ಅಹ್ಮದಾಬಾದ್‌ ಪ್ರಾಂಚೈಸಿಗೆ ಬೆಟ್ಟಿಂಗ್‌ ನಂಟು: ಲಲಿತ್‌ ಮೋದಿ ಆರೋಪ

ಹೊಸದಿಲ್ಲಿ: ಮುಂದಿನ ವರ್ಷದ ಐಪಿಎಲ್‌ನಲ್ಲಿ ಕಣಕ್ಕಿಳಿಯಲಿರುವ ಅಹ್ಮದಾಬಾದ್‌ ಫ್ರಾಂಚೈಸಿ ಮೇಲೆ ಲಲಿತ್‌ ಮೋದಿ ಗಂಭೀರ ಆರೋಪವೊಂದನ್ನು ಮಾಡಿದ್ದಾರೆ. ಇದನ್ನು 5,625 ಕೋಟಿ ರೂ.ಗೆ ಖರೀದಿಸಿರುವ ಸಿವಿಸಿ ಕ್ಯಾಪಿಟಲ್‌ ಕಂಪೆನಿಯು ಕ್ರೀಡಾ ಬೆಟ್ಟಿಂಗ್‌ ಸಂಸ್ಥೆಗಳೊಂದಿಗೆ ನಂಟು ಹೊಂದಿದೆ ಎಂದಿದ್ದಾರೆ.

“ಐಪಿಎಲ್‌ ತಂಡವನ್ನು ಬೆಟ್ಟಿಂಗ್‌ ಕಂಪೆನಿಗಳೂ ಖರೀದಿಸಬಹುದು ಎಂದು ನನಗನಿಸುತ್ತಿದೆ. ಸಿವಿಸಿ ಕ್ಯಾಪಿಟಲ್‌ ಸಂಸ್ಥೆಯು ಕ್ರೀಡಾ ಬೆಟ್ಟಿಂಗ್‌ ನಡೆಸುವ ಟಿಪಿಕೊ ಮತ್ತು ಸಿಸಾಲ್‌ ಕಂಪೆನಿಗಳಲ್ಲಿ ಹೂಡಿಕೆ ಮಾಡಿದೆ. ಈ ಮಾಹಿತಿ ಸಿವಿಸಿಯ ಅಧಿಕೃತ ವೆಬ್‌ಸೈಟ್‌ನಲ್ಲಿದೆ. ಈ ಕುರಿತು ಬಿಸಿಸಿಐಗೆ ತಿಳಿಸಿಲ್ಲವೇ? ಭ್ರಷ್ಟಾಚಾರ ತಡೆ ಘಟಕ ಇಂತಹ ಸಂದರ್ಭದಲ್ಲಿ ಏನು ಮಾಡುತ್ತಿದೆ?’ ಎಂದು ಐಪಿಎಲ್‌ನ ಮಾಜಿ ಮುಖ್ಯಸ್ಥ ಲಲಿತ್‌ ಮೋದಿ ಟ್ವೀಟ್‌ ಮೂಲಕ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.