ಹೊಸಕೋಟೆ: ಪ್ರೀತಿಸಿ ವಿವಾಹವಾಗಿದ್ದ ಪತ್ನಿ ಸಂಶಯಾಸ್ಪದವಾಗಿ ಮೃತಪಟ್ಟಿದ್ದು, ಪತಿಯನ್ನು ಬಂಧಿಸಿರುವ ಘಟನೆ ತಾಲೂಕು ತಾವರೆಕೆರೆ ಗ್ರಾಮದಲ್ಲಿ ನಡೆದಿದೆ.
ಬೆಂಗಳೂರು ಮೂಲದ ಶ್ವೇತಾ (25) ಮೃತರು. ಕೊಲೆ ಆರೋಪ ಮಾಡಿ ಮೃತಳ ಸಹೋದರಿ ಅಶ್ವಿ‌ನಿ ನಂದಗುಡಿ ಪೊಲೀಸರಿಗೆ ದೂರು ನೀಡಿದ್ದಾರೆ.
ಘಟನೆ ವಿವರ: ಮಹೇಶ್‌(35) ಕೆಲವು ವರ್ಷಗಳ ಹಿಂದೆ ಪೀಣ್ಯ ದಾಸರಹಳ್ಳಿಯ ಶ್ವೇತಾ ಎಂಬಾಕೆಯನ್ನು ಪ್ರೀತಿಸುತ್ತಿದ್ದ. ಇದು ಮನೆಯವರ ಗಮನಕ್ಕೆ ಬಂದಿದೆ. ನಂತರ ಹುಡುಗಿಗೆ ಅಂತರ್ಜಾತಿ ವಿವಾಹ ಬೇಡ ಎಂದು ಬುದ್ದಿವಾದ ಹೇಳಿದ್ದಾರೆ. ಆದರೆ, ಮಹೇಶ್‌ ಮನೆಯವರನ್ನು ಮತ್ತು ನಮ್ಮನ್ನು ಒಪ್ಪಿಸಿ ಕೋಲಾರದ ದೇವಸ್ಥಾನದಲ್ಲಿ ಶ್ವೇತಾ ಮದುವೆ ಆಗಿದ್ದರು. ಕೆಲವು ತಿಂಗಳು ಬೆಂಗಳೂರಲ್ಲೇ ಇದ್ದು, ತದನಂತರ ಹೊಸಕೋಟೆ ತಾಲೂಕಿನ ತಾವರೆಕೆರೆ ಗ್ರಾಮದಲ್ಲಿ ಬಾಡಿಗೆ ಮನೆಯಲ್ಲಿ ಜೀವನ ನಡೆಸುತ್ತಿದ್ದರು. ಇವರಿಗೆ 1 ವರ್ಷ 2 ತಿಂಗಳ ಗಂಡು ಮಗು ಇದೆ. ಆಗಾಗ ಸಣ್ಣ ವಿಷಯಗಳಿಗೆ ಪತಿ ಪತ್ನಿ ಮಧ್ಯೆ ಗಲಾಟೆಗಳು ನಡೆಯುತ್ತಿದ್ದವು. ರಾಜಿ ಪಂಚಾಯ್ತಿಯೂ ನಡೆದಿತ್ತು.
ಸೆ.8ರಂದು ರಾತ್ರಿ ಮಹೇಶ್‌, ಪತ್ನಿಯ ಮನೆಯವರಿಗೆ ಮೊಬೈಲ್‌ ಕರೆ ಮಾಡಿ, ಶ್ವೇತಾ ಮನಸ್ಸಿಗೆ ಬೇಜಾರು ಮಾಡಿಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಹೇಳಿದ್ದಾನೆ. ನಂತರ ಶ್ವೇತಾ ಮನೆಯವರು ಬಂದು ನೋಡಿದಾಗ ಆಕೆಯ ಮೈಮೇಲೆ ರಕ್ತದ ಕಲೆ ಆಗಿರುವುದು ಕಂಡು ಬಂದಿದ್ದು, ಇದು ಆತ್ಮಹತ್ಯೆ ಅಲ್ಲ ಕೊಲೆ ಎಂದು ಆರೋಪಿಸಿ ಪೊಲೀಸರಿಗೆ ದೂರು ನೀಡಿದ್ದಾರೆ.
