ಬಂಟ್ವಾಳ : ಇಲ್ಲಿನ ಮಡಂತ್ಯಾರು ಅರ್ತಿಲ ಬಳಿ ಶನಿವಾರ ಬೆಳ್ಳಂಬೆಳಗ್ಗೆ ಲಾರಿಗಳೆರಡು ಮುಖಾಮುಖೀ ಢಿಕ್ಕಿಯಾದ ಪರಿಣಾಮ ಸುಮಾರು 3 ಗಂಟೆಗಳ ಕಾಲ ರಾಷ್ಟ್ರೀಯ ಹೆದ್ದಾರಿ ಬ್ಲಾಕ್‌ ಆದ ಘಟನೆ ನಡೆದಿದೆ.
ಘಟನೆ ನಡೆದಾಗ ಲಾರಿಗಳಲ್ಲಿ ಚಾಲಕರಿಬ್ಬರು ಮಾತ್ರ ಇದ್ದರು ಎಂದು ತಿಳಿದು ಬಂದಿದ್ದು, ಇಬ್ಬರೂ ಗಾಯಗೊಂಡಿದ್ದು ಆಸ್ಪತ್ರೆಗೆ ದಾಖಲಾಗಿದ್ದಾರೆ.
ಮಂಗಳೂರಿನಿಂದ ಧರ್ಮಸ್ಥಳಕ್ಕೆ ತೆರಳುವ ಮಾರ್ಗ ಇದಾಗಿದ್ದು ನೂರಾರು ವಾಹನಗಳು ಎರಡೂ ಕಡೆಯಿಂದ ಚಲಿಸಲು ಸಾಧ್ಯವಾಗದೆ ಪರದಾಡಬೇಕಾಯಿತು.
ಮಡಂತ್ಯಾರು ಕಲ್ಲೇರಿ ಗುರುವಾಯನಕೆರೆ ಮೂಲಕ ಬದಲಿ ಮಾರ್ಗವನ್ನು ಹಲವು ವಾಹನಗಳು ಬಳಸಿಕೊಂಡವು.
ಪುಂಜಾಲಕಟ್ಟೆ ಪೊಲೀಸರು ಸ್ಥಳಕ್ಕಾಗಮಿಸಿ ಸಂಚಾರ ದಟ್ಟನೆ ನಿರ್ವಹಿಸಿದರು.
ವಾಹನಗಳನ್ನು ಬ್ಲಾಕ್‌ ಆದ ಕಾರಣ ಸ್ಥಳೀಯ ವಾಣಿ ಆಂಗ್ಲ ಮಾಧ್ಯಮ ಶಾಲೆಗೆ ರಜೆ ನೀಡಲಾಯಿತು.
1 ಕಿ.ಮೀ ಗೂ ಹೆಚ್ಚು ದೂರು ವಾಹನಗಳು ಸಾಲಿನಲ್ಲಿ ನಿಂತಿದ್ದವು. ತುರ್ತಾಗಿ ವಿಮಾನ ನಿಲ್ದಾಣಕ್ಕೆ ತೆರಳಬೇಕಾಗಿದ್ದ ಬೆಳ್ತಂಗಡಿಯ ಇಬ್ಬರು ಪ್ರಯಾಣಿಕರು ಕಂಗಾಲಾದರು. ಅವರಿಗೆ ಪೊಲೀಸರು ಸಹಕಾರ ನೀಡಿ ಸಂಚಾರಕ್ಕೆ ಅವಕಾಶ ಮಾಡಿ ಕೊಟ್ಟರು.
