Kundapura: ತೆಂಗಿನ ಮರಗಳಿಗೆ ಬೇರು ಬಾಧೆ; ಕಾಂಡ ಸೋರುವ ರೋಗ ಪತ್ತೆ

ಕುಂದಾಪುರ: ನಾಡ ಗ್ರಾಮದ ಜಡ್ಡಾಡಿಯಲ್ಲಿ 300 ಕ್ಕೂ ಅಧಿಕ ತೆಂಗಿನ ಮರಗಳಿಗೆ ವಿಚಿತ್ರ ಕಾಯಿಲೆ ಬಂದ ಬಗ್ಗೆ ಬುಧವಾರ ಕೃಷಿ ವಿಜ್ಞಾನಿಗಳು, ತೋಟಗಾರಿಕಾ ಇಲಾಖೆಯ ಅಧಿಕಾರಿಗಳು ಭೇಟಿ ನೀಡಿ, ಪರಿಶೀಲನೆ ನಡೆಸಿದರು. ಈ ವೇಳೆ ಬೇರು ಬಾಧೆ ಹಾಗೂ ಕಾಂಡ ಸೋರುವ ರೋಗದಿಂದ ತೆಂಗಿನ ಮರಗಳು ಈ ರೀತಿಯಾಗಿರುವುದಾಗಿ ವಿಜ್ಞಾನಿಗಳು ತಿಳಿಸಿದ್ದಾರೆ.

ವಿಜ್ಞಾನಿಗಳಾದ ಬ್ರಹ್ಮಾವರದ ವಲಯ ಕೃಷಿ ಹಾಗೂ ತೋಟಗಾರಿಕಾ ಸಂಶೋಧನ ಕೇಂದ್ರದ ಸಹಾಯಕ ಪ್ರಾಧ್ಯಾಪಕ ಡಾ| ಚೈತನ್ಯ ಎಚ್‌.ಎಸ್‌., ಕೀಟಶಾಸ್ತ್ರದ ಸಹಾಯಕ ಪ್ರಾಧ್ಯಾಪಕ ಡಾ| ರೇವಣ್ಣ ರೇವಣ್ಣನವರ್‌, ಕೃಷಿ ವಿಸ್ತರಣೆ ಸಹಾಯಕ ಪ್ರಾಧ್ಯಾಪಕ ಡಾ| ಮೋಹನ ಕುಮಾರ ವಿ. ಭೇಟಿ ನೀಡಿದರು. ಜಡ್ಡಾಡಿಯ ಚಿಕ್ಕು ಪೂಜಾರ್ತಿ, ಬಚ್ಚಿ ಪೂಜಾರ್ತಿ ಹಾಗೂ ನಾಗು ಪೂಜಾರ್ತಿ ಅವರ ಸುಮಾರು 310ಕ್ಕೂ ಅಧಿಕ ತೆಂಗಿನ ಮರಗಳಿಗೆ ಈ ರೋಗ ಬಾಧೆ ಉಂಟಾಗಿದ್ದು, ಅವರ ತೆಂಗಿನ ತೋಟಗಳಿಗೆ ಭೇಟಿ ನೀಡಿ, ಅಧ್ಯಯನ ನಡೆಸಿದರು.

ಪರಿಹಾರ ಕ್ರಮಕ್ಕೆ ಸಲಹೆ
ಈ ರೋಗ ಬಾಧೆಗೆ ವಿಜ್ಞಾನಿಗಳು ಪರಿಹಾರ ಸೂಚಿಸಿದ್ದಾರೆ. ರೆಡೊಮಿಲ್‌ ಎಂ-ಝಡ್‌ ದ್ರಾವಣ, ಶೇ. 1 ಬೋರ್ಡೊ ದ್ರಾವಣ ತೆಂಗಿನ ಮರಗಳ ಬುಡಕ್ಕೆ ಸುರಿಸ ಬೇಕು. 1 ಮರಕ್ಕೆ 5 ಕೆ.ಜಿ. ಬೇವಿನ ಹಿಂಡಿ, ಬೋರ್ಡೊ ಪೇಸ್ಟ್‌ ಮಾಡಿ, ಕಾಂಡದ ಮೇಲೆ ಬಳಿಯಬೇಕು.

ಮೇ ತಿಂಗಳಲ್ಲಿ 2 ಕೆ.ಜಿ. ಸುಣ್ಣ, ಆ ಬಳಿಕ 15 ದಿನಗಳ ನಂತರ ಜೂನ್‌ ತಿಂಗಳಲ್ಲಿ 500 ಗ್ರಾಂ. ಯೂರಿಯಾ, 750 ಗ್ರಾಂ. ರಾಕ್‌,
1 ಕೆ.ಜಿ. ಪೊಟ್ಯಾಷ್‌ ಹಾಕಬೇಕು. ಅಕ್ಟೋಬರ್‌ ನಲ್ಲೂ ಅದೇ ರೀತಿ ಹಾಕಬೇಕು. ಸೆಪ್ಟಂಬರ್‌ – ಅಕ್ಟೋಬರ್‌ನಲ್ಲಿ ಬುಡ ಬಿಡಿಸುವಾಗ ಗೊಬ್ಬರ ಹಾಕುವ ವೇಳೆ, ಟ್ರಕೊಡರ್ಮಾ ಮಿಶ್ರಣ ಮಾಡಬೇಕು ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.

ಈ ವೇಳೆ ಜಿಲ್ಲಾ ತೋಟಗಾರಿಕೆ ಇಲಾಖೆಯ ಉಪನಿರ್ದೇಶಕಿ ಭುವನೇಶ್ವರಿ ಅವರು, ರೈತರಿಗೆ ಈ ಬಗ್ಗೆ ಮಾಹಿತಿ ನೀಡುವ ಹಾಗೂ ಅರಿವು ಮೂಡಿಸುವ ನಿಟ್ಟಿನಲ್ಲಿ ಸಹಕಾರಿ ಸಂಘಗಳ ಸಹಕಾರದೊಂದಿಗೆ ವಿಚಾರ ಸಂಕಿರಣ ನಡೆಸಲು ಸಂಬಂಧಪಟ್ಟ
ಕುಂದಾಪುರದ ತೋಟಗಾರಿಕೆ ಇಲಾಖಾ ಅಧಿಕಾರಿಗಳಿಗೆ ಸೂಚಿಸಿದರು. ಕುಂದಾಪುರದ ಹಿರಿಯ ತೋಟಗಾರಿಕೆ ಯ ಸಹಾಯಕ ನಿರ್ದೇಶಕ ನಿಧೀಶ್‌ ಕೆ.ಜೆ.,ತೆಂಗು ಬೆಳೆಗಾರರು ಉಪಸ್ಥಿತರಿದ್ದರು.

ಸುದಿನ ವರದಿ
ಜಡ್ಡಾಡಿಯಲ್ಲಿ ತೆಂಗಿನ ಮರಗಳಿಗೆ ವಿಚಿತ್ರ ರೋಗ ಬಂದಿರುವ ಕುರಿತಂತೆ “ಉದಯವಾಣಿ ಸುದಿನ’ವು ಅ.1ರಂದು ವಿಶೇಷ ವರದಿ ಪ್ರಕಟಿಸಿ, ಗಮನಸೆಳೆದಿತ್ತು.