Udupi ಶಂಕಿತ ಇಲಿ ಜ್ವರದಿಂದ ಪರ್ಕಳ ನಿವಾಸಿ ಸಾವು

ಉಡುಪಿ: ಇಲ್ಲಿನ ಪರ್ಕಳ ನಿವಾಸಿಯೊಬ್ಬರು ಶಂಕಿತ ಇಲಿಜ್ವರದಿಂದ ಸಾವನ್ನಪ್ಪಿದ್ದಾರೆ ಎಂದು ತಿಳಿದುಬಂದಿದೆ.

ಜ್ವರಕ್ಕಾಗಿ ಮಣಿಪಾಲದ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದ ಅವರು ಆ. 6ರ ರಾತ್ರಿ ಮೃತಪಟ್ಟಿದ್ದಾರೆ.ವೈದ್ಯರು ನೀಡಿರುವ ವರದಿಯಂತೆ ಅವರು ಶಂಕಿತ ಇಲಿಜ್ವರ ಸಹಿತ ವಿವಿಧ ಕಾರಣಗಳಿಂದ ಮೃತಪಟ್ಟಿದ್ದಾರೆ ಎನ್ನಲಾಗಿದೆ.

ಮಳೆಗಾಲದಲ್ಲಿ ಕರಾವಳಿ ಭಾಗದಲ್ಲಿ ಇಲಿಗಳ ಮಲಮೂತ್ರಗಳ ಮೂಲಕ ವ್ಯಾಪಕವಾಗಿ ಹರಡುವ ಇಲಿಜ್ವರಕ್ಕೆ ಕಳೆದ ಜನವರಿಯಿಂದ ಇದುವರೆಗೆ ಮೂವರು ಸಾವನ್ನಪ್ಪಿದ್ದಾರೆ.

ಜನವರಿಯಲ್ಲಿ ನಿಟ್ಟೂರಿನ ಶಾಲಾ ಬಾಲಕನ ಬಳಿಕ ಸಿದ್ಧಾಪುರ ಪ್ರಾಥಮಿಕ ಆರೋಗ್ಯ ಕೇಂದ್ರ ವ್ಯಾಪ್ತಿಯಲ್ಲಿ ವೃದ್ಧರು ಹಾಗೂ ಸಾಯಬರಕಟ್ಟೆಯಲ್ಲಿ ಪುರುಷರೊಬ್ಬರು ರೋಗಕ್ಕೆ ಬಲಿಯಾಗಿದ್ದಾರೆ. ಜಿಲ್ಲೆಯಲ್ಲಿ ಈವರೆಗೆ ಇಲಿಜ್ವರದ 149 ವರದಿಯಾಗಿದೆ ಎಂದು ಜಿಲ್ಲಾ ಸರ್ವೇಕ್ಷಣಾಧಿಕಾರಿ ಡಾ| ನಾಗರತ್ನಾ ತಿಳಿಸಿದ್ದಾರೆ.