ಚೆನ್ನೈ: ಇತ್ತೀಚೆಗಿನ ವರ್ಷಗಳಲ್ಲಿ ಸೆಲೆಬ್ರಿಟಿಗಳ ವಿವಾಹ ಬಂಧ ಅಷ್ಟು ಗಟ್ಟಿಯಾಗಿ ಉಳಿಯುತ್ತಿಲ್ಲ. ಪರಸ್ಪರ ಒಪ್ಪಿಗೆ ಮೇರೆಗೆ ಸೆಲೆಬ್ರಿಟಿಗಳು ತಮ್ಮ ದಾಂಪತ್ಯ ಜೀವನದಿಂದ ದೂರವಾಗುತ್ತಿದ್ದಾರೆ.
ಸೆಲೆಬ್ರಿಟಿಗಳು ಪತಿ – ಪತ್ನಿಯಿಂದ ವಿಚ್ಛೇದನ ಪಡೆದ ಬಳಿಕ ಕೆಲ ಸಮಯದ ಬಳಿಕ ಮತ್ತೊಂದು ಸಂಬಂಧಕ್ಕೆ ಹೊಂದಿಕೊಂಡು ಪ್ರೀತಿ ಬಂಧನಕ್ಕೆ ಒಳಗಾಗಿ ವಿವಾಹವಾಗುತ್ತಾರೆ. ಇದೇ ರೀತಿ ಬಹುಭಾಷಾ ನಟಿಯೊಬ್ಬರು ನಾಲ್ಕನೇ ಬಾರಿಗೆ ದಾಂಪತ್ಯ ಜೀವನಕ್ಕೆ ಕಾಲಿಡಲಿದ್ದಾರೆ.
ಹಿರಿಯ ನಟ ವಿಜಯ್‌ ಕುಮಾರ್ (Veteran Actor Vijayakumar) ಅವರ ಪುತ್ರಿ ವನಿತಾ (Vanitha) 4ನೇ ಮದುವೆಗೆ ಮುಂದಾಗಿದ್ದಾರೆ.
ಈ ಕುರಿತು ತನ್ನ ಭಾವಿ ಪತಿಯ ಜತೆ ಫೋಟೋವನ್ನು ಹಂಚಿಕೊಂಡು ವನಿತಾ ಮಾಹಿತಿ ನೀಡಿದ್ದಾರೆ. ನಟಿ ವನಿತಾ ಡ್ಯಾನ್ಸ್ ಕೊರಿಯೋಗ್ರಫರ್ ರಾಬರ್ಟ್ ರಾಜ್‌ (Robert Raj) ಅವರೊಂದಿಗೆ ಮದುವೆ ಆಗಲಿದ್ದಾರೆ. ಸೇವ್‌ ದಿ ಡೇಟ್‌ ಎಂದು ಮದುವೆ ದಿನಾಂಕವನ್ನು ಫೋಟೋವೊಂದಿಗೆ ಹಂಚಿಕೊಂಡಿದ್ದಾರೆ.
ಮೂರು ಮದುವೆ, ಮೂವರಿಗೂ ವಿಚ್ಛೇದನ ನೀಡಿರುವ ವನಿತಾ: ವನಿತಾ ಅವರಿಗಿದು 4ನೇ ಮದುವೆ. 2002ರಲ್ಲಿ ಮೊದಲ ಬಾರಿಗೆ ವನಿತಾ ಆಕಾಶ್ ಎಂಬುವವರ ಕೈ ಹಿಡಿದಿದ್ದರು. 7 ವರ್ಷಗಳ ಬಳಿಕ ಅವರೊಂದಿಗಿನ ದಾಂಪತ್ಯ ಜೀವನಕ್ಕೆ ಅಂತ್ಯವಾಡಿದ್ದರು. ಇವರಿಗೆ ಇಬ್ಬರು ಮಕ್ಕಳಿದ್ದರು.
ಇದಾದ ಬಳಿಕ ಉದ್ಯಮಿ ಆನಂದ್ ಜಯರಾಜನ್ ಜೊತೆ ಹಸೆಮಣೆ ಏರಿದ್ದರು. ಆದರೆ ಈ ಸಂಬಂಧ ಕೂಡ 5 ವರ್ಷದಲ್ಲೇ ಮುರಿದು ಬಿತ್ತು. ಇವರಿಗೆ ಒಂದು ಹೆಣ್ಣು ಮಗುವಿತ್ತು.
ಎರಡು ಮದುವೆ ಮುರಿದು ಬಿದ್ದ ಬಳಿಕ ಕೆಲ ಸಮಯ ವಿನಿತಾ ಒಂಟಿಯಾಗಿಯೇ ಇದ್ದರು. 2020ರಲ್ಲಿ ವನಿತಾ ಪೀಟರ್‌ ಪೌಲ್‌ ಎನ್ನುವವರ ಜತೆ ವಿವಾಹವಾಗಿದ್ದರು. ಆದರೆ ಅದೇ ವರ್ಷ ಆ ಸಂಬಂಧ ಕೂಡ ಮುರಿದು ಬಿದ್ದಿತ್ತು. ಪೀಟರ್‌ ಗೆ ಆದಾಗಲೇ ಮದುವೆಯಾಗಿ ಎರಡು ಮಕ್ಕಳಿತ್ತು. ಮೊದಲ ಪತ್ನಿಗೆ ವಿಚ್ಛೇದನ ನೀಡದೆ ಎರಡನೇ ಮದುವೆ ಆಗಿದ್ದಾರೆ ಎನ್ನುವ ಆರೋಪ ಪೀಟರ್‌ ಮೇಲೆ ಕೇಳಿ ಬಂದಿತ್ತು.
ಇದೀಗ ವನಿತಾ ರಾಬರ್ಟ್ ಜತೆ ವಿವಾಹವಾಗಲು ಸಿದ್ದರಾಗಿದ್ದಾರೆ. 2013ರಲ್ಲೇ ರಾಬರ್ಟ್ ಹಾಗೂ ವನಿತಾ ಪರಸ್ಪರ ಸ್ನೇಹಿತರಾಗಿ ಪ್ರೀತಿಸಲು ಶುರು ಮಾಡಿದ್ದರು. ಆದರೆ 2017ರಲ್ಲಿ ಇಬ್ಬರು ಬ್ರೇಕ್‌ ಅಪ್‌ ಮಾಡಿಕೊಂಡಿದ್ದರು. ಇದೀಗ ವನಿತಾ ರಾಬರ್ಟ್ ಅವರೊಂದಿಗೆಯೇ ವಿವಾಹವಾಗುತ್ತಿದ್ದಾರೆ. ಇದೇ ಅಕ್ಟೋಬರ್‌ 5 ಇಬ್ಬರ ಮದುವೆ ನೆರವೇರಲಿದೆ.
ʼಚಂದ್ರಲೇಖಾʼ, ‘ಮಾಣಿಕ್ಕಂ’, ‘ಮಳ್ಳಿ ಪೆಳ್ಳಿ’, ‘ಅನೀತಿ’, ‘ಹಾರ’ಎಂಜಿಆರ್ ಶಿವಾಜಿ ರಜಿನಿ ಕಮಲ್ ಸೇರಿದಂತೆ ಹಲವು ಸಿನಿಮಾದಲ್ಲಿ ವನಿತಾ ನಟಿಸಿದ್ದಾರೆ.
ತಮಿಳು ಬಿಗ್‌ಬಾಸ್ ಸೀಸನ್ 3ರ ಸ್ಪರ್ಧಿಯಾಗಿ ವನಿತಾ ದೊಡ್ಮನೆ ಒಳಗೆ ಹೋಗಿದ್ದರು.
