ಆಧಾರ್‌ ಕಾರ್ಡ್‌ ಬಳಕೆ ಐಚ್ಛಿಕ, ಕೆವೈಸಿ ದಾಖಲೆ ಪತ್ರ, ಬ್ಯಾಂಕ್‌ ಖಾತೆ ತೆರೆಯಲು ಪೂರಕ

ಹೊಸದಿಲ್ಲಿ : ಲೋಕಸಭೆ ನಿನ್ನೆ ಗುರುವಾರ ಸರ್ವಾನುಮತದಿಂದ 2019ರ ಆಧಾರ್‌ ಮತ್ತು ಇತರ ಕಾನೂನುಗಳ (ತಿದ್ದುಪಡಿ) ಮಸೂದೆಯನ್ನು ಪಾಸು ಮಾಡಿದೆ.

ಆಧಾರ್‌ ಕಾರ್ಡ್‌ ಬಳಕೆಯೂ ಸಂಪೂರ್ಣವಾಗಿ ಬಳಕೆದಾರರಿಗೆ ಐಚ್ಛಿಕವಾಗಿದ್ದು ಇದನ್ನು ಅವರು ಬ್ಯಾಂಕ್‌ ಖಾತೆ ತೆರೆಯಲು ಬಳಸಬಹುದಲ್ಲದೆ ಸ್ವೀಕೃತ ಕೆವೈಸಿ ದಾಖಲೆ ಪತ್ರವಾಗಿ ಅದನ್ನು ಉಪಯೋಗಿಸಬಹುದಾಗಿದೆ ಎಂದು ಸರಕಾರ ಹೇಳಿದೆ.

ಈ ಮಸೂದೆಯಲ್ಲಿ ಸರಕಾರ ಆಧಾರ್‌ ಬಳಕೆಯ ನಿಯಮಗಳ ಉಲ್ಲಂಘನೆಗೆ ಮತ್ತು ಖಾಸಗಿತನದ ಉಲ್ಲಂಘನೆಗೆ ಕಠಿನ ದಂಡನೆಯೇ ಕ್ರಮಗಳನ್ನು ಅಳವಡಿಸಿದೆ.

ಲೋಕಸಭೆಯಲ್ಲಿ ಆಧಾರ್‌ ಮಸೂದೆ ಮಂಡಿಸಿದ ಕೇಂದ್ರ ಕಾನೂನು ಸಚಿವ ರವಿ ಶಂಕರ್‌ ಪ್ರಸಾದ್‌ ಅವರು ಈ ಮಸೂದೆಯು ಆಧಾರ್‌ ಬಳಕೆದಾರರ ಖಾಸಗಿತನವನ್ನು ರಕ್ಷಿಸಲಿದೆ ಎಂದು ಹೇಳಿದರು. ಇದೇ ವೇಳೆ ಅವರು ಇಂಡಿಯನ್‌ ಟೆಲಿಗ್ರಾಫ್ ಕಾಯಿದೆ 1885 ಮತ್ತು 2002ರ ಹಣ ಅಕ್ರಮ ತಡೆ ಕಾಯಿದೆಯನ್ನು ಕೂಡ ಮಂಡಿಸಿದರು.