ದಿನಪೂರ್ತಿ ಎದ್ದು ಬಿದ್ದ ಮುಂಬಯಿ ಶೇರು 30 ಅಂಕ ಅಲ್ಪ ಮುನ್ನಡೆ

ಮುಂಬಯಿ : ದಿನಪೂರ್ತಿ ಏರಿಳಿತಗಳನ್ನು ಕಾಣುತ್ತಾ ಎದ್ದು ಬಿದ್ದು ಸಾಗಿದ ಮುಂಬಯಿ ಶೇರು ಸೆನ್ಸೆಕ್ಸ್‌ ಸೂಚ್ಯಂಕ ಇಂದು ಶುಕ್ರವಾರದ ವಹಿವಾಟನ್ನು 30.17 ಅಂಕಗಳ ಅಲ್ಪ ಮುನ್ನಡೆಯನ್ನು ಕಾಯ್ದುಕೊಂಡು 33,626.51 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು.

ಕಳೆದ ಹಣಕಾಸು ವರ್ಷದ ನಾಲ್ಕನೇ ತ್ತೈಮಾಸಿಕ ಹಾಗೂ ವಾರ್ಷಿಕ ಫ‌ಲಿತಾಂಶಗಳು ಈಗಿನ್ನು ಪ್ರಕಟಗೊಳ್ಳಲಿದ್ದು ಹೂಡಿಕೆದಾರರು ಮತ್ತು ವಹಿವಾಟುದಾರರು ಈಗಲೇ ಎಚ್ಚರಿಕೆಯ ನಡೆ ತೋರಿರುವುದು ಇಂದಿನ ವಹಿವಾಟಿನಲ್ಲಿ ಸ್ಪಷ್ಟವಾಗಿತ್ತು. ಇಂದು ಕೊನೇ ಕ್ಷಣದಲ್ಲಿ ಕಂಡು ಬಂದ ಖರೀದಿಯ ಬಲದಲ್ಲಿ ಫಾರ್ಮಾ, ಇಂಧನ ಮತ್ತು ಬ್ಯಾಂಕ್‌ ಶೇರುಗಳು ಸೆನ್ಸೆಕ್ಸ್‌ ಮುಗ್ಗರಿಸದಂತೆ ನೋಡಿಕೊಂಡವು. 

ನಿನ್ನೆ ಗುರುವಾರದ ವಹಿವಾಟಿನಲ್ಲಿ ಸೆನ್ಸೆಕ್ಸ್‌ 578 ಅಂಕಗಳ ಅದ್ಭುತ ಜಿಗಿತವನ್ನು ದಾಖಲಿಸಿತ್ತು. 

ರಾಷ್ಟ್ರೀಯ ಶೇರು ಪೇಟೆ ನಿಫ್ಟಿ ಸೂಚ್ಯಂಕ ಇಂದು ಕೇವಲ 6.45 ಅಂಕಗಳ ಮುನ್ನಡೆಯನ್ನು ಕಂಡು ದಿನದ ವಹಿವಾಟನ್ನು 10,331.60 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು. 

ಸಾಪ್ತಾಹಿಕ ನೆಲೆಯಲ್ಲಿ ಹೇಳುವುದಾದರೆ ಸೆನ್ಸೆಕ್ಸ್‌ ಈ ವಾರ ಒಟ್ಟು 658.20 ಅಂಕಗಳನ್ನು ಸಂಪಾದಿಸಿದೆ; ನಿಫ್ಟಿ 217.90 ಅಂಕಗಳನ್ನು ಸಂಪಾದಿಸಿದೆ.

ನಿನ್ನೆ ಗುರುವಾರ ದೇಶೀಯ ಸಾಂಸ್ಥಿಕ ಹೂಡಿಕೆದಾರರು 615.28 ಕೋಟಿ ರೂ.ಗಳ ಶೇರುಗಳನ್ನು ಖರೀದಿಸಿದ್ದವು. ಇದಕ್ಕೆ  ವ್ಯತಿರಿಕ್ತವಾಗಿ ವಿದೇಶೀ ಹೂಡಿಕೆದಾರರು 108.02 ಕೋಟಿ ರೂ. ಮೌಲ್ಯದ ಶೇರುಗಳನ್ನು ಮಾರಾಟ ಮಾಡಿದ್ದರು.