ದೂರದರ್ಶನ ಚಂದನ ವಾಹಿನಿಯಲ್ಲಿ ಪ್ರತಿ ರವಿವಾರ ಬೆಳಗ್ಗೆ 9ರಿಂದ 9.30ರ ವರೆಗೆ ಪ್ರಸಾರಗೊಳ್ಳುತ್ತಿರುವ ಪ್ರಜಾ ಫಿಲಂಸ್‌ ಕಟಪಾಡಿ ಅರ್ಪಿಸುವ ತುಳುನಾಡಿನ ವೀರ ಮತ್ತು ಕಾರಣಿಕ ಪುರುಷರಾದ ಕೋಟಿ-ಚೆನ್ನಯ ಟೆಲಿ ಕನ್ನಡ ಧಾರಾವಾಹಿ ದಾಖಲೆಯ 201ನೇ ಸಂಚಿಕೆಯ ಪ್ರಸಾರ ಪ್ರೇಕ್ಷಕ‌ರ ಪ್ರಶಂಸೆಗೆ ಪಾತ್ರವಾಯಿತು.
ಅಶೋಕ್‌ ಎಸ್‌. ಸುವರ್ಣ ನಿರ್ಮಾಣದ ಚಂದ್ರಹಾಸ ಆಳ್ವ ನಿರ್ದೇಶನದ ಪೌರಾಣಿಕ ಧಾರಾವಾಹಿಯಲ್ಲಿ ಕೋಟಿ-ಚೆನ್ನಯ ಟೆಲಿ ಧಾರಾವಾಹಿಯಲ್ಲಿ ಕೋಟಿಯ ಪಾತ್ರದಲ್ಲಿ ರಾಜಶೇಖರ ಶೆಟ್ಟಿ ಅಳಿಕೆ ಮತ್ತು ಚೆನ್ನಯನ ಪಾತ್ರದಲ್ಲಿ ರೋಹಿತ್‌ ಕುಮಾರ್‌ ಕಟೀಲ್‌ ಅವರ ಅಭಿನಯ ವಿಶೇಷ ಆಕರ್ಷಣೆಯಾಗಿತ್ತು.
ಅವಳಿ ಕಾರಣಿಕ ಪುರುಷರ ಅಂತಿಮ ಸನ್ನಿವೇಶ ವೀಕ್ಷಿಸಿದ ಚಲನಚಿತ್ರರಂಗದ ಹಂಸಲೇಖ, ಜೈಜಗದೀಶ್‌, ಗುರುಕಿರಣ್‌, ಪದ್ಮಾ ವಾಸಂತಿ, ದೇವದಾಸ್‌ ಕಾಪಿಕಾಡ್‌ ಮೊದಲಾದವರು ಪ್ರಶಂಸಿಸಿದ್ದಾರೆ.
ಚೆನ್ನಯನ ಪಾತ್ರದಲ್ಲಿ ಅಂತಾರಾಷ್ಟ್ರೀಯ ಕ್ರೀಡಾಪಟು ರೋಹಿತ್‌ ಕುಮಾರ್‌ ಕಟೀಲ್‌ ಅವರ ಅಭಿನಯ, ಅದ್ಭುತ ಸನ್ನಿವೇಶದ ದೃಶ್ಯದ ಬಗ್ಗೆ ಹಿರಿಯ ಚಿತ್ರನಟ ರಾಮಕೃಷ್ಣ ಹಾಗೂ ಜೈಜಗದೀಶ್‌ ದೂರವಾಣಿ ಮೂಲಕ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಕೋಟಿ-ಚೆನ್ನಯ ಧಾರಾವಾಹಿಯನ್ನು ಜನತೆಗೆ ನೀಡಿದ ಧಾರಾವಾಹಿ ತಂಡಕ್ಕೆ ಪ್ರೇಕ್ಷರಿಂದ ಶಾಭಾಸ್‌ಗಿರಿ ದೊರೆತಿದೆ. ಧಾರಾವಾಹಿ ಇನ್ನು ಕೆಲವೇ ಕಂತುಗಳಲ್ಲಿ ಕೊನೆಗೊಳ್ಳಲಿದ್ದು ಪ್ರತಿ ರವಿವಾರ ರಾತ್ರಿ 11.30ಕ್ಕೆ ಮರುಪ್ರಸಾರವಾಗಲಿದೆ.
