ಮಾಟುಂಗಾ ಮಹಿಳಾ ರೈಲು ನಿಲ್ದಾಣ ಲಿಮ್ಕಾ ಬುಕ್‌ಗೆ ಸೇರ್ಪಡೆ

ಮುಂಬಯಿ : ಸೆಂಟ್ರಲ್‌ ರೈಲ್ವೆಯಲ್ಲಿರುವ, ಸಂಪೂರ್ಣ ಮಹಿಳಾ ಸಿಬಂದಿಗಳನ್ನು ಹೊಂದಿರುವ, ಮಾಟುಂಗಾ ಹೊರವಲಯ ರೈಲ್ವೇ ಸ್ಟೇಶನ್‌ ಲಿಮ್ಕಾ ಬುಕ್‌ ಆಫ್ ರೆಕಾರ್ಡ್ಸ್‌ ಸೇರಿಕೊಂಡಿದೆ. 

ಸಂಪೂರ್ಣ ಮಹಿಳಾ ಸಿಬಂದಿಯಿಂದಲೇ ನಡೆಸಲ್ಪಡುತ್ತಿರುವ ಮಾಟುಂಗಾ ಸ್ಟೇಶನ್‌ ಈ ವಿಶಿಷ್ಟ ಅಸ್ಮಿತೆಯೊಂದಿಗೆ ಅಸ್ತಿತ್ವಕ್ಕೆ ಬಂದ ಆರು ತಿಂಗಳ ಬಳಿಕ ಲಿಮ್ಕಾ ಬುಕ್‌ ಆಫ್ ರೆಕಾರ್ಡ್‌ ಸೇರುವ ಸಾಧನೆ ಮಾಡಿದೆ.

ಈ ಸಾಧನೆಯ ಹಿರಿಮೆ ಸಂಪೂರ್ಣವಾಗಿ ಸಿಆರ್‌ ಜನರಲ್‌ ಮ್ಯಾನೇಜರ್‌ ಡಿ ಕೆ ಶರ್ಮಾ ಅವರಿಗೆ ಸಲ್ಲುತ್ತದೆ. ಏಕೆಂದರೆ ಮಾಟುಂಗಾ ರೈಲ್ವೇ ಸ್ಟೇಶನ್‌ ಅನ್ನು ದೇಶದ ಮೊದಲ ಸಂಪೂರ್ಣ ಮಹಿಳಾ ಸಿಬಂದಿ ರೈಲು ನಿಲ್ದಾಣವನ್ನಾಗಿ ಮಾಡುವ ದಿಟ್ಟ ನಿರ್ಧಾರವನ್ನು ಅವರು ಆರು ತಿಂಗಳ ಹಿಂದೆ ತಳೆದು ಯಶಸ್ವಿಯಾಗಿ ಅನುಷ್ಠಾನ ಮಾಡಿದ್ದರು ಎಂದು ಹಿರಿಯ ರೈಲ್ವೇ ಅಧಿಕಾರಿಯೊಬ್ಬರು ಹೇಳಿದ್ದಾರೆ.