ಸೆ.1 ರಿಂದ ಮಾರುತಿ ಕಾರುಗಳು ದುಬಾರಿ : ಕಂಪನಿಯಿಂದ ಸ್ಟಾಕ್‌ ಎಕ್ಸ್‌ಚೇಂಜ್‌ಗೆ ಲಿಖಿತ ಮಾಹಿತಿ

ಮುಂಬೈ: ದೇಶದ ಜನಪ್ರಿಯ ಕಾರು ಉತ್ಪಾದಕ ಕಂಪನಿ ಮಾರುತಿ ಸುಜುಕಿ ಇಂಡಿಯಾ ಸೆ.1ರಿಂದ ಎಲ್ಲಾ ಮಾದರಿಯ ಕಾರುಗಳ ಬೆಲೆ ಹೆಚ್ಚಳ ಮಾಡಲಿದೆ. ಪ್ರಸಕ್ತ ವರ್ಷದ ಜನವರಿ ಬಳಿಕ ಇದು ಮೂರನೇ ಏರಿಕೆಯಾಗಲಿದೆ.

ಈ ಬಗ್ಗೆ ಬಾಂಬೆ ಸ್ಟಾಕ್‌ ಎಕ್ಸ್‌ಚೇಂಜ್‌ಗೆ ಲಿಖಿತ ಮಾಹಿತಿ ನೀಡಿದ ಮಾರುತಿ ಸುಜುಕಿ ಹೆಚ್ಚುತ್ತಿರುವ ಉತ್ಪಾದನಾ ವೆಚ್ಚಗಳನ್ನು ಭರಿಸಬೇಕಾಗಿದೆ. ಹೀಗಾಗಿ, ಗ್ರಾಹಕರ ಮೇಲೆ ಕೊಂಚ ಹೊರೆ ವರ್ಗಾಯಿಸಬೇಕಾಗಿದೆ. ಅದಕ್ಕಾಗಿ ಮುಂದಿನ ತಿಂಗಳ 1ನೇ ತಾರೀಕಿನಿಂದ ಬೆಲೆ ಹೆಚ್ಚಳವಾಗಲಿದೆ ಎಂದು ಮಾರುತಿ ಸುಜುಕಿ ಇಂಡಿಯಾ ಹೇಳಿಕೆಯಲ್ಲಿ ತಿಳಿಸಿದೆ.

ದರ ಹೆಚ್ಚಳದ ಪ್ರಮಾಣದ ಬಗ್ಗೆ ಕಂಪನಿ ಉಲ್ಲೇಖೀಸಿಲ್ಲ. ಜನವರಿಯಲ್ಲಿ ಕೆಲವೊಂದು ಮಾಡೆಲ್‌ಗ‌ಳ ಕಾರುಗಳ ಮೇಲೆ 34 ಸಾವಿರ ರೂ.ಗಳ ವರೆಗೆ ಏರಿಕೆ ಮಾಡಿತ್ತು. ಏಪ್ರಿಲ್‌ನಲ್ಲಿ ಶೇ.1.6ರಷ್ಟು ಬೆಲೆ ಹೆಚ್ಚಳ ಮಾಡಲು ಕಂಪನಿ ನಿರ್ಧರಿಸಿತ್ತು. ಜುಲೈನಲ್ಲಿ ಮಹೀಂದ್ರಾ ಆ್ಯಂಡ್‌ ಮಹೀಂದ್ರಾ 1 ಲಕ್ಷ ರೂ.ವರೆಗೆ, ಈ ತಿಂಗಳ ಆರಂಭದಲ್ಲಿ ಟಾಟಾ ಮೋಟರ್ಸ್‌ ಕಾರುಗಳ ಬೆಲೆಯನ್ನು 36 ಸಾವಿರ ರೂ. ವರೆಗೆ ಹೆಚ್ಚಳ ಮಾಡಿದ್ದವು.

ಇದನ್ನೂ ಓದಿ :ಬೆಳಗಾವಿ: ತಲೆಗೆ ಗುಂಡು ಹಾರಿಸಿಕೊಂಡು ಏರ್‌ ಮ್ಯಾನ್ ಆತ್ಮಹತ್ಯೆ