಳಲ್ಲಿ ಸೋಲಿಸಿದ್ದರು. ನವೋಮಿ ಒಸಾಕಾ ಅವರ ನಿರ್ಗಮನದ ಬಳಿಕ ಈ ಕೂಟದಲ್ಲಿ ಅಗ್ರ ಶ್ರೇಯಾಂಕದಲ್ಲಿ ಹಾಲೆಪ್‌ ಆಡುತ್ತಿದ್ದಾರೆ.
ಪುರುಷರ ವಿಭಾಗದಲ್ಲಿ ರೋಜರ್‌ ಫೆಡರರ್‌ ಅವರ ಗೆಲುವಿನ ಓಟ ಮುಂದುವರಿದಿದ್ದು 4ನೇ ಸುತ್ತಿಗೆ ಪ್ರವೇಶಿಸಿದ್ದಾರೆ. ಫೆಡರರ್‌ ಸರ್ಬಿಯಾದ ಫಿಲಿಪ್‌ ಕ್ರಾಜಿನೋವಿಕ್‌ ಅವರನ್ನು 7-5, 6-3 ನೇರ ಸೆಟ್‌ಗಳಿಂದ ಸೋಲಿಸಿದರು. ಮೊದಲ ಸೆಟ್‌ನ ಆರಂಭದಲ್ಲಿ ಕ್ರಾಜಿನೋವಿಕ್‌ 2-1 ಮುನ್ನಡೆ ಸಾಧಿಸಿದರೂ ಅನುಭವಿ ಫೆಡರರ್‌ ಎದುರು ಮಂಕಾಗಿ ಮೊದಲ ಸೆಟ್‌ ಸೋತರು. ದ್ವಿತೀಯ ಸೆಟ್‌ ಆರಂಭದಲ್ಲೇ ಮೇಲುಗೈ ಸಾಧಿಸಿದ ಫೆಡರರ್‌ ಅವರು ಕ್ರಾಜಿನೋವಿಕ್‌ಗೆ ಹೆಚ್ಚಿನ ಅವಕಾಶ ನೀಡದೇ ಸುಲಭವಾಗಿ ಜಯಿಸಿದರು. ಫೆಡರರ್‌ ಅವರ ಮುಂದಿನ ಎದುರಾಳಿ ಡೆನಿಲ್‌ ಮೆಡ್ವೆಡೆವ್‌. ಡೆನಿಲ್‌ ಅವರು ಅಮೆರಿಕದ ಅರ್ಹತಾ ಆಟಗಾರ ರಿಲೇ ಒಪ್ಲೆಕಾ ವಿರುದ್ಧ ಭಾರೀ ಹೋರಾಟದ ಬಳಿಕ 7-6 (7-5), 6-7 (5-7), 7-6 (7-0) ಸೆಟ್‌ಗಳಿಂದ ಜಯಿಸಿದರು.
Related Articles
Advertisement
ಕೂಟದಿಂದ ಹೊರ ನಡೆದ ಬಿಯಾಂಕ್‌“ಇಂಡಿಯನ್‌ ವೆಲ್ಸ್‌’ ಪ್ರಶಸ್ತಿ ಗೆದ್ದ ಸಂಭ್ರಮದಲ್ಲಿ “ಮಯಾಮಿ ಕೂಟ’ದಲ್ಲಿ ಪಾಲ್ಗೊಂಡ ಕೆನಡದ ಬಿಯಾಂಕ್‌ ಆ್ಯಂಡ್ರಿಸ್ಕೂ ಅವರ ಸಂತೋಷಕ್ಕೆ ತೆರೆಬಿದ್ದಿದೆ. ಸೋಮವಾರ ರಾತ್ರಿ ಆನೆಟ್‌ ಕೊಂಟಾವೇಟ್‌ ವಿರುದ್ಧ 6-1, 2-0 ಮುನ್ನಡೆಯಲ್ಲಿದ್ದ ವೇಳೆ ಭುಜದ ನೋವಿಗೆ ತುತ್ತಾದ ಬಿಯಾಂಕ್‌ ಕೂಟದಿಂದ ಹೊರನಡೆಯಬೇಕಾಯಿತು. ಇವರ ನಿರ್ಗಮನದಿಂದ ಆನೆಟ್‌ ಅವರಿಗೆ ವಾಕ್‌ ಓವರ್‌ ಲಭಿಸಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಅಲ್ಲಿ ಅವರು ಸೀ ಸು-ವೀ ಅವರನ್ನು ಎದುರಿಸಲಿದ್ದಾರೆ.