ಟಿಬಿ ಔಷಧದ ಕೊರತೆ?

ಪ್ಯಾಂಗ್ಯಾಂಗ್‌: ತನ್ನ ದೇಶದಲ್ಲಿ ಒಂದೇ ಒಂದೂ ಕೋವಿಡ್‌ ಪ್ರಕರಣಗಳಿಲ್ಲ ಎಂದು ಸರ್ವಾಧಿಕಾರಿ ಕಿಮ್‌ ಜಾಂಗ್‌ನ ಉತ್ತರ ಕೊರಿಯಾ ಹೇಳುತ್ತದೆ. ಇದೆಷ್ಟು ನಿಜವೋ ಸುಳ್ಳೋ ತಿಳಿಯದು. ಆದರೆ, ಆ ದೇಶದಲ್ಲಿ ಕ್ಷಯ ರೋಗಿಗಳ ಸಂಖ್ಯೆ ಅತೀವ ಪ್ರಮಾಣದಲ್ಲಿದೆ ಎನ್ನುವುದು ತಿಳಿಯದ ವಿಷಯವೇನಲ್ಲ. ಈಗ ಉ. ಕೊರಿಯಾ ಬಳಿ ಇನ್ನೊಂದು ತಿಂಗಳಿಗಾಗುವಷ್ಟೇ ಟಿಬಿ ಔಷಧಗಳು ಉಳಿದಿವೆ ಎನ್ನುತ್ತಿವೆ ವರದಿಗಳು. ಚಿಕಿತ್ಸೆ ಸಿಗದ ಒಬ್ಬ ಟಿಬಿ ರೋಗಿ 10-15 ಜನರಿಗೆ ಸೋಂಕು ಹರಡುವ ಸಾಧ್ಯತೆ ಇರುವುದರಿಂದ ಮೊದಲಿಂದಲೂ ಅತೀವ ಆಹಾರದ ಕೊರತೆ, ಸ್ವಾಸ್ಥ್ಯ ಸಂಪನ್ಮೂಲಗಳ ಅಭಾವದಿಂದ ತತ್ತರಿಸಿರುವ ಆ ರಾಷ್ಟ್ರದಲ್ಲಿ ಈಗ ಪರಿಸ್ಥಿತಿ ಮತ್ತಷ್ಟು ಬಿಗಡಾಯಿಸುವ ಸಾಧ್ಯತೆ ಇದೆ.

ಕೊರೊನಾದಿಂದಾಗಿ ಉ. ಕೊರಿಯಾ ತನ್ನ ಗಡಿಗಳನ್ನು, ಸರಕು ಸಾಗಣೆಗಳ ದ್ವಾರವನ್ನು ಮುಚ್ಚಿಬಿಟ್ಟಿತು. ಇದರಿಂದಾಗಿ ಔಷಧ, ಆಹಾರ ಪದಾರ್ಥಗಳ ಪೂರೈಕೆ ನಿಂತುಹೋಗಿವೆ. ಟಿಬಿ ಔಷಧಗಳ ಕೊರತೆಯೂ ಎದುರಾಗಿದೆ.