ಲಂಡನ್‌ನಲ್ಲಿ ಸ್ಫೋಟ: 22 ಜನಕ್ಕೆ ಗಾಯ

ಲಂಡನ್‌: ಇಂಗ್ಲೆಂಡ್‌ನ‌ಲ್ಲಿ ಮತ್ತೆ ಭಯೋತ್ಪಾದಕರ ಅಟ್ಟಹಾಸ ಮುಂದುವರಿದಿದೆ. ಇಲ್ಲಿನ ಅಂಡರ್‌ಗ್ರೌಂಡ್‌ನ‌ಲ್ಲಿ ಚಲಿಸುತ್ತಿದ್ದ ರೈಲೊಂದರಲ್ಲಿ ಬಾಂಬ್‌ ಸ್ಫೋಟ ಸಂಭವಿಸಿದೆ. ಪುಟ್ಟ ಮಗು ಸಹಿತ 22 ಮಂದಿಗೆ ತೀವ್ರ ರೀತಿಯಗಾಯಗಳಾಗಿದ್ದು, ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಲಂಡನ್‌ನ ಡಿಸ್ಟ್ರಿಕ್ಟ್ ಲೇನ್‌ ಟ್ಯೂಬ್‌ ಬಳಿ ರೈಲಿನಲ್ಲಿ ಈ ಸ್ಫೋಟ ಸಂಭವಿಸಿದ್ದು, ಸೌತ್‌ಈಸ್ಟ್‌ ಲಂಡನ್‌ನ ಗ್ರೀನ್‌ ಸ್ಟೇಷನ್‌ನಲ್ಲಿ ಪ್ರಯಾಣಿಕರನ್ನು ಹೊರಗೆ ಕಳುಹಿಸಲಾಗಿದೆ. ಸುಧಾರಿತ ಸ್ಫೋಟಕಗಳನ್ನು ಬಕೆಟ್‌ವೊಂದರಲ್ಲಿ ಇಟ್ಟು ಸ್ಫೋಟಿಸಿದ್ದು, ಸ್ಕಾಟ್ಲಂಡ್‌ ಯಾರ್ಡ್‌ ಪೊಲೀಸರು ಇದೊಂದು ಉಗ್ರರ ಕೃತ್ಯ ಎಂದು ಕರೆದಿದ್ದಾರೆ. 

ಮೊದಲಿಗೆ 18 ಮಂದಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಬಳಿಕ ಮತ್ತೆ ನಾಲ್ಕು ಮಂದಿಯನ್ನು ಚಿಕಿತ್ಸೆಗಾಗಿ ಕರೆದೊಯ್ಯಲಾಗಿದೆ ಎಂದು ಲಂಡನ್‌ನ ಆ್ಯಂಬುಲೆನ್ಸ್‌ ಸೇವೆ ಹೇಳಿದೆ. ಇವರೆಲ್ಲರೂ ಸುಟ್ಟಗಾಯಗಳಿಂದಾಗಿ ಬಳಲುತ್ತಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ. 

ಘಟನೆ ಸಂಬಂಧ ಬ್ರಿಟನ್‌ ಪ್ರಧಾನಿ ಥೆರೇಸಾ ಮೇ ಖಂಡನೆ ವ್ಯಕ್ತಪಡಿಸಿದ್ದಾರೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಕೂಡ ಈ ಕೃತ್ಯ ಖಂಡಿಸಿದ್ದು, ತಾವು ಅಧಿಕಾರಕ್ಕೆ ಬಂದ ಮೇಲೆ ಉಗ್ರರ ಕೃತ್ಯಗಳು ಕಡಿಮೆಯಾಗಿವೆ ಎಂದಿದ್ದಾರೆ.