ಬದಲಾಯ್ತು ‘ಧೋನಿ’ ಹೇರ್ ಸ್ಟೈಲ್!

ಭಾರತಕ್ಕೆ ಟಿ20 ಮತ್ತು ಏಕದಿನ ವಿಶ್ವಕಪ್ ಗೆದ್ದುಕೊಟ್ಟ ಯಶಸ್ವೀ ನಾಯಕರಲ್ಲೊಬ್ಬರಾಗಿರುವ ಮತ್ತು ವಿಶ್ವದ ಅತ್ಯುತ್ತಮ ಫಿನಿಶರ್ ಗಳಲ್ಲಿ ಒಬ್ಬರಾಗಿರುವ ಮಹೇಂದ್ರ ಸಿಂಗ್ ಧೋನಿ ಅವರು ‘ಯೂತ್ ಐಕಾನ್’ ಸಹ ಆಗಿದ್ದಾರೆ. ಅವರ ಕೇಶವಿನ್ಯಾಸ, ಬೈಕ್ ಕ್ರೇಝ್, ಕೂಲ್ ನೇಚರ್ ಎಲ್ಲವೂ ಸಹ ಯುವ ಜನಾಂಗದ ಆಕರ್ಷಣೆಯ ವಸ್ತುವಾಗಿದೆ.

ಅಂತಾರಾಷ್ಟ್ರೀಯ ಕ್ರಿಕೆಟ್ ಗೆ ಕಾಲಿಟ್ಟಾಗಿನಿಂದ ಎಂ.ಎಸ್.ಧೋನಿ ಅವರು ವಿವಿಧ ಕೆಶವಿನ್ಯಾಸಗಳಿಂದ ಗಮನ ಸೆಳೆಯುತ್ತಲೇ ಬಂದಿದ್ದಾರೆ. ಇದೀಗ ಅವರ ಅಂತಾರಾಷ್ಟ್ರೀಯ ಕ್ರಿಕೆಟ್ ಜೀವನಕ್ಕೆ ಹತ್ತು ವರ್ಷಗಳಾಗುತ್ತಾ ಬಂದಿದ್ದರೂ ಇಂದಿಗೂ 37 ವರ್ಷ ಪ್ರಾಯದ ಧೋನಿ ಅವರ ಕೇಶ ವಿನ್ಯಾಸ ಅವರ ಅಭಿಮಾನಿಗಳಿಗೆ ಕುತೂಹಲದ ವಿಷಯವಾಗಿರುತ್ತದೆ. ಇದೀಗ ಆಸ್ಟ್ರೇಲಿಯಾ ಕ್ರಿಕೆಟ್ ತಂಡ ಭಾರತ ಪ್ರವಾಸ ಕೈಗೊಳ್ಳಲು ಸಿದ್ಧವಾಗಿರುವಂತೆ ಇತ್ತ ಧೋನಿ ಅವರ ಕೇಶ ವಿನ್ಯಾಸವೂ ಸಹ ಬದಲಾಗಿದೆ. ಎರಡೂ ಬದಿಗಳಲ್ಲಿ ಫುಲ್ ಟ್ರಿಮ್ ಆಗಿರುವಂತೆ ಮೇಲ್ಭಾಗದಲ್ಲಿ ಸಣ್ಣ ಸ್ಪೈಕ್ ಇರುವಂತಹ ಫ್ರೆಶ್ ಕೇಶವಿನ್ಯಾಸದಲ್ಲಿ ಇದೀಗ ಧೋನಿ ಅವರು ತುಂಬಾ ಮೆಚ್ಯೂರ್ಡ್ ಆಗಿ ಕಾಣಿಸುತ್ತಿದ್ದಾರೆ. ಕೂಲ್ ಕಪ್ತಾನನ ಈ ಹೊಸ ಕೇಶವಿನ್ಯಾಸ ಮಾದರಿಯನ್ನು ಅವರ ಗೆಳತಿ ಮತ್ತು ಕೇಶವಿನ್ಯಾಸಕಿ ಸಪ್ನಾ ಭವಾನಿ ಅವರು ತನ್ನ ಟ್ವಿಟರ್ ಹಾಗೂ ಇನ್ ಸ್ಟ್ರಾಗ್ರಾಂ ಅಕೌಂಟ್ ಗಳಲ್ಲಿ ಹಂಚಿಕೊಂಡಿದ್ದಾರೆ.

ತಮ್ಮ ಹೊಸ ಕೇಶ ವಿನ್ಯಾಸದೊಂದಿಗೆ ಮುಂಬರುವ ಆಸೀಸ್ ಎದುರಿನ ತವರಿನ ಪಂದ್ಯಗಳಲ್ಲಿ ಧೋನಿ ಅವರ ಆಟ ಮೇಲಾಟ ಹೇಗಿರಬಹುದೆಂಬ ಕುತೂಹಲ ಇದೀಗ ಕ್ರಿಕೆಟ್ ಪ್ರೇಮಿಗಳದ್ದಾಗಿದೆ.