ಕೋಟ ಕಲ್ಮಾಡಿ: ಪಿಡಿಒ ಮನೆಯಲ್ಲಿ ವಿದ್ಯುತ್‌ ಶಾರ್ಟ್‌ ಸರ್ಕ್ಯೂಟ್‌

ಕೋಟ: ಕೋಟತಟ್ಟು ಕಲ್ಮಾಡಿ ನಿವಾಸಿ, ಪಂಚಾಯತ್‌ ಅಭಿವೃದ್ಧಿ ಅಧಿಕಾರಿ ಪಾರ್ವತಿ ಮೊಗವೀರ ಅವರ ಮನೆಯಲ್ಲಿ ಶನಿವಾರ ನಸುಕಿನ ಜಾವ 4 ಗಂಟೆಗೆ ವಿದ್ಯುತ್‌ ಶಾರ್ಟ್‌ ಸರ್ಕ್ಯೂಟ್‌ ಉಂಟಾಗಿ ಅಪಾರ ಹಾನಿ ಸಂಭವಿಸಿದೆ.

ಅಡುಗೆ ಮನೆಯಲ್ಲಿ ಘಟನೆ ಸಂಭವಿಸಿದ್ದು, ಫ್ರಿಜ್‌, ಗ್ರೈಂಡರ್‌, ಮಿಕ್ಸಿ, ಫ್ಯಾನ್‌, ವಾಷಿಂಗ್‌ ಮೆಷಿನ್‌, ಕಪಾಟು ಮುಂತಾದ ವಸ್ತುಗಳು ಸುಟ್ಟು ಕರಕಲಾಗಿದೆ. ಸುಮಾರು 5ರಿಂದ 6 ಲ. ರೂ. ನಷ್ಟ ಅಂದಾಜಿಸಲಾಗಿದೆ.

ತಪ್ಪಿದ ಭಾರೀ ದುರಂತ: ದುರಂತ ಸಂಭವಿಸುವಾಗ ಎಲ್ಲರೂ ನಿದ್ರಿಸುತ್ತಿದ್ದರು. ಅಡುಗೆ ಕೋಣೆಯಿಂಂದ ವಾಸನೆ, ಹೊಗೆ ಬರುತ್ತಿರುವುದನ್ನು ಪಕ್ಕದ ಮನೆಯವರು ಗಮನಿಸಿ ಮನೆ ಮಂದಿಯನ್ನು ಎಚ್ಚರಿಸಿದರು. ಅಡುಗೆ ಮನೆಯ ಬಾಗಿಲು ಮುಚ್ಚಿದ್ದರಿಂದ ಬೆಂಕಿಯ ಕೆನ್ನಾಲಿಗೆ ಇತರೆಡೆ ವ್ಯಾಪಿಸದ ಕಾರಣ ಭಾರೀ ಅನಾಹುತ ತಪ್ಪಿದಂತಾಗಿದೆ.

ಅಧಿಕಾರಿಗಳ ಭೇಟಿ: ಸ್ಥಳಕ್ಕೆ ಕೋಟ ಠಾಣಾಧಿಕಾರಿ ನಿತ್ಯಾನಂದ ಗೌಡ, ಮೆಸ್ಕಾಂ ಎ. ಡಬ್ಲೂ. ಪ್ರತಾಪ್‌ ಶೆಟ್ಟಿ, ಮೆಸ್ಕಾಂನ ಕೋಟ ಶಾಖಾಧಿಕಾರಿ ಗುರುಪ್ರಸಾದ್‌, ಅಗ್ನಿಶಾಮಕ ದಳದವರು ಭೇಟಿ ನೀಡಿದರು. ಬೆಂಕಿ ನಂದಿಸಲು ಸ್ಥಳೀಯರು ಸಹಕರಿಸಿದರು.