ಮೌಲ್ಯಮಾಪನಕ್ಕೆ ಉಪನ್ಯಾಸಕರು ಗೈರು?

ಕೊಪ್ಪಳ: ರಾಜ್ಯಾದ್ಯಂತ ಮೇ 29ರಿಂದ ಆರಂಭವಾಗಲಿರುವ ದ್ವಿತೀಯ ಪಿಯು ಮೌಲ್ಯಮಾಪನಕ್ಕೆ ಕೋವಿಡ್ ಹಿನ್ನೆಲೆಯಲ್ಲಿ ಹಲವು ಉಪನ್ಯಾಸಕರು ಗೈರು ಹಾಜರಾಗುತ್ತಿರುವ ಮಾಹಿತಿ ಕೇಳಿ ಬಂದಿದೆ. ಜಿಲ್ಲೆಯಿಂದ 52 ಉಪನ್ಯಾಸಕರು ನೇಮಕವಾಗಿದ್ದಾರೆ. ಆದರೆ ಇವರಲ್ಲಿ ಎಷ್ಟು ಜನರು ಹಾಜರಾಗಿದ್ದಾರೆ ಎನ್ನುವ ಮಾಹಿತಿ ತಿಳಿದು ಬಂದಿಲ್ಲ.

ಪ್ರಸ್ತುತ ಬೆಳಗಾವಿ, ಬೆಂಗಳೂರು, ಧಾರವಾಡದಲ್ಲಿ ಕೋವಿಡ್  ಅಬ್ಬರ ಜೋರಾಗಿದೆ. ಹೀಗಾಗಿ ಕಾಲೇಜು ಉಪನ್ಯಾಸಕರು ಈ ಜಿಲ್ಲೆಗಳಿಗೆ ಮೌಲ್ಯಮಾಪನಕ್ಕೆ ತೆರಳಲು ಹಿಂದೇಟು ಹಾಕುತ್ತಿದ್ದಾರೆ. ಹೈರಿಸ್ಕ್ ಏರಿಯಾಗಳಲ್ಲಿ ಕೇಂದ್ರಗಳಿವೆ. ಅಲ್ಲಿ ಹೇಗೆ ತೆರಳಿ ಮೌಲ್ಯಮಾಪನ ಮಾಡಬೇಕು. ಅಲ್ಲದೇ ಮೌಲ್ಯಮಾಪನಕ್ಕೆ ತೆರಳಿದರೆ ನಮಗೆ ಸರಿಯಾದ ವಸತಿ ವ್ಯವಸ್ಥೆ ದೊರೆಯಲ್ಲ. ಊಟ, ಉಪಹಾರದ ವ್ಯವಸ್ಥೆಯೂ ದೊರೆಯಲ್ಲ. ಕೋವಿಡ್ ಹಿನ್ನೆಲೆಯಲ್ಲಿ ಹೋಟೆಲ್‌ಗ‌ಳು ಬಂದ್‌ ಆಗಿವೆ. ಲಾಡ್ಜ್ಗಳು ಬಂದ್‌ ಇವೆ. ಹೀಗಾದರೆ ನಾವು ಎಲ್ಲಿ ವಾಸ್ತವ್ಯ ಮಾಡಬೇಕು. ಇದರಿಂದ ತುಂಬ ತೊಂದರೆ ಎದುರಾಗುತ್ತಿದೆ ಎಂದು ಉಪನ್ಯಾಸಕರು ತಮಗೆ ಆಗುತ್ತಿರುವ ತೊಂದರೆ ಕುರಿತು ಆಪ್ತ ವಲಯದಲ್ಲಿ ತೋಡಿಕೊಳ್ಳುತ್ತಿದ್ದಾರೆ. ಜಿಲ್ಲೆಯ 52 ಜನರು ಮೇ 29ಕ್ಕೆ ಆಯಾ ಕೇಂದ್ರಗಳಿಗೆ ತೆರಳಿ ಅವರು ಹಾಜರಾಗಿರುವ ಕುರಿತು ವರದಿ ಮಾಡಿಕೊಳ್ಳಬೇಕು. ಆದರೆ ಕೊರೊನಾದಿಂದ ಹಲವು ಜನರು ಅರ್ಧ ದಾರಿಗೆ ತೆರಳಿ ವಾಪಸ್ಸಾಗುತ್ತಿದ್ದಾರೆ ಎನ್ನುವ ಮಾಹಿತಿ ತಿಳಿದು ಬಂದಿದೆ.

ಕೆಲವರಂತೂ ಮೌಲ್ಯಮಾಪನಕ್ಕೆ ತೆರಳಿಯೇ ಇಲ್ಲ. ಇದಲ್ಲದೇ ಕೊಪ್ಪಳ ಜಿಲ್ಲೆಯ ಉಪನ್ಯಾಸಕರ ಸಂಘವಂತೂ ನಮಗೆ ಕೊಪ್ಪಳ ಜಿಲ್ಲೆಯಲ್ಲೇ ಕೇಂದ್ರವನ್ನು ಸ್ಥಾಪಿಸಿ ಮೌಲ್ಯಮಾಪನಕ್ಕೆ ಅವಕಾಶ ಮಾಡಿಕೊಡಿ ಎಂದು ಸರ್ಕಾರಕ್ಕೆ ಮನವಿ ಮಾಡಿಕೊಂಡಿದ್ದಾರೆ.