ಲುಫ್ತಾನ್ಸ ವಿಮಾನ ರದ್ದು: ಪ್ರಯಾಣಿಕರು ಅತಂತ್ರ, ಪ್ರತಿಭಟನೆ

ನವದೆಹಲಿ: ಜರ್ಮನಿಯ ಲುಫ್ತಾನ್ಸ ವಿಮಾನಯಾನ ಸಂಸ್ಥೆಯ ಪೈಲಟ್‌ಗಳು ವಿಶ್ವಾದ್ಯಂತ ಮುಷ್ಕರ ಆರಂಭಿಸಿದ್ದರಿಂದ ಪ್ರಯಾಣಿಕರು ಭಾರೀ ತೊಂದರೆ ಅನುಭವಿಸಿದ್ದಾರೆ.

ಶುಕ್ರವಾರ ಮುಂಜಾನೆ ದೆಹಲಿಯ ಇಂದಿರಾ ಗಾಂಧಿ ವಿಮಾನ ನಿಲ್ದಾಣದಲ್ಲಿ ಹತ್ತಿರಹತ್ತಿರ 700ಕ್ಕೂ ಅಧಿಕ ಮಂದಿ ಅತಂತ್ರರಾಗಿದ್ದು, ಪ್ರತಿಭಟನೆ ನಡೆಸಿದ್ದಾರೆ.

ಇದರಲ್ಲಿ ಬಹುತೇಕ ವಿದ್ಯಾರ್ಥಿಗಳೇ ಇದ್ದರು. ಅವರೆಲ್ಲ ಫ್ರಾಂಕ್‌ಫ‌ರ್ಟ್‌ ಅಥವಾ ಮ್ಯೂನಿಚ್‌ಗೆ ತೆರಳಿ, ಅಲ್ಲಿಂದ ಇನ್ನೊಂದು ಸಂಪರ್ಕ ವಿಮಾನದ ಮೂಲಕ ಉತ್ತರ ಅಮೆರಿಕಕ್ಕೆ ತೆರಳಬೇಕಿತ್ತು. ದಿಢೀರನೆ ಲುಫ್ತಾನ್ಸ ಈ ಮಾರ್ಗದ ವಿಮಾನಗಳನ್ನು ರದ್ದು ಮಾಡಿತು. ಕೆಲವರಿಗೆ ರದ್ದಾಗಿದ್ದರ ಬಗ್ಗೆ ಮಾಹಿತಿಗಳೂ ಇರಲಿಲ್ಲ! ಹಾಗಾಗಿ ರೊಚ್ಚಿಗೆದ್ದ ವಿದ್ಯಾರ್ಥಿಗಳು ಗಲಾಟೆ ನಡೆಸಿದರು. ತಕ್ಷಣ ಸ್ಥಳಕ್ಕೆ ತೆರಳಿದ ಪೊಲೀಸರು ಏರ್‌ಲೈನ್ಸ್‌ ಜೊತೆಗೆ ಮಾತನಾಡಿ, ಪರಿಸ್ಥಿತಿಯನ್ನು ಶಾಂತಗೊಳಿಸಿದರು.