ಕೋಲ್ಕತ STFನಿಂದ 1,000 ಕೆಜಿ ಸ್ಫೋಟಕವಿದ್ದ ವಾಹನ ವಶ, ಇಬ್ಬರ ಸೆರೆ

ಕೋಲ್ಕತ : 1,000 ಕಿಲೋ ಸ್ಫೋಟಕ ಸಾಗಿಸುತ್ತಿದ್ದ ವಾಹನವೊಂದನ್ನು ಕೋಲ್ಕತ STF ಪೊಲೀಸರು ಅಡ್ಡಗಟ್ಟಿ ಇಬ್ಬರನ್ನು ಬಂಧಿಸಿದ್ದಾರೆ.

ಸ್ಫೋಟಕ ತುಂಬಿದ ಈ ವಾಹನ ಒಡಿಶಾದಿಂದ ಬರುತ್ತಿತ್ತು. ಇದು 24 ಉತ್ತರ ಪರಗಣ ಮೂಲಕ ಸಂಚರಿಸುತ್ತಿತ್ತು.

ಸ್ಫೋಟಕ ತುಂಬಿಕೊಂಡ ವಾಹನವೊಂದು ಸಾಗುತ್ತಿದೆ ಎಂಬ ಖಚಿತ ಮಾಹಿತಿಯ ಪ್ರಕಾರ ಪೊಲೀಸರು ಶಂಕಿತ ಟಾಟಾ 407 ಮೆಟಾಡರ್‌ ವಾಹನವನ್ನು ಎಸ್‌ಟಿಎಫ್ (ವಿಶೇಷ ಕಾರ್ಯಪಡೆ) ತಂಡದವರು ಬಿ ಟಿ ರಸ್ತೆಯಲ್ಲಿನ ತಾಲಾ ಸೇತುವೆಯ ಬಳಿ ಅಡ್ಡಗಟ್ಟಿದರು. ಈ ಪ್ರದೇಶವು ಚಿತ್‌ಪುರ ಪೊಲೀಸ್‌ ಠಾಣೆ ವ್ಯಾಪ್ತಿಗೆ ಒಳಪಡುತ್ತದೆ. 

ಶಂಕಿತ ವಾಹನದೊಳಗಿದ್ದ 1,000 ಕಿಲೋ ಸ್ಫೋಟಕ (ಪೊಟ್ಯಾಶಿಯಂ ನೈಟ್ರೇಟ್‌) ವನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡರು. ಸ್ಫೋಟಕವನ್ನು 27 ಗೋಣಿ ಚೀಲದೊಳಗೆ ತುಂಬಿಸಿಡಲಾಗಿತ್ತು. 

ಶಂಕಿತ ವಾಹನದ ಚಾಲ ಮತ್ತು ಹೆಲ್ಪರ್‌ ನನ್ನು ಪೊಲೀಸರು ಬಂಧಿಸಿದ್ದು ಇವರನ್ನು ಇಂದ್ರಜಿತ್‌ ಭೂಯಿ (25) ಮತ್ತು ಪದ್ಮಲೋಚನ ಡೇ (31) ಎಂದು ಗುರುತಿಸಲಾಗಿದೆ. ಇವರನ್ನು ಇಂದು ಕೋರ್ಟಿಗೆ ಹಾಜರಪಡಿಸಲಾಗುತ್ತದೆ ಎಂದು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿರುವ ಎಸ್‌ಟಿಎಫ್ ತಿಳಿಸಿದೆ.