2020ರ ಡಿಸೆಂಬರ್: ಮಾರುತಿ ಸುಜುಕಿ ಇಂಡಿಯಾ ವಾಹನ ಮಾರಾಟದಲ್ಲಿ ಶೇ.20ರಷ್ಟು ಹೆಚ್ಚಳ

ನವದೆಹಲಿ:ದೇಶದ ಪ್ರಮುಖ ಕಾರು ತಯಾರಿಕಾ ಕಂಪನಿಯಾದ ಮಾರುತಿ ಸುಜುಕಿ ಇಂಡಿಯಾ 2020ರ ಡಿಸೆಂಬರ್ ತಿಂಗಳಲಿನಲ್ಲಿ ಒಟ್ಟಾರೆ ಶೇ.20ರಷ್ಟು ವಾಹನ ಮಾರಾಟದಲ್ಲಿ ಹೆಚ್ಚಳವಾಗಿರುವುದಾಗಿ ಶುಕ್ರವಾರ (ಜನವರಿ 01, 2021) ತಿಳಿಸಿದೆ.

ಮಾರುತಿ ಸುಜುಕಿ ಇಂಡಿಯಾ ಲಿಮಿಟೆಡ್ 2020ರ ಡಿಸೆಂಬರ್ ತಿಂಗಳಿನಲ್ಲಿ 160,226ರಷ್ಟು ವಾಹನ ಮಾರಾಟವಾಗಿರುವುದಾಗಿ ಹೇಳಿದೆ. 2020-2021ರ ತ್ರೈಮಾಸಿಕದಲ್ಲಿ ಒಟ್ಟು 4,95, 897 ವಾಹನ ಮಾರಾಟವಾಗಿದ್ದು, ಈ ಮೂಲಕ ಕಂಪನಿ ಕಳೆದ ವರ್ಷಕ್ಕಿಂತ ಶೇ.13.4ರಷ್ಟು ಮಾರಾಟದಲ್ಲಿ ಹೆಚ್ಚಳ ಕಂಡಿರುವುದಾಗಿ ವಿವರಿಸಿದೆ.

ದೇಶೀಯ ಮಾರುಕಟ್ಟೆಯಲ್ಲಿ ಒಟ್ಟು 1,46, 480 ವಾಹನ ಮಾರಾಟವಾಗಿದ್ದು, ಇತರ ಯೂನಿಟ್ಸ್ ಗಳಲ್ಲಿ 3,808 ವಾಹನ ಮಾರಾಟವಾಗಿದೆ. ಹೆಚ್ಚುವರಿಯಾಗಿ ಮಾರುತಿ ಸುಜುಕಿ ಇಂಡಿಯಾ ಕಂಪನಿ 9,938 ವಾಹನಗಳನ್ನು 2020ರ ಡಿಸೆಂಬರ್ ನಲ್ಲಿ ರಫ್ತು ಮಾಡಿರುವುದಾಗಿ ಪ್ರಕಟಣೆಯಲ್ಲಿ ತಿಳಿಸಿದೆ.

ವಾಹನ ಮಾರಾಟವಲ್ಲದೇ ದೇಶಾದ್ಯಂತ ಇರುವ ಕಂಪನಿಯ ಎಲ್ಲಾ ಸಿಬ್ಬಂದಿ ವರ್ಗ, ಉದ್ಯೋಗಿಗಳು, ನೌಕರರ ಸುರಕ್ಷತೆ ಉತ್ತಮವಾಗಿದೆ. ಇದರಲ್ಲಿ ಉದ್ಯೋಗಿಗಳ ಮತ್ತು ಗ್ರಾಹಕರಿಗೆ ಅನುಕೂಲವಾದ ಎಲ್ಲಾ ಅಗತ್ಯತೆಗಳನ್ನು ಪೂರೈಸಲಾಗುತ್ತಿದೆ ಎಂದು ಹೇಳಿದೆ.