ಮಲೇಷ್ಯಾ ಓಪನ್‌ ಬ್ಯಾಡ್ಮಿಂಟನ್‌: ಸಾತ್ವಿಕ್‌-ಚಿರಾಗ್‌ ಶೆಟ್ಟಿ ಸೆಮಿಫೈನಲ್‌ ಪ್ರವೇಶ

ಕೌಲಾಲಂಪುರ: “ಮಲೇಷ್ಯಾ ಓಪನ್‌ ಬ್ಯಾಡ್ಮಿಂಟನ್‌’ ಪಂದ್ಯಾವಳಿಯಲ್ಲಿ ಶುಕ್ರವಾರ ಭಾರತ ಮಿಶ್ರ ಫ‌ಲಿತಾಂಶ ದಾಖಲಿಸಿದೆ.

ಪುರುಷರ ಡಬಲ್ಸ್‌ನಲ್ಲಿ ಚಿರಾಗ್‌ ಶೆಟ್ಟಿ-ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ ಜೋಡಿ ಸೆಮಿಫೈನಲ್‌ ಪ್ರವೇಶಿಸಿದರೆ, ಪುರುಷರ ಸಿಂಗಲ್ಸ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ಎಚ್‌.ಎಸ್‌. ಪ್ರಣಯ್‌ ಪರಾಭವಗೊಂಡರು.

ಚಿರಾಗ್‌-ಸಾತ್ವಿಕ್‌ ಸೇರಿಕೊಂಡು ಬಿ.ಡಬ್ಲ್ಯು.ಎಫ್. ವರ್ಲ್ಡ್ ಟೂರ್‌ ಫೈನಲ್ಸ್‌ ಚಾಂಪಿಯನ್‌ಗಳಾದ ಚೀನದ ಲಿಯು ಯು ಚೆನ್‌-ಒಯು ಕ್ಸುವಾನ್‌ ಯಿ ಅವರನ್ನು 17-21, 22-20, 21-9 ಅಂತರದಿಂದ ಬಗ್ಗುಬಡಿದರು.

ಆಟ ಮುಗಿಸಿದ ಪ್ರಣಯ್‌
ಸಿಂಗಲ್ಸ್‌ ಕ್ವಾರ್ಟರ್‌ ಫೈನಲ್‌ನಲ್ಲಿ ಜಪಾನ್‌ನ ವಿಶ್ವದ 7ನೇ ರ್‍ಯಾಂಕಿಂಗ್‌ ಆಟಗಾರ ಕೊಡೈ ನರವೋಕ ವಿರುದ್ಧ 84 ನಿಮಿಷಗಳ ಕಾಲ ಹೋರಾಟ ನಡೆಸಿದ ಪ್ರಣಯ್‌, ಅಂತಿಮವಾಗಿ 16-21, 21-19, 10-21 ಅಂತರದಿಂದ ಸೋತರು.
ಇದರೊಂದಿಗೆ ಪ್ರಣಯ್‌ ವಿರುದ್ಧ ಆಡಿದ ಮೂರೂ ಪಂದ್ಯಗಳಲ್ಲಿ ನರವೋಕ ಗೆದ್ದಂತಾಯಿತು.