ಮುಂದುವರೆದ ಭೂಕುಸಿತ

ನರಗುಂದ: ಪಟ್ಟಣದ ನಾಲ್ಕು ಬಡಾವಣೆ ನಿವಾಸಿಗಳ ನಿದ್ದೆಗೆಡಿಸಿದ ಭೂಕುಸಿತ ಮತ್ತೇ ಮುಂದುವರೆದಿದೆ. ರವಿವಾರ ಸ್ಥಳೀಯ ಕಸಬಾ ಬಡಾವಣೆಯಲ್ಲಿ ಎರಡು ಮನೆಗಳ ನಡುವಿನ ಗೋಡೆಯ ಅಡಿಯಲ್ಲೇ ಭೂಕುಸಿತ ಉಂಟಾಗಿದೆ.

ಚನ್ನಬಸಪ್ಪ ಹಾದಿಮನಿ ಎಂಬುವರ ಮನೆ ಮತ್ತು ಯಲ್ಲವ್ವ ಮಟಗೇರ ಅವರ ಮನೆಗಳ ನಡುವಿನ ಗೋಡೆಯ ತಳಭಾಗದಲ್ಲಿ ಭೂಮಿ ಕುಸಿದಿದೆ. ಶನಿವಾರ ಮಧ್ಯರಾತ್ರಿ ಸಂಭವಿಸಿದೆ ಎನ್ನಲಾಗಿದೆ. ಎರಡೂ ಮನೆಗಳ ಗೋಡೆಯ ತಳದಲ್ಲಿ ಭೂಕುಸಿತ ಉಂಟಾಗಿ ಆಳವಾದ ಗುಂಡಿ ಬಿದ್ದಿದೆ. ವಿಚಿತ್ರವೆಂದರೆ ಭೂಕುಸಿತ ಉಂಟಾದ ಗುಂಡಿಯ ತಳದಲ್ಲಿ ಸಣ್ಣಗೆ ನೀರು ಹರಿಯುತ್ತಿರುವುದು ಕಂಡುಬಂದಿದೆ.

ಹೀಗಾಗಿ ಈ ಬಡಾವಣೆಗಳಲ್ಲಿ ಅಂತರ್ಜಲ ಹೆಚ್ಚಳದ ಭೀತಿ ಸಾರ್ವಜನಿಕರನ್ನು ನಿದ್ದೆಗೆಡಿಸಿದೆ.ಬೆಳಗ್ಗೆ ಪುರಸಭೆಯಿಂದ ಮುರಂ ಹಾಕಲಾಗಿದೆ. ಪಟ್ಟಣದ ಬಡಾವಣೆಗಳಲ್ಲಿ ಅಂತರ್ಜಲ ಹೆಚ್ಚಳದಿಂದ ಉಂಟಾಗುತ್ತಿರುವ ಭೂಕುಸಿತ ಜನರ ನಿದ್ದೆಗೆಡಿಸಿದೆ.