ಶಿರೂರು –ನೀರ್ಗದ್ದೆ; ಗ್ಯಾರೇಜ್‌ನಿಂದ ಲಾರಿ ಕಳವು

ಬೈಂದೂರು: ಬೈಂದೂರು ಆರಕ್ಷಕ ಠಾಣಾ ವ್ಯಾಪ್ತಿಯ ನೀರ್ಗದ್ದೆಯ ಗ್ಯಾರೇಜಿನಲ್ಲಿ ದುರಸ್ತಿಗಾಗಿ ನಿಲ್ಲಿಸಿದ್ದ ಲಾರಿಯನ್ನು ಕಳ್ಳರು ಶುಕ್ರವಾರ ರಾತ್ರಿ ಕದ್ದೊಯ್ದಿದ್ದಾರೆ.

ನರಸಿಂಹ ದೇವಾಡಿಗ ಎನ್ನುವವರ ಮೂಕಾಂಬಿಕಾ ಕೃಪಾ ಎನ್ನುವ ಲಾರಿಯನ್ನು ಬಾಡಿ ಕೆಲಸ ಸಹಿತ ದುರಸ್ತಿಗಾಗಿ ಗ್ಯಾರೇಜಿನಲ್ಲಿ ಇರಿಸಲಾಗಿತ್ತು. ಈ ಸಂದರ್ಭ ಅದರ ಬ್ಯಾಟರಿಯನ್ನೂ ತೆಗೆದಿಡಲಾಗಿತ್ತು. ಆದರೆ ಕಳ್ಳರು ಬೇರೆ ಬ್ಯಾಟರಿ ತಂದು ಲಾರಿಯನ್ನು ಒಯ್ದಿದ್ದಾರೆ.

ನಿರಂತರ ಕಳವು
ಈ ಭಾಗದಲ್ಲಿ 2-3 ವರ್ಷಗಳಿಂದ ನಿರಂತರ ಕಳ್ಳತನ ನಡೆಯುತ್ತಿದೆ. ಮೂರು ವರ್ಷಗಳ ಹಿಂದೆ ಇಲ್ಲಿನ ವೃದ್ಧ ದಂಪತಿಯ ಮನೆಯಿಂದ ಲಕ್ಷಾಂತರ ರೂ. ಮೌಲ್ಯದ ನಗ -ನಗದು ಕದ್ದೊಯ್ಯಲಾಗಿತ್ತು. ಬಳಿಕ ಸ್ಥಳೀಯ ಉದ್ಯೋಗಿಯೊಬ್ಬರ ಮನೆಯಿಂದ ಹಾಡಹಗಲೇ ಚಿನ್ನಾಭರಣ ಸಹಿತ 2.5 ಲ.ರೂ. ಮೌಲ್ಯದ ಸೊತ್ತನ್ನು ಕಳವು ಮಾಡಲಾಗಿತ್ತು. ಕಳೆದ ವರ್ಷ ನಿಲ್ಲಿಸಿದ್ದ 4 ಲಾರಿಗಳಿಂದ ಡೀಸೆಲ್‌ ಕದಿಯಲಾಗಿತ್ತು. ಬಳಿಕ ಲಾರಿಯೊಂದರ 6 ಟಯರ್‌ಗಳನ್ನು ಕದ್ದೊಯ್ಯಲಾಗಿತ್ತು. ಇಲ್ಲಿನ ಮನೆಯೊಂದರಿಂದ ಮೂರು ಸಲ ಕಳವು ಮಾಡಲಾಗಿತ್ತು. ಇತ್ತೀಚೆಗೆ ಸ್ಥಳೀಯ ಬೀಡಾ ಅಂಗಡಿಯೊಂದರಿಂದ ಗ್ಯಾಸ್‌ ಸಿಲಿಂಡರ್‌ ಕದ್ದೊಯ್ದು ಎ.ಟಿ.ಎಂ. ಕಳವಿಗೆ ಯತ್ನಿಸಲಾಗಿತ್ತು.

ಸ್ಥಳೀಯರ ಕೈವಾಡ ಶಂಕೆ
ಈ ಪರಿಸರದಲ್ಲಿ ಈಗಾಗಲೇ ಹತ್ತಕ್ಕೂ ಅಧಿಕ ಕಳವು ನಡೆದಿದ್ದು, ಸ್ಥಳೀಯರ ಕೈವಾಡದ ಶಂಕೆ ಎದ್ದು ಕಾಣುತ್ತಿದೆ.

ಸೂಕ್ತ ತನಿಖೆೆ: ಎಸ್‌.ಪಿ.
ಈ ಕುರಿತು ಪ್ರತಿಕ್ರಿಯಿಸಿದ ಎಸ್‌. ಪಿ. ನಿಶಾ ಜೇಮ್ಸ್‌ ಅವರು, ನೀರದ್ದೆ ಪ್ರಕರಣದ ಮಾಹಿತಿ ಸಿಕ್ಕಿದೆ. ಈ ಹಿಂದಿನ ಕಳ್ಳತನದ ಬಗ್ಗೆ ಅಧಿಕಾರಿಗಳಿಂದ ಮಾಹಿತಿ ಪಡೆಯುತ್ತೇನೆ. ಕಳವು ತಡೆಯಲು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುವುದು. ಸಾರ್ವಜನಿಕರು ಆತಂಕ ಪಡುವ ಅಗತ್ಯವಿಲ್ಲ ಎಂದು ಹೇಳಿದ್ದಾರೆ.