ಲಕ್ಷ್ಮಣ ತೀರ್ಥ ನದಿ ನೀರಿನ ಮಟ್ಟ ಏರಿಕೆ

ಹುಣಸೂರು: ಲಕ್ಷ್ಮಣತೀರ್ಥ ನದಿಯಲ್ಲಿ ನೀರಿನ ಮಟ್ಟ ಏರುತ್ತಲೇ ಇದ್ದು, ಹನಗೋಡು ಅಣೆಕಟ್ಟೆಮೇಲೆ 8,380 ಸಾವಿರ ಕ್ಯೂಸೆಕ್‌(4.5ಅಡಿ)ನೀರು ದುಮ್ಮಿಕ್ಕಿ ಹರಿಯುತ್ತಿದ್ದು, ಮತ್ತಷ್ಟು ಬೆಳೆ ನೀರಿನಲ್ಲಿ ಮುಳುಗಿದೆ.

ಕೊಡಗಿನ ಇಪುì ಹಾಗೂ ನಾಗರಹೊಳೆ ಅರಣ್ಯ ಪ್ರದೇಶದಲ್ಲಿ ಬೀಳುತ್ತಿರುವ ಜಡಿಮಳೆಯಿಂದಾಗಿ ನದಿಯಲ್ಲಿ ನೀರಿನ ಹರಿವು ಹೆಚ್ಚುತ್ತಿದೆ. ಶುಕ್ರವಾರದಿಂದ ಮಳೆ ಸ್ವಲ್ಪಮಟ್ಟಿಗೆ ಕಡಿಮೆಯಾದರೂ ನೀರಿನ ಪ್ರವಾಹ ಹೆಚ್ಚುತ್ತಲೇ ಇದೆ. ನೀರಿನ ಮಟ್ಟ ಅರ್ಧ ಅಡಿ ಹೆಚ್ಚಿದ್ದರಿಂದ ಹನಗೋಡು ಭಾಗದ ಹತ್ತಾರು ಹಳ್ಳಿಗಳ ಹೊಳೆ ಅಂಚಿನ ಜಮೀನಿನ ಬೆಳೆಗಳು ಜಲಾವೃತವಾಗಿದೆ. 

ಅಣೆಕಟ್ಟೆಯ ಹಿಂಬದಿಯಲ್ಲಿ ಹಿನ್ನೀರು ನಾಟಿ ಮಾಡಿದ ಭತ್ತದ ಗದ್ದೆಗಳನ್ನೂ ಮುಳುಗಿಸಿದೆ. ಅಲ್ಲದೆ ಪಕ್ಕದ ಎಚ್‌.ಎಲ್‌. ರಾಜಣ್ಣ, ರಮೇಶ್‌, ವೀಣಾ, ಮುರುಳಿ, ಎಚ್‌.ಸಿ.ರಾಮಣ್ಣರಿಗೆ ಸೇರಿದ ಅಡಿಕೆ, ತೆಂಗಿನ ತೋಟಕ್ಕೆ ನೀರು ನುಗ್ಗಿದೆ. ಹನಗೋಡು-ಹುಣಸೂರು ಮುಖ್ಯರಸ್ತೆಯ ಕಾಮಗೌಡನಹಳ್ಳಿ ಗೇಟ್‌ ಬಳಿಯ ಆಜುಬಾಜಿನ ಮುಸುಕಿನ ಜೋಳ,

ಶುಂಠಿ, ತಂಬಾಕು ಬೆಳೆ ಸಂಪೂರ್ಣ ನೀರಿನಲ್ಲಿ ಮುಳುಗಿದೆ. ಮತ್ತೆ ಅರ್ಧ ಅಡಿ ಹೆಚ್ಚು ನೀರು ಬಂದಲ್ಲಿ ನಿಲುವಾಗಿಲು ಅವಲಕ್ಕಿ ಕಡ ಹಾಗೂ ಕಾಮಗೌಡನಹಳ್ಳಿಯ ಪಡುವನಹಳ್ಳದ‌ ಮೂಲಕ ರಸ್ತೆಗೆ ನೀರು ತುಂಬಿದಲ್ಲಿ ಹನಗೋಡು-ಹುಣಸೂರು ರಸ್ತೆ ಬಂದ್‌ ಆಗಿದೆ.

ಅಪಾಯದಲ್ಲಿ ತಡೆಗೋಡೆ: ಹನಗೋಡು ಅಣೆಕಟ್ಟೆಯ ಮುಖ್ಯನಾಲೆಯ ಬಿಡುಗಂಡಿ ಬಳಿ ನಾಲೆಯ ಏರಿಗೆ ನಿರ್ಮಿಸಿರುವ ಸುಮಾರು 200 ಮೀ.ನಷ್ಟು ತಡೆಗೋಡೆ ವಾಲಿಕೊಂಡಿದ್ದು, ಬಿಳುವ ಸಂಭವವಿದೆ. 

ತುಂಬಿದ 42 ಕೆರೆಗಳು: ಹನಗೋಡು ಅಣೆಕಟ್ಟೆಯ ಮುಖ್ಯ ನಾಲೆಗೆ 600 ಕ್ಯೂಸೆಕ್‌ ನೀರು ಹರಿಸಲಾಗುತ್ತಿದ್ದು, ಅಣೆಕಟ್ಟೆ ವ್ಯಾಪ್ತಿಯ ಎಲ್ಲ 42 ಕೆರೆಗಳಿಗೆ ನೀರು ತುಂಬಿಸಿದ್ದು, ಸುಮಾರು 24 ಸಾವಿರ ಎಕರೆ ಪ್ರದೇಶಕ್ಕೆ ನೀರುಣಿಸಲಿದೆ, ಹನುಮಂತಪುರ ಹಾಗೂ ಉದ್ದೂರು ನಾಲಾ ವ್ಯಾಪ್ತಿಯಲ್ಲಿ ಭತ್ತದ ನಾಟಿ ಚುರುಕುಗೊಂಡಿದೆ.

ಶನಿವಾರ ಮುಂಜಾನೆ ಜಡಿ ಮಳೆ ಆರಂಭವಾಗಿ ಮದ್ಯಾಹ್ನದವೇಳೆ ಸ್ವಲ್ಪಮಟ್ಟಿನ ಬಿಡುವು ನೀಡಿದೆ. ನಾಲೆಯ ಮೇಲೆ ನಿಗಾ ಇಡಲಾಗಿದ್ದು, ಮಳೆ ಹೆಚ್ಚಿರುವುದರಿಂದ ನಾಲೆಯಲ್ಲಿ ನೀರಿನ ಹರಿವನ್ನು ಸ್ವಲ್ಪಮಟ್ಟಿಗೆ ಕಡಿಮೆ ಮಾಡಲಾಗಿದೆ.

ಯುವಕರಿಗೆ ಎಇಇ ಎಚ್ಚರಿಕೆ: ಲಕ್ಷ್ಮಣತೀರ್ಥ ನದಿಯ ಹನಗೋಡು ಅಣೆಕಟ್ಟೆಯ ಮೇಲೆ ನೀರಿನ ಹರಿವನ್ನು ಕಣ್ತುಂಬಿಕೊಳ್ಳಲು ನಿತ್ಯ ಸುತ್ತಮುತ್ತಲ ಹಳ್ಳಿಗಳ ನೂರಾರು ಮಂದಿ ಅಣೆಕಟ್ಟೆ ಏರಿಮೇಲೆ ನಿಂತು ವೀಕ್ಷಿಸುತ್ತಿದ್ದಾರೆ, ಯುವ ಪಡೆ ಅಣೆಕಟ್ಟೆ ಮೇಲೆ ದುಮ್ಮಿಕ್ಕುತ್ತಿರುವ ನೀರಿನೊಂದಿಗೆ ಸೆಲ್ಪಿ ತೆಗೆದುಕೊಳ್ಳುತ್ತಿದ್ದಾರೆ. ಇಲ್ಲಿ ಅಪಾಯವಿದ್ದು, ಈ ಕಡೆ ಯಾರೂ ಓಡಾಡಬಾರದೆಂದು ಹನಗೋಡು ಹಾರಂಗಿ ಕಚೇರಿಯ ಎಇಇ ಕುಶುಕುಮಾರ್‌ ಎಚ್ಚರಿಕೆ ನೀಡಿದ್ದಾರೆ.