ಕುಂದಾಪುರ: ತಮಿಳುನಾಡಿನ ವೆಲಂಕಣಿಯಲ್ಲಿರುವ ಚರ್ಚ್‌ಗೆ ತೆರಳಲು ಅನುಕೂಲವಾಗುವಂತೆ ಮಡಗಾಂವ್‌ – ವೆಲಂಕಣಿ ನಡುವೆ ಸೆ. 6ಕ್ಕೆ ವಿಶೇಷ ರೈಲು (01007/01008) ಸಂಚರಿಸಲಿದೆ.
ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಅವರ ಮನವಿ ಮೇರೆಗೆ ಕೊಂಕಣ ರೈಲ್ವೇ ಈ ಆದೇಶ ಹೊರಡಿಸಿದೆ.
ರೈಲು ಸೆ. 6ರ ಮಧ್ಯಾಹ್ನ 12.30ಕ್ಕೆ ಮಡಗಾಂವ್‌ನಿಂದ ಹೊರಡಲಿದ್ದು, 3.36ಕ್ಕೆ ಬೈಂದೂರು, 4.18ಕ್ಕೆ ಕುಂದಾಪುರ, 4.42ಕ್ಕೆ ಉಡುಪಿ, 5.30ಕ್ಕೆ ಸುರತ್ಕಲ್‌, ಸಂಜೆ 6ಕ್ಕೆ ಮಂಗಳೂರು ಜಂಕ್ಷನ್‌ ಆಗಿ ಕಾಸರಗೋಡು, ಪಯ್ಯನ್ನೂರು ಮೂಲಕ ರಾತ್ರಿ 11.14ಕ್ಕೆ ತಿರೂರು ನಿಲ್ದಾಣ, ಸೆ.7ರ ಬೆಳಗ್ಗೆ 8.28ಕ್ಕೆ ತಿರುಚಿರಪಳ್ಳಿ, ಮಧ್ಯಾಹ್ನ 12.25ಕ್ಕೆ ವೆಲಂಕಣಿ ತಲುಪಲಿದೆ.
ಸೆ. 7ರ ರಾತ್ರಿ 11.55ಕ್ಕೆ ವೆಲಂಕಣಿಯಿಂದ ಹೊರಟು ಮಂಗಳೂರು, ಉಡುಪಿ, ಕುಂದಾಪುರ, ಕಾರವಾರ ಮೂಲಕ ಮಡಗಾಂವ್‌ಗೆ ಸಂಚರಿಸಲಿದೆ.
ಈ ರೈಲು ಸಂಚಾರ ಆರಂಭದಿಂದ ಕರಾವಳಿ ಭಾಗದ ಕ್ರೈಸ್ತರಿಗೆ ವೆಲಂಕಣಿಯ ವಾರ್ಷಿಕ ಹಬ್ಬಕ್ಕೆ ತೆರಳಲು ಅನುಕೂಲವಾಗಲಿದೆ. ಅನೇಕ ಸಮಯಗಳಿಂದ ಮಡಗಾಂವ್‌ – ವೆಲಂಕಣಿ ಮಧ್ಯೆ ರೈಲು ಸಂಚಾರ ಆರಂಭಕ್ಕೆ ಬೇಡಿಕೆ ಇದ್ದು, ಇದಕ್ಕೆ ಸ್ಪಂದಿಸಿದ ಸಂಸದರಿಗೆ ಕುಂದಾಪುರ ಭಾಗದ ಕ್ರೈಸ್ತರು ಹಾಗೂ ಕುಂದಾಪುರ ರೈಲು ಪ್ರಯಾಣಿಕರ ಹಿತರಕ್ಷಣ ಸಮಿತಿ ಕೃತಜ್ಞತೆ ಸಲ್ಲಿಸಿದೆ.
