ನಿರ್ದೇಶಕ ಗುರುದೇಶಪಾಂಡೆ ಅವರ ಬ್ಯಾನರ್‌ನಲ್ಲಿ ಅಜೇಯ್‌ರಾವ್ ಅವರು ಹೊಸದೊಂದು ಚಿತ್ರದಲ್ಲಿ ನಟಿಸುತ್ತಿದ್ದಾರೆ ಎಂದು ಈ ಹಿಂದೆ ಇದೇ “ಬಾಲ್ಕನಿ’ಯಲ್ಲಿ ಸುದ್ದಿಯಾಗಿತ್ತು. ಆಗ ಆ ಚಿತ್ರಕ್ಕೆ ಶೀರ್ಷಿಕೆ ಪಕ್ಕಾ ಆಗಿರಲಿಲ್ಲ. ಅಷ್ಟೇ ಅಲ್ಲ, ನಾಯಕಿ ಯಾರೆಂಬುದೂ ಪಕ್ಕಾ ಆಗಿರಲಿಲ್ಲ. ಈಗ ಚಿತ್ರಕ್ಕೆ ಶೀರ್ಷಿಕೆ ಮತ್ತು ನಾಯಕಿ ಎರಡೂ ಪಕ್ಕಾ ಆಗಿದೆ. ಹೌದು, ಅಜೇಯ್‌ರಾವ್ ಅಭಿನಯದ ಹೊಸ ಚಿತ್ರಕ್ಕೆ ‘ರೈನ್‌ಬೊ’ ಎಂದು ನಾಮಕರಣ ಮಾಡಲಾಗಿದೆ.
ಈ ಚಿತ್ರದಲ್ಲಿ ಅಜೇಯ್‌ರಾವ್ ಅವರಿಗೆ ಜೋಡಿಯಾಗಿ ಮಾನ್ವಿತಾ ಕಾಮತ್ ಕಾಣಿಸಿಕೊಳ್ಳುತ್ತಿದ್ದಾರೆ. ಇನ್ನು, ಈ ಚಿತ್ರವನ್ನು ರಾಜವರ್ಧನ್ ನಿರ್ದೇಶನ ಮಾಡುತ್ತಿದ್ದಾರೆ. ಇದು ಅವರಿಗೆ ಮೊದಲ ಸಿನಿಮಾ. ರಾಜವರ್ಧನ್ ಅವರು ಈ ಹಿಂದೆ ಗುರುದೇಶಪಾಂಡೆ ಅವರ ಚಿತ್ರಗಳಲ್ಲಿ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದರು. ಆ ಅನುಭವದ ಮೇಲೆಯೇ, ಗುರುದೇಶಪಾಂಡೆ ಅವರು, ಅಜೇಯ್‌ರಾವ್ ಚಿತ್ರ ನಿರ್ದೇಶನ ಮಾಡಲು ಅವಕಾಶ ಕಲ್ಪಿಸಿಕೊಟ್ಟಿದ್ದಾರೆ.
ಇನ್ನು, ಚಿತ್ರದಲ್ಲಿ ನಾಯಕಿಯಾಗಿರು ಮಾನ್ವಿತಾ ಕಾಮತ್ ಅವರಿಗೆ ಅಜೇಯ್‌ರಾವ್ ಅವರೊಂದಿಗೆ ಮೊದಲ ಚಿತ್ರ. ಹಾಗೆಯೇ ಗುರುದೇಶಪಾಂಡೆ ಅವರ ಬ್ಯಾನರ್‌ನಲ್ಲೂ ಮೊದಲ ಚಿತ್ರ. ಸದ್ಯಕ್ಕೆ ಮಾನ್ವಿತಾ ಕಾಮತ್ ಅವರು ಅಭಿನಯಿಸಿರುವ “ಇಂಡಿಯಾ ವರ್ಸಸ್ ಇಂಗ್ಲೆಂಡ್’, “ದಾರಿ ತಪ್ಪಿದ ಮಗ’ ಚಿತ್ರಗಳು ಬಿಡುಗಡೆಯಾಗಬೇಕಿದೆ. ನಾಗತಿಹಳ್ಳಿ ಚಂದ್ರಶೇಖರ್ ನಿರ್ದೇಶನದ “ಇಂಡಿಯಾ ವರ್ಸಸ್ ಇಂಗ್ಲೆಂಡ್’ ಚಿತ್ರದಲ್ಲಿ ವಸಿಷ್ಠ ಸಿಂಹ ಜೋಡಿಯಾಗಿದ್ದಾರೆ. ಇನ್ನು, “ದಾರಿ ತಪ್ಪಿದ ಮಗ’ ಚಿತ್ರದಲ್ಲಿ ನಟ ರಾಮ್‌ಕುಮಾರ್ ಪುತ್ರ ಧೀರನ್ ಅವರಿಗೆ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ.
ಇದರ ನಡುವೆಯೇ ಮಾನ್ವಿತಾ ಅವರು ಮರಾಠಿ ಚಿತ್ರದಲ್ಲೂ ನಟಿಸಿದ್ದಾರೆ. ಈಗ ಅಜೇಯ್‌ರಾವ್ ಜೊತೆ ಮೊದಲ ಕಾಂಬಿನೇಷನ್ ಚಿತ್ರದಲ್ಲಿ ನಟಿಸಲು ಅಣಿಯಾಗಿದ್ದಾರೆ. ಅಜೇಯ್‌ರಾವ್, ಸದ್ಯಕ್ಕೆ “ಕೃಷ್ಣ ಟಾಕೀಸ್’ ಚಿತ್ರದಲ್ಲಿ ಬಿಝಿ. ಈಗ “ರೈನ್‌ಬೋ’ ಚಿತ್ರ ಒಪ್ಪಿದ್ದಾರೆ. ಈ ಮಧ್ಯೆ ಅವರು “ಅಯೋಗ್ಯ’ ಚಿತ್ರದ ನಿರ್ಮಾಪಕ ಚಂದ್ರಶೇಖರ್ ಅವರ ಚಿತ್ರದಲ್ಲೂ ಅಜೇಯ್‌ರಾವ್ ನಟಿಸುತ್ತಿದ್ದಾರೆ. ಸದ್ಯಕ್ಕೆ “ರೈನ್‌ಬೋ’ ಚಿತ್ರದ ಕೆಲಸಗಳು ಜೋರಾಗಿ ನಡೆಯುತ್ತಿದ್ದು, ಆ.9ರ ವರಮಹಾಲಕ್ಷ್ಮೀ ಹಬ್ಬದಂದು ಚಿತ್ರಕ್ಕೆ ಮುಹೂರ್ತ ನೆರವೇರಲಿದೆ.
