ಅಹ್ಮದಾಬಾದ್‌: ಎರಡು ವರ್ಷಗಳ ಹಿಂದೆ, ಜೆಟ್‌ ಏರ್‌ವೆàಸ್‌ ವಿಮಾನ ಅಪಹರಿಸುವುದಾಗಿ ಸುಳ್ಳು ಬೆದರಿಕೆ ಹಾಕಿ, ತುರ್ತು ಭೂ ಸ್ಪರ್ಶಕ್ಕೆ ಕಾರಣವಾಗಿದ್ದ ಮುಂಬಯಿ ಮೂಲದ ಉದ್ಯಮಿ ಬಿರ್ಜು ಸಲ್ಲಾ ಎಂಬವರಿಗೆ ರಾಷ್ಟ್ರೀಯ ತನಿಖಾ ಸಂಸ್ಥೆಯ (ಎನ್‌ಐಎ) ನ್ಯಾಯಾಲಯ ಜೀವಾವಧಿ ಶಿಕ್ಷೆ ವಿಧಿಸಿದ್ದು, 5 ಕೋಟಿ ರೂ.ಗಳ ದಂಡವನ್ನೂ ವಿಧಿಸಿದೆ. ಅಲ್ಲದೆ, ವಸೂಲಾದ ದಂಡವನ್ನು ಆತ ಬೆದರಿಕೆ ಹಾಕಿದ ವಿಮಾನದಲ್ಲಿದ್ದ ಸಿಬಂದಿ, ಪ್ರಯಾಣಿಕರಿಗೆ ಸಮವಾಗಿ ಹಂಚಬೇಕು ಎಂದು ತೀರ್ಪು ನೀಡಿದೆ. 2017ರ ಅ. 30ರಂದು ಮುಂಬಯಿ – ದಿಲ್ಲಿ ವಿಮಾನದಲ್ಲಿ ಪ್ರಯಾ ಣಿಸುತ್ತಿದ್ದ ಬಿರ್ಜು, ವಿಮಾನವನ್ನು ಹೈಜಾಕ್‌ ಮಾಡಲಾಗಿದ್ದು, ಪಾಕ್‌ ಆಕ್ರಮಿತ ಕಾಶ್ಮೀರದೊಳಗೆ ಕೊಂಡೊಯ್ಯಬೇಕು. ಅಲ್ಲಾ ಈಸ್‌ ಗ್ರೇಟ್‌ ಎಂದು ಇಂಗ್ಲಿಷ್‌ ಮತ್ತು ಉರ್ದುವಿನಲ್ಲಿ ಬರೆದು ಅದನ್ನು ಟಾಯ್ಲೆಟ್‌ನ ಟಿಶ್ಯೂ ಪೇಪರ್‌ ಡಬ್ಬಿಯಲ್ಲಿ ಹಾಕಿ ಬಂದಿದ್ದ.
