Vande Bharat ರೈಲು ಆರಂಭ: ಕಾಸರಗೋಡು ನಿಲ್ದಾಣದ ಆದಾಯದಲ್ಲಿ ಹೆಚ್ಚಳ

ಕಾಸರಗೋಡು: ಕಾಸರಗೋಡು ಮತ್ತು ಕಾಂಞಂಗಾಡ್‌ ರೈಲು ನಿಲ್ದಾಣಗಳ ಆದಾಯದಲ್ಲಿ ಹೆಚ್ಚಳವಾಗಿದೆ. ದಕ್ಷಿಣ ರೈಲ್ವೇಯ ಅಧೀನದಲ್ಲಿರುವ ಉತ್ತಮ ಆದಾಯವಿರುವ ನಿಲ್ದಾಣಗಳಲ್ಲಿ ಕಾಸರಗೋಡಿಗೆ 33ನೇ ಸ್ಥಾನ ಹಾಗೂ ಕಾಂಞಂಗಾಡ್‌ಗೆ 58ನೇ ಸ್ಥಾನ ಲಭಿಸಿದೆ.

ರಾಜ್ಯದಲ್ಲಿ ಕಾಸರಗೋಡು ರೈಲು ನಿಲ್ದಾಣ 15ನೇ ಸ್ಥಾನದಲ್ಲಿದ್ದರೆ, ಕಾಂಞಂಗಾಡ್‌ 25ನೇ ಸ್ಥಾನದಲ್ಲಿದೆ. ವಂದೇ ಭಾರತ್‌ ರೈಲು ಸಂಚಾರ ಆರಂಭಗೊಂಡಿರುವುದು ಕಾಸರ ಗೋಡಿನ ಆದಾಯವನ್ನು ಹೆಚ್ಚಿಸಲು ಪೂರಕವಾಯಿತು.

ಒಂದು ವರ್ಷ ಪೂರ್ತಿಯಾದ ಕೋಟ್ಟಯಂ ಮೂಲಕವಿರುವ ವಂದೇ ಭಾರತ್‌ ಹಾಗೂ ಆಲಪ್ಪುಳ ಮೂಲಕವಿರುವ ದ್ವಿತೀಯ ವಂದೇ ಭಾರತ್‌ ರೈಲಿಗೆ ಈ ಭಾಗದ ಪ್ರಯಾಣಿಕರಿಂದ ಉತ್ತಮ ಪ್ರತಿಕ್ರಿಯೆ ಲಭಿಸುತ್ತಿದೆ. ಅಪರಾಹ್ನ 2.30ಕ್ಕೆ ವಂದೇ ಭಾರತ್‌ ಕಾಸರಗೋಡಿನಿಂದ ಸಂಚಾರ ಆರಂಭಿಸುವ ಕಾರಣ ಮುಂಗಡ ಕಾದಿರಿಸುವಿಕೆಯಲ್ಲೂ ಹೆಚ್ಚಿನ ಪರಿಗಣನೆ ಲಭಿಸುತ್ತಿದೆ.

ಉತ್ತರ ಮಲಬಾರ್‌ನ ಅತ್ಯಂತ ಹೆಚ್ಚು ಆದಾಯವಿರುವ ರೈಲು ನಿಲ್ದಾಣಗಳಲ್ಲಿ ತಲಶ್ಯೇರಿಯನ್ನು ಹಿಂದಿಕ್ಕಲು ಕಾಸರಗೋಡಿಗೆ ಇದರಿಂದ ಸಾಧ್ಯವಾಗಿದೆ. ಕಳೆದ ವರ್ಷ ತಲಶ್ಯೇರಿಯ ಬಳಿಕದ ಸ್ಥಾನದಲ್ಲಿ ಕಾಸರಗೋಡು ನಿಲ್ದಾಣವಿತ್ತು. ಈ ಬಾರಿ ಸ್ಥಿತಿ ಉತ್ತಮಪಡಿಸಿಕೊಂಡಿದೆ.