ಕಾನೂನಾತ್ಮಕ ವಲಸಿಗರಿಗೆ ಸಿಗಲಿದೆಯೇ ಅಮೆರಿಕದ ಪೌರತ್ವ?

ವಾಷಿಂಗ್ಟನ್‌: ಕಾನೂನುಬದ್ಧ ವಲಸಿಗರ ಮಕ್ಕಳಿಗೆ ಪೌರತ್ವ ನೀಡುವ ಕುರಿತು ಅಮೆರಿಕದ ಬೈಡೆನ್‌ ಆಡಳಿತ ಚಿಂತನೆ ನಡೆಸಿದೆ. ಇದು ಸಾಧ್ಯವಾದಲ್ಲಿ, ಗಡಿಪಾರಿನ ಭೀತಿಯಲ್ಲಿದ್ದ ಭಾರತೀಯರೂ ಸೇರಿದಂತೆ ಲಕ್ಷಾಂತರ ಮಂದಿ ನೆಮ್ಮದಿಯ ನಿಟ್ಟುಸಿರು ಬಿಡಲಿದ್ದಾರೆ.

ಎಚ್‌-1ಬಿ ನೌಕರರು ಸೇರಿದಂತೆ ದೀರ್ಘಾವಧಿಯ ವಲಸಿಗರಲ್ಲದ ವೀಸಾದಾರರ ಅವಲಂಬಿತರಾಗಿ ಅಮೆರಿಕದಲ್ಲಿ ವಾಸಿಸುತ್ತಿರುವ ಇಂಥವರು, ಗಡಿಪಾರಿನ ಭೀತಿಯಲ್ಲೇ ಜೀವಿಸುತ್ತಿದ್ದಾರೆ. ಇವರಿಗೆ 21 ವರ್ಷ ತುಂಬುತ್ತಲೇ ಗಡಿಪಾರಾಗುವ ಆತಂಕವಿರುತ್ತದೆ. ಇಂಥ ಸುಮಾರು 2 ಲಕ್ಷ ಮಂದಿ ಅಮೆರಿಕದಲ್ಲಿದ್ದಾರೆ.

“ತಮ್ಮ ಕುಟುಂಬ ಸದಸ್ಯರೊಂದಿಗೆ ಇಲ್ಲಿಗೆ ಬಂದಿರುವ ಅಮಾಯಕ ಮಕ್ಕಳು ಇಲ್ಲಿದ್ದಾರೆ. ಅಂಥವರಿಗೆ ಪೌರತ್ವ ನೀಡುವ ನಿಟ್ಟಿನಲ್ಲಿ ನಾವು ಕಾನೂನಾತ್ಮಕ ಹೆಜ್ಜೆಯಿಡಲಿದ್ದೇವೆ’ ಎಂದು ಶ್ವೇತಭವನದ ಮಾಧ್ಯಮ ಕಾರ್ಯದರ್ಶಿ ಜೆನ್‌ ಸಾಕಿ ಹೇಳಿದ್ದಾರೆ. ಅಮೆರಿಕದ ವಲಸೆ ವ್ಯವಸ್ಥೆಯನ್ನು ಸುಧಾರಿಸಬೇಕು ಎಂಬ ಸ್ಪಷ್ಟ ನಿಲುವನ್ನು ಬೈಡೆನ್‌ ಹೊಂದಿದ್ದಾರೆ ಎಂದೂ ಸಾಕಿ ತಿಳಿಸಿದ್ದಾರೆ.