ಆಲ್‌ ಇಂಗ್ಲೆಂಡ್‌ ಬ್ಯಾಡ್ಮಿಂಟನ್‌ : ನಂ.3 ಆಟಗಾರನನ್ನು ಮಣಿಸಿದ ಲಕ್ಷ್ಯ ಸೇನ್‌

ಬರ್ಬಿಂಗ್‌ಹ್ಯಾಮ್‌: ಭಾರತದ ಭರವಸೆಯ ಆಟಗಾರ ಲಕ್ಷ್ಯ ಸೇನ್‌ “ಆಲ್‌ ಇಂಗ್ಲೆಂಡ್‌ ಬ್ಯಾಡ್ಮಿಂಟನ್‌’ ಕೂಟದಲ್ಲಿ ದೊಡ್ಡ ಬೇಟೆಯೊಂದನ್ನಾಡಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದಾರೆ. ಆದರೆ ಸೈನಾ ನೆಹ್ವಾಲ್‌ ಮತ್ತು ಪಿ.ವಿ. ಸಿಂಧು ದ್ವಿತೀಯ ಸುತ್ತಿನಲ್ಲಿ ಪರಾಭವಗೊಂಡು ನಿರಾಸೆ ಮೂಡಿಸಿದರು.

ಗುರುವಾರದ ಪುರುಷರ ಸಿಂಗಲ್ಸ್‌ ಪಂದ್ಯದಲ್ಲಿ ಲಕ್ಷ್ಯ ಸೇನ್‌ ವಿಶ್ವದ ನಂ.3 ಆಟಗಾರ ಆ್ಯಂಟನ್‌ ಆ್ಯಂಡರ್ಸನ್‌ ಅವರನ್ನು 21-16, 21-18 ನೇರ ಗೇಮ್‌ಗಳಿಂದ ಮಣಿಸಿ ಆಚ್ಚರಿಯ ಫ‌ಲಿತಾಂಶ ದಾಖಲಿಸಿದರು. ಇವರಿಬ್ಬರು ಮುಖಾಮುಖಿ ಆದದ್ದು ಇದೇ ಮೊದಲು. ಸೇನ್‌ ಆವರಿನ್ನು  ಚೀನದ ಲು ಗುವಾಂಗ್‌ ಜು ಅವರನ್ನು ಎದುರಿಸಲಿದ್ದಾರೆ.

ಸಿಂಧು, ಸೈನಾಗೆ ಆಘಾತ :

ಪಿ.ವಿ. ಸಿಂಧು, ಸೈನಾ ನೆಹ್ವಾಲ್‌ ಮೊದಲ ಸುತ್ತನ್ನು ಸುಲಭದಲ್ಲಿ ದಾಟಿದರೂ ದ್ವಿತೀಯ ಸುತ್ತಿನಲ್ಲಿ ಕಠಿನ ಸವಾಲು ಎದುರಿಸಬೇಕಾಯಿತು. ಇಬ್ಬರೂ 3 ಗೇಮ್‌ಗಳ ಹೋರಾಟದಲ್ಲಿ ಜಪಾನಿ ಆಟಗಾರ್ತಿಯರಿಗೆ ಶರಣಾದರು. ಹೀಗಾಗಿ ಕ್ವಾರ್ಟರ್‌ ಫೈನಲ್‌ನಲ್ಲಿ ಇವರಿಬ್ಬರು ಮುಖಾಮುಖೀಯಾಗುವ ಅವಕಾಶ ತಪ್ಪಿತು.

ಸೈನಾ ಅವರನ್ನು ವಿಶ್ವದ ನಂ.2 ಆಟಗಾರ್ತಿ ಅಕಾನೆ ಯಮಾಗುಚಿ 21-14, 17-21, 21-17 ಅಂತರದಿಂದ ಸೋಲಿಸಿದರೆ, ಸಿಂಧು ಅವರನ್ನು ಸಯಾಕಾ ತಕಹಾಶಿ 21-19, 16-21, 21-17 ಅಂತರದಿಂದ ಹಿಮ್ಮೆಟ್ಟಿಸಿದರು. ಸಿಂಧು-ತಕಹಾಶಿ ಪಂದ್ಯ ಒಂದು ಗಂಟೆ, 6 ನಿಮಿಷಗಳ ಕಾಲ ಸಾಗಿತು.

ಮೊದಲ ಸುತ್ತಿನಲ್ಲಿ ಸಿಂಧು ಚೀನದ ಝೀ ಯಿ ವಾಂಗ್‌ ಅವರನ್ನು 21-18, 21-13 ಅಂತರದಿಂದ ಮಣಿಸಿದ್ದರು. ಸೈನಾ ನೆಹ್ವಾಲ್‌ ಸ್ಪೇನ್‌ನ ಬೀಟ್ರಿಝ್ ಕೊರಾಲೆಸ್‌ ವಿರುದ್ಧ 21-17, 21-19 ಅಂತರದ ಮೇಲುಗೈ ಸಾಧಿಸಿದ್ದರು.

ವನಿತಾ ಡಬಲ್ಸ್‌ನಲ್ಲಿ ತಿೃಷಾ ಜಾಲಿ- ಗಾಯತ್ರಿ ಗೋಪಿಚಂದ್‌ ದ್ವಿತೀಯ ಸುತ್ತಿಗೆ ಮುನ್ನಡೆದಿದ್ದಾರೆ.

ಸಾಲು ಸಾಲು ಸೋಲು :

ಪುರುಷರ ಸಿಂಗಲ್ಸ್‌ನಲ್ಲಿ ಬಿ. ಸಾಯಿ ಪ್ರಣೀತ್‌ ಒಲಿಂಪಿಕ್ಸ್‌ ಚಾಂಪಿಯನ್‌ ವಿಕ್ಟರ್‌ ಅಕ್ಸೆಲ್ಸೆನ್‌ ವಿರುದ್ಧ 20-22, 11-21ರಿಂದ ಪರಾಭವಗೊಂಡರು. ಎಚ್‌.ಎಸ್‌. ಪ್ರಣಯ್‌ ಅವರನ್ನು ಥಾಯ್ಲೆಂಡ್‌ನ‌ ಕುನ್ಲವುತ್‌ ವಿತಿದ್ಸರಣ್‌ 21-15, 24-22ರಿಂದ ಹಿಮ್ಮೆಟ್ಟಿಸಿದರು. ಸಮೀರ್‌ ವರ್ಮ ಕೂಡ ಸೋಲಿನ ಸುಳಿಗೆ ಸಿಲುಕಿದರು. ಅವರನ್ನು ನೆದರ್ಲೆಂಡ್ಸ್‌ನ ಮಾರ್ಕ್‌ ಕಾಲ್ಜೂ 21-18, 21-11ರಿಂದ ಕೆಡವಿದರು.

ಪುರುಷರ ಡಬಲ್ಸ್‌ನಲ್ಲಿ 5ನೇ ಶ್ರೇಯಾಂಕದ ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ-ಚಿರಾಗ್‌ ಶೆಟ್ಟಿ ಅವರು ಸ್ಕಾಟ್ಲೆಂಡ್‌ನ‌ ಅಲೆಕ್ಸಾಂಡರ್‌ ಡುನ್‌-ಆ್ಯಡಂ ಹಾಲ್‌ ಕೈಯಲ್ಲಿ 21-17, 21-19 ಅಂತರದ ಸೋಲನುಭವಿಸಿದರು. ಎಂ.ಆರ್‌. ಅರ್ಜುನ್‌-ಧ್ರುವ ಕಪಿಲ, ಕೃಷ್ಣ ಪ್ರಸಾದ್‌ ಗರಗ್‌-ವಿಷ್ಣುವರ್ಧನ್‌ ಕೂಡ ಗೆಲುವು ಕಾಣುವಲ್ಲಿ ವಿಫ‌ಲರಾದರು.