ಲೆ|ಉಮರ್‌ ಫ‌ಯಾಜ್‌ ಹಂತಕರ ಗುರುತು ಪತ್ತೆ, ಶೀಘ್ರ ಬಂಧನ: ಸೇನೆ

ಜಮ್ಮು : ಜಮ್ಮು ಕಾಶ್ಮೀರದ ಶೋಪಿಯಾನ್‌ ಜಿಲ್ಲೆಯಲ್ಲಿ 22ರ ಹರೆಯದ ಲೆಫ್ಟಿನೆಂಟ್‌ ಉಮರ್‌ ಫ‌ಯಾಜ್‌ ಅವರನ್ನು ಅಪಹರಿಸಿ ಹತ್ಯೆಗೆದಿದ್ದ ಮೂವರು ಉಗ್ರರನ್ನು ಗುರುತಿಸಲಾಗಿದ್ದು ಅವರನ್ನು  ಸೆರೆ ಹಿಡಿಯುವ ಕಾರ್ಯಾಚರಣೆ ನಡೆಯುತ್ತಿದೆ ಎಂದು ಅಧಿಕಾರಿಗಳು ಇಂದು ಮಂಗಳವಾರ ಹೇಳಿದ್ದಾರೆ. 

“ಲೆ| ಉಮರ್‌ ಫ‌ಯಾಜ್‌ ಅವರನ್ನು ಕಳೆದ ಮೇ ತಿಂಗಳಲ್ಲಿ ಅಪಹರಿಸಿ ಹತ್ಯೆಗೈದಿದ್ದ ಮೂವರು ಉಗ್ರರನ್ನು ಗುರುತಿಸಲಾಗಿದೆ ಮತ್ತು ಅವರನ್ನು ಸೆರೆ ಹಿಡಿಯುವ ಕಾರ್ಯಾಚರಣೆಯನ್ನು ನಾವು ಕೈಗೊಂಡಿದ್ದೇವೆ’ ಎಂದು ಜನರಲ್‌ ಆಫೀಸರ್‌ ಕಮಾಂಡಿಂಗ್‌ (ಜಿಓಸಿ) 15 ದಳದ ಲೆ.ಜ. ಸಂಧು ಅವರಿಂದು ಎಎನ್‌ಐಗೆ ತಿಳಿಸಿದರು. 

ಕಾಶ್ಮೀರ ಕಣಿವೆಯಲ್ಲೀಗ ಪ್ರತಿಭಟನೆಗಳ ಸಂಖ್ಯೆ ಗಣನೀಯವಾಗಿ ಇಳಿದಿದೆ; ಪ್ರತಿಭಟನೆಯಲ್ಲಿ ಪಾಲ್ಗೊಳ್ಳುವ ಜನರ ಸಂಖ್ಯೆಯೂ ಕಡಿಮೆಯಾಗಿದೆ. ಜನರಿಗೆ ಪ್ರತಿಭಟನೆಗಳಿಂದ ಸಾಕಾಗಿ ಹೋಗಿದೆ; ತಮ್ಮ ಬದುಕು ಮಾಮೂಲಿಯಾಗಿ ಸಾಗುವುದನ್ನು ಅವರು ಬಯಸುತ್ತಿದ್ದಾರೆ ಎಂದು ಸಂಧು ಹೇಳಿದರು.