ಕುಂದಾಪುರ: ಅಪಹರಣಕ್ಕೊಳಗಾದ ವಿದ್ಯಾರ್ಥಿಯ ರಕ್ಷಣೆ

ಕುಂದಾಪುರ: ಅಪಹರಣಕ್ಕೆ ಒಳಗಾದ ಕಾಲೇಜು ವಿದ್ಯಾರ್ಥಿಯನ್ನು ಇಲ್ಲಿನ ಎಸ್‌ಐ ಸದಾಶಿವ ಗವರೋಜಿ ಅವರ ನೇತೃತ್ವದ ತಂಡ ಕೆಲವೇ ಗಂಟೆಗಳಲ್ಲಿ ಪತ್ತೆ ಹಚ್ಚಿ ಕರೆತಂದಿದೆ.

ಇಲ್ಲಿನ ಕಾಲೇಜೊಂದರ ವಿದ್ಯಾರ್ಥಿ, ಸಿದ್ದಾಪುರ ಸಮೀಪದ ಜನ್ಸಾಲೆಯ ಗೋವಿಂದ ಶೆಟ್ಟಿ ಅವರ ಪುತ್ರ ಶಶಾಂಕ್‌ (21) ಅಪಹರಣಕ್ಕೆ ಒಳಗಾದವರು. ಇವರಿಗೂ ಕಿರಣ್‌ ಅವರ ನಡುವೆ ಇದ್ದ ವ್ಯವಹಾರವೇ ಅಪಹರಣಕ್ಕೆ ಕಾರಣ ಎಂದು ಪ್ರಾಥಮಿಕ ತನಿಖೆಯಿಂದ ಗೊತ್ತಾಗಿದೆ. ಮಂಗಳವಾರ ಶಶಾಂಕ್‌ನನ್ನು ಕಾರಿನಲ್ಲಿ ಕೊಂಡೊಯ್ದ ತಂಡ ಶಶಾಂಕ್‌ ಮನೆಗೆ ದೂರವಾಣಿ ಕರೆ ಮಾಡಿ ಅಪಹರಣದ ಸುಳಿವು ನೀಡಿದೆ.

ಈ ಹಿನ್ನೆಲೆಯಲ್ಲಿ ತತ್‌ಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರು ಡಿವೈಎಸ್‌ಪಿ ಕೆ. ಶ್ರೀಕಾಂತ್‌, ಸಿಪಿಐ ಗೋಪಿಕೃಷ್ಣ ಮಾರ್ಗದರ್ಶನದಲ್ಲಿ ತಂಡ ರಚಿಸಿ ಹುಡುಕಾಟ ಆರಂಭಿಸಿತು. ಶಶಾಂಕ್‌ ಇರುವ ಸ್ಥಳ ತಿಳಿದ ಕೂಡಲೇ ವಾಹನದಲ್ಲಿ ತೆರಳಿ ಹುಬ್ಬಳ್ಳಿಯಿಂದ ಬುಧವಾರ ಕುಂದಾಪುರಕ್ಕೆ ಕರೆತರಲಾಯಿತು.

ಮೂಲತಃ ಕೊಪ್ಪಳದವನಾದ ಕಿರಣ್‌ ಹುಬ್ಬಳ್ಳಿಯಲ್ಲಿ ವಾಸ್ತವ್ಯದಲ್ಲಿದ್ದು ಬ್ರಹ್ಮಾವರದ ಯುವಕನ ಮೂಲಕ ಶಶಾಂಕ್‌ ಸ್ನೇಹ ಸಂಪಾದಿಸಿದ್ದ. ಯಾವುದೋ ಕಾರಣಕ್ಕೆ ಕಿರಣ್‌ ಜತೆ ಶಶಾಂಕ್‌ಗೆ ವ್ಯವಹಾರ ನಡೆದಿದ್ದು ಅದೇ ಕಾರಣದಿಂದ ಅಪಹರಣವೂ ನಡೆದಿದೆ. ಪೊಲೀಸರ ಸಕಾಲಿಕ ಕಾರ್ಯಾಚರಣೆಯಿಂದ ಸಂಭಾವ್ಯ ಅನಾಹುತ ತಪ್ಪಿದೆ. ಪ್ರಕರಣ ದಾಖಲಾಗಿದೆ.