ಪಂಚೆ, ಗಡ್ಡ, ಕಣ್ಣಿಗೆ ಕನ್ನಡಕ: ಚೆನ್ನೈ ಮಾರುಕಟ್ಟೆ ಹೇಡನ್‌!

ಚೆನ್ನೈ: ಒಂದು ಕಾಲದಲ್ಲಿ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದಲ್ಲಿ ಆಡಿ, ಚೆನ್ನೈನಲ್ಲಿ ಭಾರೀ ಅಭಿಮಾನಿ ಬಳಗ ಸಂಪಾದಿಸಿರುವ ಆಸ್ಟ್ರೇಲಿಯದ ಮಾಜಿ ಕ್ರಿಕೆಟಿಗ ಮ್ಯಾಥ್ಯೂ ಹೇಡನ್‌ ಈಗ ವೀಕ್ಷಕ ವಿವರಣೆಕಾರರಾಗಿ ಜನಪ್ರಿಯರಾಗಿದ್ದಾರೆ. ಅವರೀಗ ಚೆನ್ನೈನ ಮಾರುಕಟ್ಟೆಯಲ್ಲಿ ಮಾಡಿರುವ ವಿಶೇಷ ಸಾಹಸ, ಸಾಮಾಜಿಕ ತಾಣದಲ್ಲಿ ದೊಡ್ಡ ಸುದ್ದಿ.

ಐಪಿಎಲ್‌ನಲ್ಲೂ ವೀಕ್ಷಕ ವಿವರಣೆಕಾರರಾಗಿರುವ ಅವರಿಗೆ, ಗೆಳೆಯ ಶೇನ್‌ ವಾರ್ನ್ ಸವಾಲು ಒಡ್ಡಿ; ಚೆನ್ನೈಮಾರುಕಟ್ಟೆಯಲ್ಲಿ 1000 ರೂ.ಗಳೊಳಗೆ ವಸ್ತುಗಳನ್ನು ಖರೀದಿ ಮಾಡಲು ತಿಳಿಸಿದ್ದಾರೆ. ಅದನ್ನು ಸ್ವೀಕರಿಸಿದ ಹೇಡನ್‌, ತಮ್ಮ ವೇಷವನ್ನು ಪೂರ್ಣ ಬದಲಿಸಿಕೊಂಡು, ಟಿ ನಗರ್‌ ಸ್ಟ್ರೀಟ್‌ ಮಾಲ್‌ಗೆ ಪ್ರವೇಶ ಮಾಡಿದ್ದಾರೆ.

ಗಡ್ಡ ಧರಿಸಿಕೊಂಡು, ಕಣ್ಣಿಗೆ ಕನ್ನಡಕ ಹಾಕಿಕೊಂಡು, ಬಿಳಿ ಪಂಚೆ ಹಾಕಿಕೊಂಡು, ಒಂದು ಕೈಗಡಿಯಾರ ಕೊಳ್ಳಲು ಚರ್ಚೆ ನಡೆಸಿದ್ದಾರೆ. ಯಾರಿಗೂ ಗೊತ್ತಾಗದೇ ಯಶಸ್ವಿಯಾಗಿ ಹಿಂತಿರುಗಿದ್ದಾರೆ. ಘಟನೆ ಕೇಳಿ ಹೇಡನ್‌ ಅಭಿಮಾನಿಗಳೇನು ಅಚ್ಚರಿಪಟ್ಟಿಲ್ಲ, ಒಂದು ವೇಳೆ ನಾವು ಅಲ್ಲಿದ್ದರೆ ನಿಮ್ಮನ್ನು ಸಲೀಸಾಗಿ ಪತ್ತೆ ಹಚ್ಚುತ್ತಿದ್ದೆವು, ಅಷ್ಟು ಅಭಿಮಾನಿಗಳಿದ್ದಾರೆ ನಿಮಗೆ ಎಂದು ಕಾಲೆಳೆದಿದ್ದಾರೆ.