Mangaluru ಜೋಡಿಗೆ ತಡೆ: ಮೂವರ ಸೆರೆ

ಮಂಗಳೂರು: ವಿಭಿನ್ನ ಕೋಮುಗಳಿಗೆ ಸೇರಿದವರೆನ್ನಲಾದ ಯುವಕ ಮತ್ತು ಯುವತಿಯನ್ನು ತಡೆದು ನಿಲ್ಲಿಸಿದ ಘಟನೆಗೆ ಸಂಬಂಧಿಸಿದಂತೆ ಮಂಗಳೂರು ಪೊಲೀಸರು ಮೂವರನ್ನು ಬಂಧಿಸಿದ್ದಾರೆ.

ಬಂಟ್ವಾಳದ ಸಂದೇಶ್‌ (28) ಹಾಗೂ ಆತನ ಗೆಳೆಯರಾದ ಪ್ರಶಾಂತ್‌ (31) ಮತ್ತು ರೋನಿತ್‌ (31) ಬಂಧಿತರು. ಕೇರಳ ನಿವಾಸಿಗಳಾದ ಯುವಕ ಮತ್ತು ಯುವತಿ ಗುರುವಾರ ಮಧ್ಯಾಹ್ನ 1 ಗಂಟೆಯ ಸುಮಾರಿಗೆ ನಗರದ ಹಂಪನಕಟ್ಟೆಯ ಬಳಿ ಜತೆಯಾಗಿ ಹೋಗುತ್ತಿದ್ದಾಗ ಆರೋಪಿಗಳಲ್ಲಿ ಓರ್ವನಾದ ಸಂದೇಶ್‌ ಅವರಲ್ಲಿ ಗುರುತಿನ ಚೀಟಿಯನ್ನು ಕೇಳುತ್ತಿದ್ದ. ಆಗ ಅವರು ಆಟೋರಿಕ್ಷಾವೇರಿದರು.

ಆಟೋರಿಕ್ಷಾವನ್ನು ತಡೆದ ಸಂದೇಶ್‌ ಆಟೋರಿಕ್ಷಾ ಚಾಲಕನನ್ನು ಹೆದರಿಸಿದ್ದ. ಈ ಸಂದರ್ಭದಲ್ಲಿ ಸಾರ್ವಜನಿಕರು ಮಧ್ಯಪ್ರವೇಶಿಸಿ ಅಲ್ಲಿಂದ ಎಲ್ಲರನ್ನು ಕಳುಹಿಸಿದರು. ಘಟನೆ ವೇಳೆ ಪ್ರಶಾಂತ್‌ ಮತ್ತು ರೋನಿತ್‌ ಕೂಡ ಸಂದೇಶ್‌ ಜತೆಯಲ್ಲಿದ್ದರು.

ಆಟೋ ರಿಕ್ಷಾ ಚಾಲಕ ನೀಡಿರುವ ದೂರಿನಂತೆ ಮಂಗಳೂರು ಉತ್ತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.