ಮಣಿಪಾಲ: ಅಗ್ನಿಶಾಮಕ ಠಾಣೆಗೆ ಸಿಗದ ಮಂಜೂರಾತಿ 

ಉಡುಪಿ: ಮಣಿಪಾಲದಲ್ಲಿ ಕಟ್ಟಡಗಳ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಇದೆ. ಕೈಗಾರಿಕಾ ಪ್ರದೇಶವೂ ಇದ್ದು, ಕಾರ್ಖಾನೆಗಳೂ ಇವೆ. ಇಲ್ಲೇನಾದರೂ ಅಗ್ನಿ ದುರಂತ ಸಂಭವಿಸಿದರೆ, ತುರ್ತಾಗಿ ಸ್ಪಂದಿಸಬೇಕಾದ ಅಗ್ನಿಶಾಮಕ ಠಾಣೆ ಮಾತ್ರ ಇಲ್ಲಿಲ್ಲ.  

ಜಾಗ ಮೀಸಲು, ಆದರೆ ಮಂಜೂರಾತಿ ಇಲ್ಲ
ಮಣಿಪಾಲದ ಎಂಜೆಸಿ ಕಾಲೇಜಿನ ಮುಂಭಾಗದಲ್ಲಿ 1 ಎಕ್ರೆ ಜಾಗವನ್ನು ಅಗ್ನಿಶಾಮಕ ಠಾಣೆಗಾಗಿಯೇ ಕಾಯ್ದಿರಿಸಲಾಗಿದೆ. ಅಗ್ನಿಶಾಮಕ ಇಲಾಖೆಯಿಂದಲೂ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಕೆಯಾಗಿದೆ. ಆದರೆ ಸರಕಾರದಿಂದ ಮಂಜೂರಾತಿ ಮಾತ್ರ ಆಗಿಲ್ಲ. ಮಣಿಪಾಲಕ್ಕೆ ಅಗತ್ಯವಿದ್ದರೆ, 8 ಕಿ.ಮೀ. ದೂರದ ಕಿನ್ನಿಮೂಲ್ಕಿಯಿಂದಲೇ ಅಗ್ನಿಶಾಮಕ ವಾಹನಗಳು ಬರಬೇಕಿದೆ. ಅಷ್ಟೊತ್ತಿಗೆ ಸಮಯ ಮೀರಿರುತ್ತದೆ. ಇತ್ತೀಚೆಗೆ ಈಶ್ವರ ನಗರದಲ್ಲಿ ಸಂಭವಿಸಿದ ದುರಂತ ವೇಳೆಯೂ ಹೀಗೆಯೇ ಆಗಿತ್ತು. 

ಮಾ. 20ರಂದು ರಾಹುಲ್‌ ಗಾಂಧಿ ಅವರ ಭೇಟಿಯ ಸ್ಥಳಗಳಿಗೆ, ಎರ್ಮಾಳಿಗೆ ಅಗ್ನಿಶಾಮಕ ವಾಹನ ಕಳುಹಿಸಿ ಕೊಡಲಾಗಿತ್ತು. ಹೀಗಿದ್ದರೂ ತುರ್ತು ಸಂದರ್ಭಕ್ಕೆ ಉಡುಪಿ ಠಾಣೆಯಲ್ಲಿ ವಾಹನವಿತ್ತು. ಕರೆ ಬಂದ ಕೂಡಲೇ ಅದನ್ನು ಕಳುಹಿಸಿಕೊಡಲಾಗಿತ್ತು. ಜೊತೆಗೆ ಕಾರ್ಕಳ ಹಾಗೂ ಪಡುಬಿದ್ರಿಯಲ್ಲಿದ್ದ ವಾಹನವನ್ನೂ ಘಟನಾ ಸ್ಥಳಕ್ಕೆ ಕರೆಸಿಕೊಳ್ಳಲಾಗಿತ್ತು ಎಂದು ಅಗ್ನಿಶಾಮಕ ಅಧಿಕಾರಿ ಸ್ಪಷ್ಟಪಡಿಸಿದ್ದಾರೆ.

ತಡವಾದರೂ,ಕ್ಷಿಪ್ರ ಕಾರ್ಯ
ಈಶ್ವರ ನಗರ ಘಟನೆ ಸಂದರ್ಭ 11.30ಕ್ಕೆ ಅಗ್ನಿಶಾಮಕ ಠಾಣೆಗೆ ಮೊದಲ ಕರೆ ಬಂದಿತ್ತು. ಸ್ಥಳಕ್ಕೆ ತಲುಪಿದ ಮೊದಲ 10-15 ನಿಮಿಷದಲ್ಲಿ ಬೆಂಕಿಯನ್ನು ತಹಬಂದಿಗೆ ತರಲಾಗಿತ್ತು. ಆದರೂ ಹೊಗೆ ಹೋಗಲಾಡಿಸಲು ಸ್ವಲ್ಪ ಸಮಯ ತಗುಲಿತು. ಕಿನ್ನಿಮೂಲ್ಕಿಯಿಂದ ಈಶ್ವರನಗರಕ್ಕೆ ತೆರಳಬೇಕಾದರೆ 15ರಿಂದ 20 ನಿಮಿಷ ಬೇಕು. ಸಂಚಾರದ ವೇಳೆ ವಾಹನಗಳು ಅಡ್ಡ ಬಂದರೆ ನಿಧಾನವಾಗುತ್ತದೆ. ತುರ್ತಾಗಿ ಹಾಜರಿದ್ದರೂ ಅಷ್ಟರಲ್ಲೇ ಠಾಣೆಗೆ 20 ಕರೆ ಬಂದಿತ್ತು ಎಂದು ಉಡುಪಿ ಅಗ್ನಿಶಾಮಕ ಅಧಿಕಾರಿ ವಸಂತ ಕುಮಾರ್‌ ಎಚ್‌.ಎಂ. ಅವರು ಹೇಳಿದ್ದಾರೆ.