ಮಾನ್ವಿ:ಕೊಡಲಿಯಿಂದ ಕಡಿದು ತಮ್ಮನಿಂದ ಅಣ್ಣನ ಬರ್ಬರ ಹತ್ಯೆ

ಮಾನ್ವಿ: ಪಟ್ಟಣದ ಸೋನಿಯಗಾಂಧಿ ನಗರದಲ್ಲಿ ತಮ್ಮನಿಂದ ಅಣ್ಣನ ಕೊಲೆಯಾಗಿದ್ದು ಮಾನ್ವಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಶಿವಕುಮಾರರವರು ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಕೃತ್ಯ ನಡೆದ ಬಗ್ಗೆ ಪರಿಶೀಲನೆ ನಡೆಸಿ ಆರೋಪಿಯನ್ನು ಬಂಧಿಸುವುದಕ್ಕೆ ಮಾರ್ಗದರ್ಶನ ಮಾಡಿದರು.

ಪಿಎಸ್ ಐ ವೆಂಕಟೇಶ ಘಟನೆಯ ಬಗ್ಗೆ ಮಾಹಿತಿ ನೀಡಿ, ಪಟ್ಟಣದ ಚೀಕಲಪರ್ವಿ ರಸ್ತೆಯಲ್ಲಿನ ಸೋನಿಯಾ ಗಾಂಧಿ ನಗರದ ನಿವಾಸಿ ಪರೀಕ್ಷಿತ್‌ ರಾಜು ಎ.(26) ಕೊಲೆಯಾಗಿದ್ದು, ತಮ್ಮ ಭೀಮಶಂಕರ ತಮ್ಮ ಮನೆಯಲ್ಲಿಯೇ ಕೊಡಲಿಯಿಂದ ಅಣ್ಣನ ಕುತ್ತಿಗೆಗೆ ಹೊಡೆದು ಕೊಲೆಮಾಡಿದ್ದಾನೆ.

ಹತ್ಯೆಗೀಡಾದವ ಪ್ರತಿದಿನ ಮದ್ಯ ಪಾನ ಮಾಡಿ ಮನೆಯವರಿಗೆ ಕಿರುಕುಳ ನೀಡುತ್ತಿದ್ದಿದ್ದರಿಂದ ಬೇಸತ್ತು ತಮ್ಮನಿಂದ ಅಣ್ಣನ ಕೊಲೆ ನಡೆದಿದ್ದು, ಕೃತ್ಯ ನಡೆದ ಕೆಲವೇ ಸಮಯದಲ್ಲಿ ಆರೋಪಿಯನ್ನು ಪತ್ತೆ ಹಚ್ಚಿ ಬಂಧಿಸಲಾಗಿದೆ. ಠಾಣೆಯಲ್ಲಿ ಪ್ರಕರಣವನ್ನು ದಾಖಲಿಸಿ ಪಿಐ ಮಹಾದೇವಪ್ಪ ಪಂಚಮುಖಿ ಮಾರ್ಗದರ್ಶನದಲ್ಲಿ ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ ಎಂದು ಮಾಹಿತಿ ನೀಡಿದರು.